Read MMA SHIYYA Barua ya Petiro ya kavili 2 Bible Online

Barua ya Petiro ya kavili 2 - MMA SHIYYA bible

Barua ya Petiro ya kavili 2

¹Kake vandekwimboo-fo vaauya fisuku va wongo kari ka vandu va Isiraeli, sheeli na ifo kwanu valosha va wongo vashaa nafo veeataa-fo miloshie irie mitambwe ya ireta vandu. Vakanaa na akwaa ni Nndumi ulya andevataua na ikwendie ureti lwa ree wo veni. Na veengi valatiaa ngyukasha tawo. Na kiimba kyawo shia ya udede irumwaa.

³Ili vawarwa ni ilanga masaa, vakukooiyaa mbusha kwanu na firero fa imulemba. Kake uumisio lwawo lukee udeeṛie kuuka mbele ana ivareta lyawo lisindaa ndi.

⁴Amu na vamalaika valya vanderekio̱ Iṛuva andevatia ndi, kake kavaeeṛa andu a si kavarwaa fifingioń fa llema varingwa-fo kumande uumisio lwawo lushaa.

⁵Ana nta andetia-fo isanga lia lya mbele ndi. Kake nNoe nrumi wa usumani na vandu vamwi vakee nyaanyi andu emwi andevakiṛa ilyo andeendee vandu va isanga iwala lia, fulya kitaare vandemweṛea.

⁶Na miṛi ilya ya Sodomo na Gomora kaireta deń eeikoṛaa na muro kaiaṛua ivie vandu valya valeaa yeṛea Iṛuva myorusie.

⁷Kakiṛa Loti ulya eekee nsumani andenariswa nnu wweendo lwa vakasha wo.

⁸Amu nndu uu nsumani ili akaa kari kawo kalla mitanie yawo itawore wikimbi na iita mikonu yoose kakuvavisa nrima wamwi uwore usumani.

⁹Nndumi eeshi ikiṛa vasumani nreyoń na iwo vatasumani eeshi ivafisia nkonu wa uumisio vakabwa.

¹⁰Na mmwasi vvalya valatiaa mifurie ya wili veekuwaraa na milangie ya waaisi vakaila ushili lwa Iṛuva.

¹¹Wo wandu va umbafu na vafika nrima, nta vareremaa ili veerumaa vayafinya va iṛuvewu ndi. Na akwaa vvamalaika vakee na imakii na finya kya mmwasi nta vakaṛia innde uṛiingi lwa ivaruma mbele ya Nndumi ndi.

¹²Kake iwo vavakie mafisi atawore uṛango arawa-fo, amu awarwa na iretwa. Varumaa ifi vatafiishi, wo vakuretiaa wo veni ifo uretiń lwawo.

¹³Vakooyaa maṛe asumani na ukasha lwawo. Unangwa lwa nsanyiń ni ifura lyawo fitawore kiṛengo ifo mamutuń awo.

¹⁴Ili vakee ilya shoonga neeni, vawore miso eeshule waaisi vataimuya itana mareko. Varetaa mirima ya vatanyaṛi, vawore ngoo tiishivisio ilanga, vakee vana vadenge.

¹⁵Vakatia shia shisaaṛi vakareka veesoṛaa shia ya Bileamu mwana wa Beori andelanga maṛe a ukasha.

¹⁶Kake akandarwa kiimba kya ukasha lwamwi. Nshungu uteeshi irera underera na ununga lwa kinndu wimaa ulya eekee mwauya atatane kitandetanwa.

¹⁷Iva vavakie ngyusokwa titawore mura na maṛumbe akee ivivitwa mmburaato. Kilya wo vandefisio̱ wwuu lwa llema.

¹⁸Amu wo vareraa firero finini fitawore misendie veekangiaa na milangie yawo itawore kiṛengo vandu valya vandebooka iiwukana na valya vakee iṛua ukasheń.

¹⁹Vakee ivarekia yotoṛwa, nawo veni mmasinga a ureti. Amu nndu kavvingwa ni nndu avaa iketi lya nndu to avvinga.

²⁰Amu valya vammaa irisha kiṛinda kya isanga kiimba kya imanya Nndumi na Nkiṛa Yesu Kristo kwakooya vareywa nkyo lingi na ivingwa, mikae yawo ya ifurumia yawa mikasha kita ya mbele.

²¹Amu kiivaa ńwana kwawo, kifo kitaare veemmanyaa shia ya usumani kita iimanya na itiawo lingi ivavaso lia isongori veeniingio̱o̱.

²²Kyavva kwawo sha sumu ilya ya dede sheeli yarera: ”Ikite lyuiyaa ureeko lwayo“, na lingi: ”Nguve yansangywa ikwaruvaa lingi mabwashiń“.