Read MMA SHIYYA Urambuyo lwa Yohane 1 Bible Online

Urambuyo lwa Yohane 1 - MMA SHIYYA bible

Urambuyo lwa Yohane 1

¹Urambuyo ilu lumilie kwa Iṛuva. Ye andekuningia Yesu Kristo aoruse maketi amwi nalo filya fitanikaa kyeeri kikee kufui. Kalumanyisa iketi lyamwi Yohane eenrumiaa malaika wamwi.

²Na Yohane yye anderambua kirero kya Iṛuva na irambua filya Yesu Kristo andellolisa.

³Wwa ngoma ulya asomiaa firero fa wauya lu na wa ngoma valya vaaranyaa na iwara filya fikee fitisiṛe-fo. Fulya kyeeri ki kikee ifika.

⁴Niń Yohane namwisana ini mukee siṛi tilya mfungare tikee ifo Asia. Uwoo lukaa neeni na unambwe fuukie kwa ito eefo, nae eeifoo, nae ashaa, fuukie na kwa mimuyo ilya mfungare ikee mbele ya kifumbi kyamwi kya witoṛo.

⁵Fuukie na kwa Yesu Kristo akee nrambua ulya nsongori, ni ulya andebooka iwara muu eeukaa vafuń, akee nnini wa mamangi a isanga. Ito afikundie na itikiṛa mareko eru na usao lwamwi.

⁶Katiaṛua mamangi na vakohani kisanguń kya Ndee Iṛuva. Unini llwamwi na finya kumande miṛeṛe na miṛeṛe. Amen.

⁷Lleń te akee isha ariwa mmaṛumbe. Na miso woose alloliaa na a valya vandensimba. Na ngyufwari toose ta isanga vaishiṛaa kiimba kyamwi. Ee nkya dede. Amen.

⁸Niń nkee Alifa na Omega, nkee wa mbooko na wa ifurumia, nkuro Nndumi Iṛuva arera uu eefo, nae eeifoo, nae ashaa, muni wa foose.

⁹Niń Yohane nkee mwanamae wanu na mutańaṛia mavaviso na umangi lwa Iṛuva andu emwi neeni na ulalamboo lwa iverea Yesu Kristo. Nnderawa kyurukeń kilya kikee kari ka nruva kiivaangwaa Patimo, fulya nndekwanisa kirero kya Iṛuva na irambua Nndumi Yesu.

¹⁰Nkonu umwi wa Iṛuva nndewarwa mMumuyo naita ununga unini numa yakwa sha ununga lwa wembe.

¹¹Lukashiia: Kilya kwallolia kitisiṛe kitabuń kukirikie siṛi tilya mfungare tikee ifo Efeso na Simirina na Perigamo na Tiatira na Saride na Filadelifia na Laodikia.

¹²Nań naaṛuka nille ununga lua lwarera nań. Namaaṛuka nalolia taa mfungare ta saabu.

¹³Na kari ka taa to nalolia nndu avakani na nndu wa vandu. Nae aṛee nseto mwaasha, na mbafuń aṛeefo kitati kya saabu.

¹⁴Nrwe wamwi na mafuli amwi kikee feelwa fyu sha mbaamba ana sha mboṛongo. Na miso amwi eekee sha kibalabala kya muro.

¹⁵Na marende amwi nsha minya yansokulwa nnu iikalakalaa ifo muroń. Na ununga lwamwi lwikee sha kiṛuṛumu kya mura nnini.

¹⁶Na ukoń lwamwi usha eeworee nyinyiri mfungare na kaniń kamwi ikauka-fo shombo shooi kuvili. Na kisangu kyamwi kiikee sha saa ikee ivaa na finya yayo.

¹⁷Nań ili nndellolia nawa io marendeń amwi sheeli nkee mfu. Nae kasheekeṛia uko lwamwi usha kashiia: Manya kuteeṛee! Nniń wa mbele na wa ifurumia. Niń nkee muni muu.

¹⁸Niń niikee mfu, a te nkee na muu alli na matika woose. Nań noore finya ya yuta vandu ufuń na ya ivinga ufu.

¹⁹Kyasia tisiṛań mboni to kwalolia na ifo fiifo na filya fivaa numa.

²⁰Kya kiṛisi kya nyinyiri tilya mfungare kwatilolia ukoń lwakwa usha na kya taa tilya mfungare ta saabu manya: Nyinyiri tilya mfungare vveesi va siṛi tilya mfungare, na taa tilya mfungare nsiṛi tilya mfungare to sheni.