Read MMA SHIYYA Barua ya Petiro ya kavili 3 Bible Online

Barua ya Petiro ya kavili 3 - MMA SHIYYA bible

Barua ya Petiro ya kavili 3

¹Muṛe vakunde, barua ii namutisiṛia ini yya kavili. Na barua iti ivili nkee yanta makusaṛo anu manuru niimukumburusaa

²mukumbue firero filya farerwa mbele vvaauya fisuku valya vasongori na ivavaso lia lya Nndumi na Nkiṛa lindenndwa vvarumi vanu.

³Lya mbele manyiń kirero ki: Mikonu ya ifurumia vakwimboo vateenda vawore fiteendo fikasha veengeṛiaa isoṛa milangie yawo veni

⁴veenumbuaa: Nkwi kirekio kilya kya isha lyamwi kikai? Amu kuuka ilyo vakuuku vandeenda iinutwa foose fikee fa mikae iyo da kuuka mbooko sheeli fatanwa.

⁵Na iwo ili vakee inumbua kuro vatuṛa imanya sheeli: Iṛuvewu liifoo kuuka mbele na isanga da, fiifoo fuuka mureń kwa kirero kya Iṛuva.

⁶Na mura uu nto undereta isanga lia lya mbele lia lindeimulwamulwa ni iwala lia.

⁷Kake iṛuvewu lya alli na isanga li fifisio̱ muro kwa kirero kilya kya Iṛuva fiiringwaa kumande nkonu wa uumisio wa ireta vandu valya vandelea Iṛuva.

⁸Kake ini vanavama vakunde manya mutarekio̱ kirero ki sheeli: Kwa Nndumi nkonu umwi uvakani na myaka kiku, lingi na myaka kiku ivakani na nkonu umwi“.

⁹Nndumi asindaa yawutia kirero kilya kirekie ndi, sheeli vengi vakee ikusaṛa sheeli ansinda. Kake kiimba kyanu asisiriaa, fulya afurie nta nndu areke ndi, kake woose vailashike vakurre.

¹⁰Kake nkonu wa Nndumi ushaa kibashuka sha inini likee isha na kio. Llyo iṛuvewu liveṛukaa na ibaṛangaka inini, na findo filya fikee fa kimia fimuṛusoo firongore, na isanga limuṛusoo andu emwi na filya foose findetanwa wandu.

¹¹Kyasiań findo fo fimamiaa foose, a weendo lwanu naare mulutanaa, amu luve usongori mwikusuraa Iṛuva?

¹²Lingi muveree nkonu wa Nndumi umushee, amu mumakii inrishia. Amu nkyo kiimba iṛuvewu liveṛukaa liimuṛusoo mmuro na filya fiifo kuuka mbooko feetwaa mmuro.

¹³Kake ise tiveree iṛuvewu iiya na isanga iiya fikee na usumani, sheeli andetirekia.

¹⁴Kwa ikyo, vakunde, ili mukee iverea ifi, kuumiseń amu mukooywa unambweń mutaare ilomi ana usutu mbele yamwi.

¹⁵Neeni taaleń isisiria lya Nndumi weru sheeli ni ikiṛwa, sheeli na mwanamae weru Paulo andemutisiṛia kwa uṛango lo andeniingwa.

¹⁶Mfo kuro eekee itisiṛa oarueń tamwi toose eereraa findo fo. Kake kari ka barua ito fiifo firero fikee fuumu imanya misendie. Mfo vandu vatakee valoshe ana vatakee vakaarise vafifulua, sheeli vafuluaa na mitisiṛie ingi na ikureta veni.

¹⁷Kyasia ini vakunde mukambooka imanya ifo kulleń neeni, amu mutaomuywa shia ta ureti lwa iwo vatakee iikimbika na ikasheesa finya ya ikusura lyanu.

¹⁸Kake engeṛień ińina mwiavioo uwoo, lingi mwimanyaa Nndumi weru na Nkiṛa weru Yesu Kristo. Unini llwamwi alli na kumande nkonu wa miṛeṛe!