Read MMA SHIYYA Barua ya Vaebrania 9 Bible Online

Barua ya Vaebrania 9 - MMA SHIYYA bible

Barua ya Vaebrania 9

¹Kyasia na akwaa ni mma yo ya mbele iiworee walio lwa iindia Iṛuva andu emwi na andu ayo asongori a kunu isangeń.

²Amu yema lindesongosio̱-wo liiworee kyeengu kya kari kiwore andu awore taa na mesa na mikate ya myorusie. Wwo eevaangwaa andu asongori.

³Na numa ya isulia lya kavili yema lia livaangwaa andu asongori a usongori.

⁴Ifo kiifo kiraa kya kirasio kya saabu na isanduku lya mma lifunikio̱ nsaabu taari toose. Na kari kayo iifo na nungu ya saabu iwore mana ilya na nsenge ulya wa Aron undebaṛa maa lingi na mawe alya a mma.

⁵Kake kwa ule yayo eeifoo Makerubimu meni tikisi anderuvia kifuniko kya isanduku lya mma. Kake alli toore mwaanya wa yongoya findo ifi kimwi kimwi ndi.

⁶Kyasia findo fi fikammaa isongosio̱ kuro, vakohani veeakaa yemiń lyo lya mbooko kyeeri kyoose veeṛundaa mashoṛa a irasia.

⁷Kake yemiń lyo lya kavili ni nkohani nnini eeakaa-fo mwaka woose limwi ye muni, ana eeakaa-fo atarie usao ndi lwa iniingia kiimba kyamwi na kiimba kya mareko a vandu.

⁸Mumuyo Nsongori amanyisa na kirero ki, sheeli shia ya yaaka andu asongori yanruuka ndi, ili yema lya mbele fikiseere isalala da.

⁹Lyo fikee fwana ya kyeeri iki kiifo alli. Kyeeri kyo misimbika na firasio fikee iniingio̱ Atamakii iniinga ulya muniingia nrima wa windi.

¹⁰Miṛuumwa ii ikulungie na mavavaso a ilya na inwa na ikusangya fingi na fingi mfindo fa wooṛo findevavaswa kumande kyeeri kya usongovisi lwa dede kishaa.

¹¹Kake Kristo ansha ave nrasia nnini wa fisha filya fishaa, kaira na yema lia inini fikee isongovisi likilie lia lindetanwa mmaako a vandu, amu findesongosio̱ vvandu va kunu isangeń ndi.

¹²Nae andeniingia usao lwa mburu ana lwa faashe ndi, kake ni usao lwamwi ye muni kaaka nalo andu a asongori a iṛuvewu kweni limwi katikooiya itaulwa fitawore mmando.

¹³Amu ilyo mbele ngyusao ta mburu na ta numbe na ifu ikoṛe lya siiki fiifwalio̱o̱ vandu vawore ukwe fivailise na ivauta ukwe lwa mivili.

¹⁴Kyasiań nkita se usao lwa Kristo ulya andekurambikia Iṛuva ye muni kwa finya ya Mumuyo wa miṛeṛe ave nsimbika utawore ilomi, lumusangye shengye ta mirima yanu na imulakanisa na mitanie innde ufu, amu mumakii iṛundia Iṛuva akee na muu?

¹⁵Na kiimba kya iki ave ulya andeteendie mma ilya shiiya, amu valya vakee vavaange vakooye diṅu yawo ikee ya miṛeṛe sheeli vanderekio̱. Amu ufu lwamwi lundeva, amu ataue nalo vandu mareko atanika kyeeri kya mma ilya shikuu.

¹⁶Amu kirekio kya diṅu andu kikai kyawara ufu lwa ulya arekia lurambulwa.

¹⁷Amu kirekio kyaawutio̱ na ufu, kake kyoore misendie kutu kwakooya ulya anderekia eefo na muu ndi.

¹⁸Kwa ikyo na akwaa ni mma ilya ya mbele indesongosio̱ luteefo usao ndi.

¹⁹Amu lia Mose andemaa iia vandu wo woose mavavaso, sheeli uvavaso lundevavasa, kawara usao lwa faashe na lwa mburu andu emwi na mura na mbaamba itondoṛie na kindo kya ifwalia kafwalia kitabu kilya kya mma kyeni na vandu woose

²⁰eenumbuaa: Ilu ni usao lwa mma Iṛuva amuvavasie.

²¹Na yema lia nalyo na fiya foose fa irasia kafifwalia usao nafo.

²²Na kufui fiya foose fikee iiliswa na usao kisumani na uvavaso. Amu kitaare usao lwairitwa liifo itio̱ mareko ndi.

²³Kyasia fwana tilya ta findo fikee iṛuvewu kyawara fiiliswa kuro, kake filya fa iṛuvewu feni kyawara fiiliswa na firasio fikee finuru kita ifo.

²⁴Amu Kristo andeaka andu asongori andetanwa na maako ndi, wwo fwana ya andu asongori a dede. Kake andeaka iṛuvewu kweni alolike alli kisanguń kya Iṛuva eetisalaliaa-wo ise.

²⁵Amu nta andeenda-fo, naamu akuniingie keengi na keengi ndi, sheeli nkohani nnini eeakaa andu alya asongori mwaka woose arie usao lutakee lwamwi.

²⁶Kwakooya nkuro kyeewwaraa avaviswa keengi kuuka isanga livevio̱. Kake alli andelolika limwi tubu ifurumień lya feeri aute-wo mareko eekuniingiaa ave kirasio.

²⁷Na sheeli kyawara vandu vafwe limwi na numa vaake uumisioń,

²⁸mfo kuro na Kristo ili andemaa irambikio̱ limwi akurike mareko a vandu veengi, alolikaa lingi lya kavili kwa iwo vavveree avakiṛe atakikwatarie mareko.