Read MMA SHIYYA Barua ya Petiro ya kavili 1 Bible Online

Barua ya Petiro ya kavili 1 - MMA SHIYYA bible

Barua ya Petiro ya kavili 1

¹Niń Simon Petiro nkee iketi lya Yesu Kristo na nrumi wamwi. Neesana valya vawore ikusura limwi neese likee na uuru llia tindeniingwa ni Iṛuva weru muni usumani na nkiṛa Yesu Kristo.

²Uwoo lumwengeṛio̱ na unambwe mwammaa imanya Iṛuva na Nndumi weru Yesu.

³Imakii lyamwi lya ki-Iṛuva lyantiniinga filya foose fawara iva na muu wa dede na usha lwa dede liitimanyisaa ulya andetivaanga na unini lwamwi na usha lwamwi ye muni.

⁴Kwa shia ii antiavia firekio filya finini fa uuru, amu mukooye itańaṛia mikae ya ki-Iṛuva mwikiṛwaa na ureti lukee isangeń likee ishilio ni milangie.

⁵Na kuro nkyo kiimba ikyo mundekwatara na finya yanu yoose, amu ikusura lyanu linnde usha lwa nrima na usha lo lwanu lunnde imanya.

⁶Na imanya lyanu linnde kiṛengo na kiṛengo kyanu kinnde isisiria na isisiria lyanu linnde usongovisi.

⁷Na usongovisi lwanu lunnde ikundana na vanavamae na ikundana na vanavamae linnde ikunda vandu woose.

⁸Amu kwakooya findo ifo fikee kwanu na ifumbuka, fimwelekaa ini mutave varoko ana mutatuṛe nunda ta imanya Nndumi weru Yesu Kristo.

⁹Amu ulya atawore ifo ni ndoń, nta amakii ilolia findo fikee kwaasha ndi, ammaa irekio kyeeri andesangywa mareko amwi makuu.

¹⁰Kiimba kya ikyo vanavama, kutomariseń kya mmwasi iseṛeesa kyumu ivaangwa lyanu na isaulwa lyanu, amu itana kuro nta mubaaywaa kutu ndi.

¹¹Amu kuro muniingwaa mboṛa ya miniingie ya yaka umangiń lwa miṛeṛe lwa Nndumi weru na nkiṛa weru Yesu Kristo.

¹²Kwa ikyo nkudeeṛie imukumburusa ifo kyeeri kyoose, lla kasa mufiishi na ikaarisio ufundoń lwa dede mukee nalo.

¹³Nań llolie kisumani imwanta na imukumburusa, ili nkikee na muu wakwa.

¹⁴Fulya niishi iinutwa lyakwa lishaa kibashuka, sheeli na Nndumi weru Yesu Kristo andeshimanyisa.

¹⁵Kake nkutomarisaa nnu, amu mumakii ikumbua findo ifo kyeeri kyose, ili namaa iinutwa.

¹⁶Amu tallatia mboni ta uṛango lwa vandu ili tindemukwanisia mboni ta finya ya Nndumi weru Yesu Kristo na mboni ta isha lyamwi lya kavili ndi, kake talolia unini lwamwi na miso eru meni.

¹⁷Fulya anniingwa unini na langa ni Iṛuva Nde, lia ununga lua lunshea lukee lwa Iṛuva muni unini loose lukarera: ”Uu mMwana wakwa ninkundie ashisenye“.

¹⁸Neese ti veni teeta ununga lua lushe luuka iṛuvewu, ili tiikee andu emwi nae kulya uṛoń lua usongori.

¹⁹Kiimba kya iki tiwore kirero kya vaauya na finya nnu. Na ini mukankilla mwantana kinuru, amu llanga ya imulikia andu a llema kumande kukyaa na nyinyiri ya ngama ikwimboo ngooń tanu.

²⁰Manyiń nnu sheeli lwifo wauya lukee mitisiṛień lumakii yaṛulwa mmifurie ya kivandu yo meni ndi.

²¹Amu kuuka mbooko nta wauya lwamaauywa mmifurie ilya nndu afurie ndi kita vandu varume ni Iṛuva wwo vanderera veeitikwaa mMumuyo Nsongori.