Read MMA SHIYYA Barua ya Petiro ya mbele 3 Bible Online

Barua ya Petiro ya mbele 3 - MMA SHIYYA bible

Barua ya Petiro ya mbele 3

¹Mfo kuro neeni vaka, indień womi wanu, amu kwakooya veefo womi vatakusurie kirero vaomulwa mmitanie ya vaka vawo kitaare nkwa kirero

²veellaa weendo lwanu usha lukuwore na yeṛea Iṛuva.

³Ikwambika lyanu manya litave lya wooṛo tubu sha iimbika nrwe na yoka ana ikwambika na masaa a saabu na ikuvika miseto ya utoṛe.

⁴Kake ikwambika lyanu live lya usha lwa nrimiń lukee ikuwara tabu na uwoo na useli. Llyo ikwambika litasiaa, nalyo liwore uuru unini kisanguń kya Iṛuva.

⁵Amu nkuro vaka valya vasongori veekee ikwambika ilyo mbele valya veekusuriee Iṛuva vakaindia womi vawo,

⁶sha Sara ili andeindia Abraamu kawaanga nndumi. Neeni vaka mwawa vana vamwi mukantana finuru mutaeṛeeswa nta nkindo kimwi.

⁷Mfo kuro neeni womi, kaań na vaka vanu na uṛango na imanya mumanye sheeli wo wandu vatawore finya sha ini. Vaiteń mbele, fulya na akwaa wwo vandu valilio̱ ni Iṛuva na iva vawa vayadiṅu ya muu utakisiaa. Taniń kuro, amu mutaire singiri mulemwa itereva Iṛuva.

⁸Kyasia kirero kya ifurumia ni iki: Ini mu woose muve va mikae imwi na va ndewu shooṛoo na vawore witanu na va mililie na va utele.

⁹Mutataa kikasha na kikasha ana kirumu na kirumu, kake niingeń valya vamutuṛua mboṛa, fulya iva wwo mashoṛa anu mwa-vaangio̱, amu murwaa diṅu ya mboṛa ya Iṛuva.

¹⁰Fulya kikee kitisiṛe: ”Ulya afurie ikyesia muu wamwi na ilolia mikonu minuru aime ulumi lwamwi lwireraa fikasha na fiṛomu famwi fiireraa wongo.

¹¹Eewukane na fikasha atane finuru. Aṛuye unambwe alusoṛe.

¹²Fulya miso a Nndumi akee illa valya vesha na marwi amwi akee iita fiterewo fawo. Kake kisangu kya Nndumi kikee ilea valya vatanaa kikasha“.

¹³Yye i amukasheesaa, kwakooya mukee ikutomarisa kya filya fikee finuru?

¹⁴Na akwaa mwaliswa ukiva kiimba kya usha, ngoma ini. Muteeṛee yeṛeesa lyawo, nta mutakyangike.

¹⁵Kake indień Kristo Nndumi ngooń tanu na ikudeeṛia kudeeṛień yaṛua nndu woose amuuṛaa kya iverea lyanu mukusurani nalyo ifo mirimiń yanu.

¹⁶Kake mumwaṛue na uwoo na weṛei mwivaa na nrima nnuru, amu valya vakee iruma weendo lwanu usha lwa kwa Kristo vasutwa.

¹⁷Amu llyo ṅwana ituṛulwa kiimba kya itana fisha ikankooya yyo mifurie ya Iṛuva, nkisha kita itana fikasha.

¹⁸Amu nae Kristo afwe limwi tubu kiimba kya mareko eru ye akee nsumani kafwa kiimba kyeru ise varekwa, amu atirwaa kwa Iṛuva. Kawalwa kivvili, kake kawiiṛwa muuń kimumuyo.

¹⁹Amu kiimba kya ikyo andeendea mirima ilya ikee kifingioń kandevakwanisia nrumi shisha.

²⁰Nawo vvalya vandelea ikusura lia Iṛuva andesisiria na ulalamboo feeri fa Noe, lia isanduku lia lisongosio̱. Na kari kayo wandu vaangu da vandekia iwaleń lia, wandu nyaanyi.

²¹Mura to mfwana ya mura ulya ukee imukiṛa neeni alli, ni ubatiso. Nalo lukee imuuta kiṛinda kya wili ndi, kake lukee itereva Iṛuva nrima nnuru uwore uumu kwa finya ya iṛuka lya Yesu Kristo.

²²Nae akee uko usha lwa Iṛuva, ili amaa iroswa iṛuvewu. Mfo eerikio̱ wamalaika na vanini na va finya vakee kwa si yamwi.