Read MMA SHIYYA Barua ya Yohane ya mbele 5 Bible Online

Barua ya Yohane ya mbele 5 - MMA SHIYYA bible

Barua ya Yohane ya mbele 5

¹Nndu woose akusurie sheeli Yesu akee Kristo, ito amiiriwa ni Iṛuva. Na nndu woose akundie ulya andemwira, akundaa na ulya andeiriwa yye, ni Iṛuva.

²Na shia ya imanya sheeli tikundie vana va Iṛuva yyo ii: Ni ikunda Iṛuva na ita ta filya ativavasie.

³Amu ikunda Iṛuva ni iwara mavavaso amwi. Na mavavaso amwi mmeemeri ndi.

⁴Fulya nndu woose amiiriwa ni Iṛuva avingaa isanga. Na kindo kya ivinga isanga ni ikusura lyeru.

⁵A ulya avingaa isanga yye i? Ni ulya tubu akusurie sheeli Yesu mMwana wa Iṛuva.

⁶Yesu Kristo yye uu andesha eetivaangiaa mura (wa itisangya) na kwa ikyo kaniingia usao (lwamwi). Andesha ativaangie mura (wa itiaṛutia Iṛuva) da ndi, kake na akwaa ni usao lwamwi kaluniingia kwa ikyo. Na Mumuyo Nsongori nto akee inrambua, amu Mumuyo akee udede.

⁷Kyasia fiifo firaru fikee irambua ifo:

⁸mMumuyo na mura na usao. Na ifi firaru fiwarani.

⁹Kwakooya teerikia irambua lya vandu, kyasia irambua lya Iṛuva ni inini kita. Amu irambua lya Iṛuva llia anderambua nalyo Mwana wamwi ye muni.

¹⁰Ulya akusuraa Mwana wa Iṛuva, ito akuwore na irambua lyo. Ulya ara atakusura Iṛuva ammwaṛua wa wongo, fulya kitaare andekusura irambua lia Iṛuva anderambua nalyo Mwana wamwi ye muni.

¹¹Na mirambuye yyo ii sheeli: Iṛuva antiniinga muu wa miṛeṛe, nato mmuu Mwana wamwi auwore.

¹²Ulya akuwore na Mwana awore muu ito. Ulya atakuwore na Mwana wa Iṛuva awore muu uu ndi.

¹³Ifi namutisiṛia ini mukusurie irina lya Mwana wa Iṛuva, amu mumanyi sheeli muwore muu wa miṛeṛe.

¹⁴Na kilya kikee itiniinga nrima mwarutu wa inshea nkyo iki sheeli: Kwakooya tinterevaa kisumani na mifurie yamwi, atiitaa.

¹⁵Na kwakooya tiishi sheeli atiitaa kya foose tinterevaa, tamanya sheeli fiterewo filya tammutereva tammaa iniingwa.

¹⁶Nndu kalolia mwanamae wamwi eetanaa ireko litannde ufu, anterevie, llyo Iṛuva anniingaa muu andu emwi na varekio̱ vengi vaaroe vanrekio̱ kitaare nkya ufu. Liifo ireko linnde ufu, io nnumbuaa nndu aterevie ndi.

¹⁷Kilya kitakee kya usumani ni ireko. Kake liifo ireko litannde ufu.

¹⁸Tiishi sheeli nndu woose andeiriwa ni Iṛuva atanaa fikasha ndi. Kake ulya amiiriwa ni Iṛuva akuringaa, amu Nkasha ulya atambaani.

¹⁹Tiishi sheeli ise timilie kwa Iṛuva, na isanga lyoose likee kwa si ya Nkasha ulya.

²⁰Neese tiishi sheeli Mwana wa Iṛuva ammaa isha katiniinga uṛango timanye ito akee muni udede. Neese tilungani na ito muni udede, yye Mwana wamwi Yesu Kristo. Uu yye akee Iṛuva muni udede na muu wa miṛeṛe.

²¹Vana vakwa, iwukaniń na maṛuva a wongo!