Read MMA SHIYYA Barua ya Petiro ya mbele 4 Bible Online

Barua ya Petiro ya mbele 4 - MMA SHIYYA bible

Barua ya Petiro ya mbele 4

¹Kyasia ili Kristo atuṛulwa wili wamwi, na akwaa ni ini mukufingie mikae yo muve kimwi nae. Amu ito andetuṛulwa wili allakana na mareko.

²Kuuka alli manya mutaengeṛie ilatia milangie ya kivandu, kake latień mifurie ya Iṛuva feeri fanu fikiseere fa ikaa kunu isangeń.

³Amu kyeeri kiikee kyaasha kilya mundeṛundia nakyo findo filya vayavaṛumu vafikundie mwikuwaraa na waaisi na milangie na unangwa na imutu lya ulafu na finangisa na iindia maṛuva a wongo.

⁴Nkyo kivaṛiikisie alli, ili mwalea yuiya ngyukasha ti toose andu emwi nawo. Kwa ikyo vakee imuruma.

⁵Kake wo va-uṛwaa ni ulya akudeeṛie yumisia valya veefo na muu na valya vamfwe.

⁶Amu kwa kiimba kyo na akwaa ni iwo vamfwe vandekwa-nisio̱ nrumi shisha, amu vaumisio̱ wili kwa shia ya kivandu, kake vakaa na muu kwa Mumuyo kwa shia ya Iṛuva.

⁷Kake ifurumia lya findo foose lyansha kufui. Kyasia veń na uṛango mukaa kya umbuura, amu mumakii itereva.

⁸Na kita foose kutomariseń ikundana, fulya ikunda lisikiaa fikasha fiingi.

⁹Kuwarień kyeń kwanu ini mu veni na mu veni liteefo iṅuṅura.

¹⁰Rundianiń ini mu veni na mu veni nndu woose eeṛundaa na kilya amaavio̱. Kuro llyo muvaa valla va illa ngyuavi ta uwoo lwa Iṛuva tikee ta mikae miingi.

¹¹Nndu karera arere kilya kisumani na Iṛuva. Nndu kaṛunda aṛunde sha nndu aniingio̱ mfinya ya Iṛuva, amu Iṛuva eetikiswa na ifi foose kari ka Kristo Yesu. Unini llwamwi na imakii miṛeṛe na miṛeṛe! Amen.

¹²Muṛe vakunde, manya mutaṛiikiswa mmatuṛulo amuwoya na imuvavisa sha muro, sheeli mfindo mutamakii ifimanya, mfindo fa imwelelia da.

¹³Fureń! Amu mukantaṅaṛia matuṛulo na Kristo mufuraa kya mmwasi na ikaba mindoṛo, ili unini lwamwi lulolikaa.

¹⁴Muvaa va ngoma, kwakooya mwarumwa kiimba kya irina lya Kristo, fulya Mumuyo wa unini nto wa Iṛuva amukaye.

¹⁵Manya nndu kwanu ataliswa ukiva, fulya akee wwaa ana inini ana mutana fikasha ana ndiingi.

¹⁶Kake nndu kaliswa ukiva akee nkristo manya atasuke, kake aṅinise Iṛuva na irina lyo.

¹⁷Amu kyeeri kyamfika kya ibookia yumisia numba ya Iṛuva. Kake kwakooya kyabookia kweru ise, ifurumia lya valya vatairikie nrumi shisha ya Iṛuva fivaa are?

¹⁸Na kwakooya ulya akee nsumani awore ngatara akie, a ulya atakusurie Iṛuva akee nrekwa nkwi akaa?

¹⁹Kyasia valya vakee ituṛulwa kwa mifurie ya Iṛuva varambikie mirima yawo muvatana uu akee wa usuro veetanaa kilya kikee kisha.