Read MMA SHIYYA Urambuyo lwa Yohane 11 Bible Online

Urambuyo lwa Yohane 11 - MMA SHIYYA bible

Urambuyo lwa Yohane 11

¹Nań naniingio ireko likee sha mbiiri ya yelelia naio̱: ”Kwimboo kwelelie numba ya Iṛuva na kiraa kilya kya irasia na iwo vakee iterevia-wo.

²Na andu alya akee wooṛo ya numba ya Iṛuva kuaree nta kuteelelie, fulya anrambikio vaya vaṛumu, nawo vavariaa muṛi uu nsongori miiri makumi aani na ivili.

³Nań nniingiaa varambua vakwa vavili muumu, nawo vaniingiaa wikimbi mikonu kiku kimwi na mayana avili na makumi arindaru, nawo vawikwa makunia“.

⁴Iwo wwo misenifu ilya ivili na taa tilya ivili fiselele mbele ya Nndumi wa isanga.

⁵Na nndu afuraa ivakasheesa, muro usomukaa kaniń kawo na ilya fituva fawo. Na nndu afuraa ivakasheesa, kuro mfo kyawara awalwa.

⁶Iwo vawore finya ya ifinga iṛuvewu, amu fua itakabe mikonu yo ya wauya lwawo. Nawo vawore finya ya yaṛua mura uve usao na ikaba isanga na mikabie yoose andu woose vakundaa.

⁷Vakammaa imarisia mirambuye yawo ifisi lia ivaave lyarwa lyuka kundo kulya kwa si likabanaa nawo, nalyo livavingaa na ivawaa.

⁸Na minyińa yawo ikaa ifo shień ya muṛi ulya nnini ukee ivaangwa kwa mirerie ya kimumuyo Sodomo na Misiri, lingi ni io Nndumi wawo andekabio kiriń.

⁹Na vandu va isanga na makanika na mirerie na vaya vaṛumu vallaa minyińa yawo mikonu iraru na kyeenga, ana nta vaotoṛiaa minyinńa yawo iṛikwa mbangeń ndi.

¹⁰Na valya vakee isangeń vafuraa kiimba kyawo na ikaba mindoṛo. Nawo vakurikiaa findo fa ikukyesia wo veni na veni, fulya vaauya wo vavili vandelisa valya vakee isangeń ukiva.

¹¹Kake ili mikonu yo iraru na kyeenga indemaa isia, mumuyo wa muu uukie kwa Iṛuva ukavaakia, vakasalala kyumu na marende awo. Na weṛei unini lukashea vandu valya vandevalolia.

¹²Vakaita ununga unini luuka iṛuvewu lwivaiaa: Aṛukień kumande kunu. Nawo vakaaṛukia iṛuvewu variwa ni iṛumbe fituva fawo fiivallaa.

¹³Na saa ilya sheni kikava kirerema kinini kya isanga. Na kyeenga kya ikumi kya muṛi ulya kikafika. Vandu fiku mfungare vakafiya ifo kireremioń kilya. Na iwo vandesaa vakawarwa wweṛei. Vakaindia Iṛuva wa iṛuvewu.

¹⁴Ushi lwa kavili lwammaa iira. Lla te ushi lwa kararu lukee isha ree.

¹⁵Na malaika ulya wa mfungare kakaba wembe. Tikaitiwa ngyununga nini ifo iṛuvewu tiireraa: Umangi lwa isanga lwammaa iva umangi lwa Nndumi weru na lwa Kristo wamwi, nae yye eetoṛoo kumande miṛeṛe na miṛeṛe.

¹⁶Na vasuṛi valya makumi avili na vaani vakee rembo mbele ya Iṛuva fifumbiń fawo vakawa si na fisangu fawo vakaaniṛia Iṛuva.

¹⁷Vakanumbua: ”Takwa a na iwe, Nndumi Iniva muni finya, iwe kwifo, nawe kwiifoo, fulya kwamiimboo imakii lyafo likee inini na iwara umangi.

¹⁸Na vaya vaṛumu vaka-tuṛuka, kake ituṛuka lyafo nalyo likasha na kyeeri kya yumisia vafu na iniingia maketi afo maṛe, wwo vaauya fisuku na vasongori na valya veeṛee irina lyafo valya vannya na valya vanini na ireta iwo vakee ikasheesa isanga li“.

¹⁹Llyo numba ya Iṛuva ikee iṛuvewu irulwa na isanduku lia lya mma yamwi likalolika ifo numba yamwi. Tikava ngova na ngyununga na fiṛuṛumu na irerema lya isanga na masaawe manini nnu.