Read MMA SHIYYA Barua ya Vaebrania 7 Bible Online

Barua ya Vaebrania 7 - MMA SHIYYA bible

Barua ya Vaebrania 7

¹Melikisedeki ulya eekee mangi wa Salemu na nkohani wa Iṛuva uu akee iṛuvewu ule. Nae kandeondoṛa Abraamu ifi auka fireń ilya ya ivinga mamangi alya kanniinga mboṛa.

²Na Abraamu kamfukiya kyeenga kya ikumi kya findo filya foose andewara fireń. Misendie ya irina lyamwi lya mbele ni: mangi wa udede, fingi: mmangi wa Salemu, nkimwi na mangi wa unambwe.

³Ndee na mae na vakuuku vamwi veeshiwa ndi, ana awore kyeeri kya muu wamwi kyabookia ana kyamanda ndi, amu awakaniswa na Mwana uu wa Iṛuva akaa nkohani wa miṛeṛe.

⁴Lleń te sheeli uu eekee nnini, nde yeru nnini Abraamu kanniinga kyeenga kya ikumi kya mifungwa ilya.

⁵Na kari ka vana va Levi valya varambikio̱ ukohani nawo vaniingio̱ ivavaso lya yuta kyeenga kya ikumi kwa vandu kisumani na mavavaso, nawo wanavamae vawo vamilie kwa Abraamu.

⁶Kake ulya kitaare wwa uṛiti lwawo andewaria kyeenga kya ikumi kya findo filya fa Abraamu kanniinga mboṛa ulya akee na kirekio kilya.

⁷Ana iki kileekie kutu sheeli munnya aniingwaa mboṛa ni nnini ndi.

⁸Na ia vandu vakee vaya ufu vawariaa kyeenga kya ikumi, kake ulya akee irambulwa sheeli eefo na muu.

⁹Lingi kimakii irerwa sheeli kya shia ya Abraamu na akwaa lLevi ulya awaria kyeenga kya ikumi andeniingia kyeenga kya ikumi.

¹⁰Fulya eekikee ifo kisiń kya nkuuku wamwi ilyo Melikisedeki akwania nae.

¹¹Kyasia kifo lwiifoo usongovisi lufile kyeeri kya ukohani lwa Levi — fulya vandu wo vakooya ivavaso kiimba kya ukohani lo — kiifo kiteveto lingi kya nkohani ungi ashe wa mikae ya Melikisedeki ana nta atataalikio̱ mikae ya Aron?

¹²Amu ukohani lo lukankwilasha kyawara na uvavaso nalo lwilashike.

¹³Amu ulya andererwa na firero fo eekee wa uṛiti lungi, kitaare amuuka nndu uṛitiń ilo wa iṛunda mashoṛa a irasia.

¹⁴Amu kimanyikie na baa sheeli Nndumi weru amilie ifo kwa Yuda, ni uṛiti kitaare Mose arera nta kirero kimwi kiimba kyayo ifo mboniń ta ukohani.

¹⁵Lingi ifo tikee irera mfa baa mmwasi kya kita, ili nkohani ungi arawa-wo avakie Melikisedeki.

¹⁶Nae andeva nkohani kwa mivavasie ya uvavaso lukee lwa shia ya kivvili ndi, kake andeva kuri kwa finya ya muu utawore mmando.

¹⁷Amu arambulwa sheeli: ”Iwe kukee nkohani wa miṛeṛe wa mikae ya Melikisedeki“.

¹⁸Nakyo nkyo kindeuta ivavaso lia lindebooka, fulya liikee itanyari litaare finya. Amu ivavaso lia nta kindo lyaawutia.

¹⁹Andu ayo likaatwa-fo iverea likee inuru mmwasi, fulya timakii iserikia nalyo Iṛuva.

²⁰Manyiń liifo ikite lindeliwa. Amu valya vandeva vakohani liteefo ikite.

²¹Kake ye anderawa na ikite ni ulya, andemwia: ”Nndumi allya ikite, nae eelashaa ndi eenumbuaa: Iwe kukee nkohani wa miṛeṛe“.

²²Kyasia kwa kiṛengo ki Yesu andeva nsalaba wa mma ikee shinuru kita ilya ingi.

²³Lingi valya vandeaṛulwa vakohani vveengi, fulya vandeimwa ni ufu veekaa.

²⁴Kake ye fulya akaa miṛeṛe awore ukohani lwamwi lutasendukaa.

²⁵Nae kiimba kya ikyo amakii ivakiṛa deń valya vasheaa Iṛuva veesalalio̱o̱ yye, fulya akee na muu kyeeri kilungani, amu avaterevie-wo.

²⁶Amu kindetiwara ise iva na nkohani nnini wa mikae ii akee nsongori atawore ukasha, atawore teve nta imwi na ilakaniswa kalakaniswa na varekwa, akee ule kita iṛuvewu.

²⁷Amu ye awore kiteveto kya nkonu tiṛi sha vakohani vengi vanini ndi valya veerasiaa mbele kiimba kya mareko awo veni, numa vakarasia vandu nawo kiimba kya mareko awo. Amu ye amaa itana ifi limwi tubu, ili andekuniingia ye muni.

²⁸Amu uvavaso lua lukee yaṛua vandu vave vakohani vanini vawore utanyari, kake kirero kya mma ilya indesha numa ya uvavaso kinderwaa-wo Mwana akaa miṛeṛe aawukie koose.