Read MMA SHIYYA Urambuyo lwa Yohane 15 Bible Online

Urambuyo lwa Yohane 15 - MMA SHIYYA bible

Urambuyo lwa Yohane 15

¹Numa nalolia myorusie ingi ifo iṛuvewu ikee minini na ya maṛiikiso. Vvamalaika mfungare veeriee mikabie ilya mfungare ya ifurumia, amu ituṛuka lya Iṛuva lyamaawukia nayo.

²Lingi nalolia kindo kivakani na nruva ya kilola isaangi-saangi na muro. Nalolia na valya vandevinga ifisi lia na fwana yayo na itaala lya irina lyayo vaselele mbaai ya nruva yo ya kilola vawore filimbi fa ikabia Iṛuva ngyufina.

³Nawo vakaimba ufina lwa Mose eekee iketi lya Iṛuva na ufina lwa ngarina ii veenumbuaa: ”Mminini na ya maṛiikiso mitanie yafo, ee Nndumi Iṛuva muni finya toose! Shia tafo n ta usumani na ta dede, ee Mangi ya va masanga.

⁴Ni i atakweṛeaa, ee Nndumi, ana ni i ataitikisaa irina lyafo? Amu iwe ku muni kukee Nsongori. Amu va masanga woose vashaa na ikuwoya iwe kisanguń kyafo. Fulya usumani lwafo lwammaa irambuka“.

⁵Na numa ya ifo nalolia numba ya Iṛuva iiruukaa, ikee yema lia lya mirambuye ifo iṛuvewu.

⁶Na vamalaika valya mfungare veeriee mikabie ilya mfungare vakasomuka kulya numba ya Iṛuva veeṛee miseto myeelwa ivaramie na mbafuń tawo veefingioo na fitati fa saabu.

⁷Na limwi lya makindo alya aani likaniingia vamalaika valya mfungare faasho mfungare fa saabu frishule ituṛuka lya Iṛuva akee na muu miṛeṛe na miṛeṛe.

⁸Nayo numba ya Iṛuva ikaishuṛwa musu uukie uniniń lwa Iṛuva na imakii lyamwi. Ana nndu andemakii yaka numba yo ndi, kumande makabwa alya mfungare a vamalaika valya mfungare amarisikaa.