Read MMA SHIYYA Barua ya Yohane ya mbele 3 Bible Online

Barua ya Yohane ya mbele 3 - MMA SHIYYA bible

Barua ya Yohane ya mbele 3

¹Lleń ikunda lia Nde antikunda nalyo, neese tivaangwaa vana va Iṛuva, neese tikee vana vamwi. Nkyo kiimba isanga litiishi ise ndi, fulya liteeshi Iṛuva.

²Muṛe vakunde vakwa, alli tikee vana va Iṛuva, kake kilya kitiviaa numa kyallolika ndi. Kake kimwi tiishi: Ili Kristo alolikaa, tivakanaa nae, fulya tiloliaa mikae yamwi sheeli akee.

³Ulya woose awore ikusurana li nae ito akwilisaa nrima sheeli Yesu akee mwilise.

⁴Nndu woose atanaa fikasha awore usutu, itana fikasha ni usutu.

⁵Mwishi sheeli Yesu anshe yuta vandu ngyukasheń, nae awore ngyukasha kari kamwi ndi.

⁶Nndu woose alungani nae atanaa fikasha ndi. Ulya woose atanaa fikasha ammulolia ndi, nta ammumanya ndi.

⁷Vana vakwa, manya nndu atamulembe. Ulya atanaa kisumani awore usumani sheeli nae akee nsumani.

⁸Ulya atanaa mareko wwa Satana, fulya Satana atanaa mareko kuuka mbooko. Nkyo kiimba Mwana wa Iṛuva kalolika, amu afukye mashoṛa a Satana.

⁹Nndu woose amiiriwa ni Iṛuva atanaa mareko ndi, amu mbeu yamwi ikaa kari kamwi. Kiimba kya ikyo amakii itana kikasha ndi, fulya amiiriwa ni Iṛuva.

¹⁰Io llyo vakee ilolika valya vakee vana va Iṛuva na valya vakee vana va Satana: Ulya woose atatanaa fa usumani aukie kwa Iṛuva ndi, na ulya atakundie mwanamae mfo kuro da.

¹¹Amu ii yyo nrumi mweemiitaa kuuka mbooko sheeli: Tikundane ti veni na ti veni,

¹²kaaṛa titave sha Kain ulya awarwa nSatana kawaa mwanawo. Nae awwaa kwa kiimba ki? Mfulya mitanie yamwi iikee mikasha, kake ya mwanawo iikee ya usumani.

¹³Mutatińwa vanavamae vakwa kwakooya isanga limusule.

¹⁴Ise tiishi sheeli tamuuka ufuń tikasamia muuń, fulya tikundie vanavamae. Ulya atawore ikunda akaa ufuń.

¹⁵Ulya woose asule mwanamae wamwi ni wwaa, neeni mwishi sheeli eefo wwaa awore muu utasiaa ukaa kari kamwi ndi.

¹⁶Yesu antirekia muu wamwi tikamanya yyo mikae ya ikunda lya dede. Neese kyatiwara ireka muu kiimba kya vanavamae veru.

¹⁷Kake kwakooya nndu awore usimba lwa isangeń ili kalolia mwanamae wamwi akee nkiva kamwumisia ndewu, akundie are Iṛuva?

¹⁸Vana vakwa, titakundane na firero nta na ulumi, kake tikundane na mitanie na udede.

¹⁹Io timanyaa sheeli ise tikee va dede, lingi kuro tiwolisaa mirima yeru mbele yamwi ye.

²⁰Amu mirima yeru ikantivisilia kyasia Iṛuva ni nnini kita mirima yeru, nae eeshi foose.

²¹Muṛe vakunde, mirima yeru ikara itativisilia, ise tiselele na ifura kisanguń kya Iṛuva.

²²Na kyoose tinterevaa tiwariaa kwamwi, fulya tikuwore na mavavaso amwi na itana kilya kinsenye.

²³Na ivavaso lyamwi llyo ili: Tikusurane na irina lya Mwana wamwi Yesu Kristo na ikundana ise ti veni na ti veni, sheeli ye antivavasa.

²⁴Na ulya awaraa mavavaso amwi akaa nae ye, nae akaa na ito. Na kuro timanyaa sheeli akee neese tikawa na Mumuyo ulya atiniingie ise.