Read MMA SHIYYA Barua ya Vaebrania 8 Bible Online

Barua ya Vaebrania 8 - MMA SHIYYA bible

Barua ya Vaebrania 8

¹Kyasia kari ka ifo tikee irera kirero kikee kinini nkyo iki. Toore nkohani nnini wa mikae ii akee rembo uko usha lwa kifumbi kya unini lwa ifo iṛuvewu.

²Akee ndundi wa andu asongori na wa yema lia lya dede lia Nndumi alirwaa-wo ana nta ni nndu ndi.

³Amu nkohani nnini woose arawa-fo, amu aniingie wavi na kirasio. Kwa ikyo kyawara uu nae ave na kindo kya irasia.

⁴Kikooye eekee ia isangeń, eevaa nkohani ndi, fulya veefo vaniingiaa misimbika sheeli uvavaso lua luvavasie.

⁵Nawo vakee iṛundia fwana na kiṛishwe kya filya fikee iṛuvewu sheeli Mose andevavaswa ni Iṛuva lia andemaa ikusongosia itobiṛia yema lia. Amu Nndumi arerie: ”Lla nnu kusongosie findo foose fisumani na fwana ilya kundeoruswa kulya uroń“.

⁶Kake alli uu ankooya uṛundi lwilanyi lua, fulya akee na munnde mma ikee shisha kilanya indevavaswa irie firekio fikee fisha kita filya fingi.

⁷Amu kifo ilya ya mbele kitaare iikee shaangu, nta mwaanya wikiṛuywaa wa ilya ya kavili ndi.

⁸Amu andevareria eevaiaa: ”Manyiń mikonu ikee isha, nań naawutiaa numba ya Isiraeli na numba ya Yuda mma shiiya.

⁹Nta ivaa sha mma ilya nnderekiana na vaande yawo ndi lia nndevawara maako awo vvaute urukefi lwa Misiri. Fulya kitaare vandekuwara na mma yakwa, niń nań nta nndevataala ndi”, mfo Nndumi arera.

¹⁰”Na ii yyo mma nnderekiana na numba ya Isiraeli mikonu ilya ikansia: Vveekyaa mavavaso akwa makusaṛoń awo na yatisiṛa ifo mirimiń yawo. Nań vvaa Iṛuva wawo, nawo vavaa vandu vakwa.

¹¹Nawo vakikuloshanaa nndu na uroe ndi ana nndu na mwanawo eenumbuaa: Manya Nndumi! Amu woose vashimanyaa kuuka munnya wawo kumande nnini wawo.

¹²Fulya vvatiaa fikasha fawo na mareko awo nkiakumbuaa lingi ndi“. Mfo Nndumi arera.

¹³Ili anderera mma shiiya, andeaṛua ilya ya mbele ikava shikuu. Kake kindo kya mbooko kikawa kikuu na ikua nkufui na ireka.