Read MMA SHIYYA Barua ya Yohane ya mbele 4 Bible Online

Barua ya Yohane ya mbele 4 - MMA SHIYYA bible

Barua ya Yohane ya mbele 4

¹Muṛe vakunde, manya mutairikie mumuyo woose, kake elelień mbele mimuyo akwaa imilie kwa Iṛuva. Amu vaauya veengi va wongo vansha isangeń.

²Na kuro llyo mumanyaa Mumuyo wa Iṛuva: mumuyo woose arambuaa sheeli Yesu Kristo ansha kwa wili wa kivandu, ito amilie kwa Iṛuva.

³Na mumuyo woose atarambuaa sheeri Kristo ansha kari ka wili, ito amilie kwa Iṛuva ndi. Nto mumuyo wa mwima Kristo. Kyamwi mwamiita sheeli akee isha. Na akwaa na alli ammaa isha isangeń.

⁴Vana vakwa, ini mumilie kwa Iṛuva, neeni mukamaa ivinga vaauya valya va wongo. Amu ito akaa neeni ni nnini kita ito akee kunu isangeń.

⁵Valya vamilie isangeń, kwa ikyo vakee irera kya kiisanga, na va isanga vakavaita.

⁶Ise timilie kwa Iṛuva. Na ulya ammanya Iṛuva akee itiita ise. Kake ulya atamilie kwa Iṛuva atiitaa ise ndi. Ikyo nkyo kyatiniinga imanya Mumuyo wa udede na mumuyo wa ulembi.

⁷Muṛe vakunde, tikundane ise ti veni na ti veni, fulya ikundana limilie kwa Iṛuva. Na ulya awore ikundana amiiriwa ni Iṛuva, nae kamanya Iṛuva.

⁸Ulya atawore ikundana eeshi Iṛuva ndi, fulya Iṛuva mmukunda.

⁹Ikunda lya Iṛuva lyammanyika kweru, ili anderuma Mwana wamwi ngitani isangeń, amu tiniingwa muu yye.

¹⁰Mikae ya ikunda yyo ii: Nta ni ise tankunda Iṛuva ndi, kake yye antikunda ise karuma Mwana wamwi ave kirasio kya mareko eru.

¹¹Muṛe vakunde, ili Iṛuva antikunda ise kuri, kyatiwara neese tikundane ti veni na ti veni.

¹²Nta eefo nndu allolia Iṛuva ndi. Kake kwakooya tikundanaa ti veni na ti veni, Iṛuva akaa kweru na ikunda 'yamwi lisumanikaa kari keru.

¹³Kuro tamanya sheeli tikee nae, nae akee neese, fulya antiavia Mumuyo wamwi.

¹⁴Neese tallolia na miso eru na irambua sheeli Nde anderuma Mwana ave nkiṛa wa isanga.

¹⁵Ulya woose arambuaa sheeli Yesu mMwana wa Iṛuva, Ilyo Iṛuva akaa na ito, nae akaa na Iṛuva.

¹⁶Neese tammanya ikunda lya Iṛuva lya itikunda ise tikalikusura. Iṛuva mmukunda, na nndu akaa na ikunda ito akaa na Iṛuva na Iṛuva akaa nae.

¹⁷Ikunda lya dede lisumanikie kweru, kwakooya tikee iverea nkonu wa uumisio na ifura. Fulya tikee kimwi na Yesu akee ifo iṛuvewu neese tikee kunu isangeń.

¹⁸Ikunda liwore weṛei ndi, kake ikunda lisumani Ukee yumbuta weṛei, fulya weṛei luwore mavavio. U ya awore weṛei asumanikie ikundeń ndi.

¹⁹Ise toore ikunda, fulya ye abooka itikunda.

²⁰Kwakooya nndu anumbua: Nkundie Iṛuva kasua mwanamae wamwi, ito ni nndu wa wongo. Fulya nndu atakundie mwanamae wamwi allolie, akundaa are Iṛuva atallolie?

²¹Na ivavaso li tanniingwa yye: Nndu akundie Iṛuva dede akunde na mwanamae wamwi.