Read MMA SHIYYA Barua ya Yakobo 5 Bible Online

Barua ya Yakobo 5 - MMA SHIYYA bible

Barua ya Yakobo 5

¹Kyasia ini masimba, iyeń na iishiṛa kiimba kya ngyukiva tanu timusheaa.

²Masaa anu ambwaa na masaṛa anu alliwa mmakurukuru.

³Saabu tanu na fesa tanu tawwarwa nnguraa, na nguraa yayo imusutaa, nayo ilyaa mivili yanu sha muro. Alli mikonu ii ya ifurumia mwamiitiṛimu masaa.

⁴Manyiń maṛe a vaṛundi valya vandeilula nremiń tanu alya ini mundevaima akee ikaba kiṛoṛongyo na fiiyo fa valya vandeilula famaaka marwiń a Nndumi akee muni matoroto.

⁵Ini mwallya fisha foose fikee kunu isangeń na inyanyata masaa mukaboṅisa mirima yanu sha vandu vakuboṅisa mikonu ya isikya nyama.

⁶Ulya nsumani mwamuumisia na iwwaa, nae nta avingana neeni ndi.

⁷Kyasia vanavama, sisirień kumande Nndumi ashaa. Lleń te nndu nremi akee iverea filimu fa nrema tamwi eesisiriaa kiimba kyayo kumande fua ya kisie na ya mateeri ikabaa.

⁸Neeni sisirień kuro mwikaarisaa mirima yanu, amu nkufui Nndumi ashe.

⁹Vanavama, manya mutakuṅuṅurie, kaaṛa mutaumiso̱. Lleń muleta aselele mwaangoń.

¹⁰Vanavama, kulosheń na vaauya wo vanderera na irina lya Nndumi, kasa vandetuṛulwa na isisiria ngyukiveń tawo.

¹¹Lleń te tikee illa valya vasisiria sheeli wo wa ngoma. Mwamiita kya isisiria lya Yobu na sheeli Nndumi andeliinutia. Kumanyiseń nakyo sheeli Nndumi akee na wooṛoo na ililia iingi.

¹²Kake mmwasi wa foose vanavama, manya mutalye ikite nta na iṛuvewu ana nta na isanga ana ikite na kindo kingi kyoose. Kake mukanumbua: Ee, kive ee dede, mukanumbua: Wode, kive wode dede, kaaṛa mutawe uumisioń.

¹³Nndu wa kwanu kankooya mavavio atereve Iṛuva. Awore ifura aimbe ngyufina.

¹⁴Nndu wa kwanu kawa nroiye avaange vashili va siṛi, nawo vanterevie na imwaamba mafura na irina lya Nndumi.

¹⁵Na kiterewo kyo kya ikusura kikiṛaa ito aroiywa na Nndumi amwimboo. Kantana mareko atio̱o̱.

¹⁶Kyasia kurambuyeń mareko anu ini mu veni na mu veni na ikuterevia mukooye ikiṛwa. Kiterewo kya nndu nsumani lyelekaa deń kantereva na utomari.

¹⁷Elia eekee nndu wa mikae imwi neese. Nae katereva na utomari, amu fua itakabe. Na fua nta ikaba isangeń kyeeri kya myaka iraru na miiri irindaru.

¹⁸Katereva lingi na iṛuvewu likaotoṛa fua na isanga likamirisa nunda tayo.

¹⁹Vanavama, kwakooya nndu wa kwanu arekio̱ kilya kikee kya dede na nndu ungi kawwiiṛa,

²⁰manyiń sheeli ulya awiiṛa nrekwa eemwutaa shień ya ureti akiṛaa nrima wamwi na ufu na isikia wiingi lwa mareko.