Read MMA SHIYYA Barua ya Yohane ya kararu 1 Bible Online

Barua ya Yohane ya kararu 1 - MMA SHIYYA bible

Barua ya Yohane ya kararu 1

¹Niń nsuṛi nakwisana iwe nkunde wakwa Gayo, nkukundie na nrima.

²Nkunde wakwa, nkee ikuterevia kushiiywa mfindo foose na iva na finya, sheeli na nrima wafo ukee na usha.

³Amu nndekyesio̱ nnu, ili vanavamae vandesha na irambua udede lwafo, sheeli kukee yenda na ikuwara na udede lwa kwa Iṛuva.

⁴Nta noore ukyesi unini kita ilu lwa iita sheeli vana vakwa vakee yenda weendo lukuwore na udede lo ndi.

⁵Nkunde wakwa, ishoṛa lyo llya usongovisi kukee iṛundia vanavamae na akwaa vvalya vakee veeni.

⁶Wo vanderambua ikunda lyafo mbele ya siṛi. Nawe kutanaa kisha, ili kuvaelekiaa na ivaṛaṛata sheeli kisumani na kwa Iṛuva.

⁷Amu vandeuka kyeń kiimba kya irina lyamwi nta iwaria kindo kwa vayavaṛumu.

⁸Kyasia kyantiwara ise iwaria vandu sha iwo, amu timanyike tikee iṛundia udede andu emwi nawo.

⁹Nndetisiṛia siṛi barua, kake Diotirefe alangie iva wa mbele kari kawo atiwaria ndi.

¹⁰Kwa ikyo ili nshaa ninkumburusaa mitanie yamwi ilya atana eetireraa na firero fa ukasha. Ana nta fimfile ndi, ana nta ye muni awariaa vanavamae ndi. Na valya vafurie ivawaria avaimaa na ivauta siṛiń.

¹¹Nkunde wakwa, manya ilatia fa ukasha, kake latia fa usha. Ulya akee itana fisha amilie kwa Iṛuva. Kake ulya atanaa fikasha nta allolia Iṛuva ndi.

¹²Demetirio ni nrambue wandu woose andu emwi na udede lua weni. Na akwaa ni ise tinrambuye, nawe kwishi sheeli irambua lyeru llya dede.

¹³Niiworee mboni shiingi ta ikutisiṛia, kake nta llangie ikutisiṛia na winu na kalamu ndi.

¹⁴Kake werie ikulolia ree, llyo tireraa kana kwa kana.

¹⁵Kaa-fo na unambwe! Ndoo teru takwisana. Isana ndoo ito teru nndu woose na irina lyamwi.