Read MMA SHIYYA Barua ya Yohane ya mbele 2 Bible Online

Barua ya Yohane ya mbele 2 - MMA SHIYYA bible

Barua ya Yohane ya mbele 2

¹Vana vakwa vakunde, namutisiṛia ifi, amu mutarekwa. Kake kwakooya eefo anderekwa, toore mutisalalia kwa Nde, yye Yesu Kristo akee wa usumani.

²Nae yye kirasio kya mareko eru, ana nta nkya mareko eru da ndi, kake na kya mareko a va isangeń lyoose.

³Na kunu mfo timanyiaa sheeli tammanya Iṛuva, kwakooya tikee iwara mavavaso amwi.

⁴Nndu kanumbua: Nammumanya, na mavavaso amwi ataawore, nndu to wwa wongo na udede lwifo kari kamwi ndi.

⁵Kake nndu kawwara kirero kyamwi, kwamwi ye ikunda lya Iṛuva lyamaawukia dede. Kuro llyo timanyaa sheeli tikee nae.

⁶Nndu kanumbua sheeli akaa nae, ito kyawara aende weendo lua Yesu eekee yenda.

⁷Vakunde, ivavaso li namutisiṛia ni iiya ndi, kake ni ivavaso lia lya mbele mwikee nalyo kuuka mbooko. Na ivavaso lyo lya mbele nkirero kilya mwankiita.

⁸Kake lingi namutisiṛia ivavaso iiya, lyo likee lya dede kwa Kristo na kwanu ini sheeli: Llema ukee iira na langa ya dede yammaa imulika.

⁹Nndu kanumbua akee langeń, nae kasua mwanamae, ito akee llemiń na kumande alli.

¹⁰Ulya akundie mwanamae ava mukaa langeń ana aṛaaṛaa ndi.

¹¹Kake ulya asule mwanamae, ye akee llemiń, nae akee yendaenda ifo llemiń ana eeshi kundo akee yenda ndi, amu llema wammuwaa miso.

¹²Nkee imutisiṛia ini vana vakwa, fulya mwantio mareko kiimba kya irina lyamwi.

¹³Nkee imutisiṛia ini mukee vaande, fulya mwammanya ito eefo kuuka mbooko. Nkee imutisiṛia ini vakoo, fulya mwawinga Nkasha ulya.

¹⁴Namutisiṛia ini vana, fulya mwishi Nde. Namutisiṛia ini mukee vaande, fulya mwishi ito eefo kuuka mbooko. Namutisiṛia ini mukee vakoo, fulya mukee na finya na kirero kya Iṛuva kikee neeni, neeni mwawinga Nkasha ulya.

¹⁵Manya mutafure isanga li ana filya fikee isangeń. Nndu kakunda isanga li, ikunda lya ikunda Nde liifo kari kamwi ndi.

¹⁶Fulya foose fikee isangeń sha ilanga lya wili na ilanga lya miso na ikushomba na masaa fo fuukie kwa Nde ndi, mfa kunu isangeń tubu.

¹⁷Kake isanga lisiaa andu emwi na ilanga lyayo. Kake ulya ava mutana kilya Iṛuva afurie akaa miṛeṛe.

¹⁸Muṛe vana, alli nsaa ya ifurumia. Mwamiita sheeli mwima Kristo ashaa. Na alli vammaa ivafo veengi vakee iima Kristo. Mfo tammanyia sheeli saa ya ifurumia iifo.

¹⁹Vamuuka kweru ise, kake veekee va kweru ndi. Amu kikooye veekee va kweru, veekaa andu emwi neese. Kake kindeva kuro, amu vamanyike na baa sheeli nta woose wa kweru, ndi.

²⁰Neeni mwamaambwa mafura ni ulya akee nsongori mukamanya foose.

²¹Nammutisiṛia ini, fulya muteeshi filya fikee fa dede ndi, kake mfulya mweemfimanyaa, lingi mwammanya sheeli iifo wongo yukaa udedeń ndi.

²²Lingi ni i akee wa wongo kitaare ni ito akanaa Yesu akee Kristo? Ito yye mwima Kristo ulya akanaa Nde na Mwana.

²³Ulya woose akanaa Mwana awore Nde ndi. Ulya arambuaa Mwana awore na Nde.

²⁴Kilya mwamiita kuuka mbooko kyawara kikaa neeni kyeeri kyoose. Kwakooya kilya mwamiita kuuka mbooko kikaa neeni, ini neeni mulunganaa na Mwana na Nde.

²⁵Na iki nkyo kirekio kilya Yesu muni andetirekia, nato mmuu wa miṛeṛe.

²⁶Ifi namutisiṛia kiimba kya iwo vafurie imureta.

²⁷Neeni yaambwa li mwawaria lyukie kwamwi llyo likaa neeni matika woose. Neeni muuṛi mifundie ingi ndi. Myaambie yamwi ikee imulosha foose, nayo ikee ya dede, wwongo ndi. Kyasia kaań nae, sheeli mundeloshwa.

²⁸Na alli, vana vakwa, kaań mukulunganise nae, amu ili alolikaa tive na ifura, titasutwa ili auyaa.

²⁹Mukamanya sheeli Iṛuva wwa usumani, mumanyaa sheeli ulya woose atanaa kisumani amiiriwa yye.