Read MMA SHIYYA Barua ya Yakobo 4 Bible Online

Barua ya Yakobo 4 - MMA SHIYYA bible

Barua ya Yakobo 4

¹Fira yukie kwi na myaandu ikee kwanu yukie kwi? Yukaa milangień yanu se yantaa ngabanu kari ka meeṛo anu?

²Muwore ilanga, kake nta kindo muwaraa. Mukee ikwiria iriso na ikuwaa, ana nta kindo mukooyaa. Mukee iṛuya fira na myaandu, kake nta kindo muloliaa, fulya mutakee itereva.

³Na akwaa mukee itereva, nta kindo muwariaa, fulya mukee itereva kikasha, amu muṛundie nafo milangie yanu.

⁴Ini vaaisi, mwishi se sheeli iwara ndoo na isanga ni iva kituva kya Iṛuva? Kyasia ulya akundaa iva ndoo ya isanga akwaṛua kava kituva kya Iṛuva.

⁵Ana mwishi sheeli mitisiṛie yarera kya ruu? Mumuyo ito akukaarisa kari keru alangie nnu ivingana na iira iriso.

⁶Kake uwoo lo atiaviaa ni unini lwilanyi. Kwa ikyo mitisiṛie irerie: ”Iṛuva aleaa valya vakuṅinisaa, kake valya vakunyiisaa avaaviaa uwoo“.

⁷Kyasia irikień Iṛuva. Leeń Satana nae amurishaa.

⁸Serikień Iṛuva, nae amuserikiaa ini. Sangyeń maako anu ini muwore mareko na iilisa ngoo tanu ini muwore mirima ivili.

⁹Manyiń ukiva lwanu na iṛiika na iiya. Seko yanu yaṛuke ive kiiyo na ifura lyanu live unaṛi.

¹⁰Kunyiiseń mbele ya Nndumi, llyo nae amuṅinisaa.

¹¹Manya mutakuṛiinge, vanavama. Ulya aṛiingaa mwanamae ana yumisia mwanamae akee iṛiinga mavavaso na yumisia mavavaso. Kake kwaumisia mavavaso kuvaa mwawutia mavavaso ndi, kake kwavva mwumisia mwanamaa.

¹²Muniingia mavavaso na mwumisia ni umwi da, yye amakii ikiṛa na ireta. Kukee i iwe kuumisiaa ungi?

¹³Kyasiań ini munumbuaa: Nnu ana ndesi teendaa muṛiń llive na ikaa-fo mwaka umwi na ikaba mbusha na iifumbuta

¹⁴muteeshi kilya kivaa ndesi. Muu wanu nto kiki? Amu ini muvakani na musu ulolikaa kyeeri kyaangu da, lia eni ukareka.

¹⁵Andu a firero fo fanu kiimuviaa ṅwana inumbua: Nndumi kankunda tivaa na muu na itana kuri ana kuri

¹⁶Kake alli mukee ikushomba na makusaṛo anu awore ukwishiki. Ikushomba lyoose lya mikae ii ni ikasha.

¹⁷Kyasia ulya eeshi filya fikee fisha fa itana kalea ifitana ito kwamwi ni ireka.