Read MMA SHIYYA Urambuyo lwa Yohane 13 Bible Online

Urambuyo lwa Yohane 13 - MMA SHIYYA bible

Urambuyo lwa Yohane 13

¹Mfo nalolia ifisi liiukaa nruveń liiworee mbembe ikumi na mirwe mfungare. Na ifo mbembeń tayo liiworee mbundu ikumi ta kimangi, na mirweń yayo eeifoo marina a iruma Iṛuva.

²Na ifisi lyo nndelilolia liifwanii ngwe na fidawu fayo tiikee sha fa kyaalo na kana kayo nsha kana ka miiso. Shoka ilya ikaliniingia finya tayo na kifumbi kyayo na imakii iingi.

³Na umwi wa mirwe yayo nsheeli wammaa ikabwa kyaasha kya ufu, na ikabwa lyayo lya ufu likashiiswa. Isanga lyoose likaṛiikia ifisi lia.

⁴Vakafukiya shoka ilya nri, fulya indeniingia ifisi lia finya yayo. Nawo vakafukiya na ifisi lia nri veenumbuaa: Ni i avakani na ifisi li? Lingi ni i amakii iimboo nalyo fira?

⁵Nalyo likaniingwa kana ka irera firero fa nrumu likaniingwa imakii lya iṛunda mashoṛa ayo miiri makumi aani na ivili.

⁶Likataṛambua kana kayo lirume Iṛuva na iruma irina lyamwi na kirembo kyamwi na akwaa ni iwo vakee ifo iṛuvewu.

⁷Lingi likaniingwa muumu wa itania fira na vasongori na ivavinga. Likaniingwaa na imakii lya ishilia makanika woose na ngyufwari na mirerie na va masanga woose.

⁸Na valya vakee kunu isangeń valifukiyaa nri valya woose vatakee vatisiṛe marina awo kuuka isanga lyeentanwaa kitabuń kya muu kya ngarina ilya indesikywa.

⁹Nndu awore marwi aaranye.

¹⁰Nndu afingaa vengi nae afingwaa, Na nndu awaa vandu na shombo kyawara awalwa na shombo. Ia wwo andu a isisiria na ikusura lya vasongori.

¹¹Numa nalolia ifisi lingi liisaamaa lyuka na ifo si. Nalyo liiworee mbembe ivili sha suve likarera sha shoka.

¹²Nalyo Iikee iṛunda na imakii lyoose lya ifisi lia lya mbele kisanguń kyayo. Nalyo likee yaṛua isanga na woose veefo vafukiye ifisi lia lya mbele nri llia faasha fayo fa ufu findeshia.

¹³Nalyo likee itana maṛiikiso manini kumande yolota muro iṛuvewu ushe isangeń vandu valolie.

¹⁴Nalyo likateveta valya vakee isangeń na maṛiikiso alya nndeniingwa liatane mbele ya ifisi lyo liiaa valya vakee isangeń vasongosie fwana ya ifisi lia liwore kyaasha kya shombo, nalyo likakaa na muu.

¹⁵Likaniingwa na imakii lya irwaya fwana ya ifisi lia mumuyo wa muu. Na fwana ilya ikamakii irera na iwaa iwo woose vandelea ifukiya fwana ya ifisi li nri.

¹⁶Nalyo lyakaba woose nrwe vakee vannya na vanini na masimba na vakiva na vakee vaotoṛe na maketi varwaa kiringisio ukoń lwawo usha ana kisanguń kyawo,

¹⁷amu nndu na kava i atamakii yuṛa kindo ana ikumba kindo kita ulya arie kiringisio kilya kya irina lya ifisi lia ana itaala lya irina lyayo.

¹⁸Ia wwo a uṛango. Ulya awore uṛango ataale itaala lya ifisi lyo, amu ni itaala lya irina lya nndu. Na itaala lyayo ni mayana arindaru na makumi arindaru na firindaru.