Read MMA SHIYYA Urambuyo lwa Yohane 16 Bible Online

Urambuyo lwa Yohane 16 - MMA SHIYYA bible

Urambuyo lwa Yohane 16

¹Naita ununga unini luuka numba ya Iṛuva lwiiaa vamalaika valya mfungare: Endeń mukandeleta faasho filya mfungare fa ituṛuka lya Iṛuva isangeń.

²Ito wa mbele kaenda kaleta kyaasho kyamwi isangeń. Akava-fo maure makasha akee maboru akawara vandu valya veeworee kiringisio kya ifisi lia na valya veekee iindia fwana yayo.

³Na ito wa kavili kaleta kyaasho kyamwi nruveń. Nayo ikava usao sha usao lwa nnyińa wa nndu, na findo foose fiiworee muu ifo nruveń fikafwa.

⁴Na ito wa kararu kaleta kyaasho kyamwi mireń na sookweń ta mira. Nafo fikava usao.

⁵Nań naita malaika ulya wa mira eereraa: Iwe kukee nsumani, kwifo, nawe kwiifoo, Nsongori, ili kwamuumisia kuri.

⁶Fulya vairita usao lwa vasongori na lwa vaauya, nawe kwavaniinga usao valunwe. Nawo kyavawara kuro.

⁷Naita kiraa kyo kya Nndumi kiireraa: Ee Nndumi Iṛuva muni finya, uumisio lwafo llwa usumani na lwa udede.

⁸Na ito wa kaani kaleta kyaasho kyamwi saań ii ivele. Nayo ikaniingwa finya ya ikoṛa vandu na muro.

⁹Vandu vakakoṛwa na yokywa inini, nawo vakaruma irina lya Iṛuva awore miitoṛio ya mikabie yo. Ana nta vandeilashika vamwindie ndi.

¹⁰Na ito wa karaanu kaleta kyaasho kyamwi kifumbiń kya ifisi lia, umangi lwayo lukava llema. Na vandu vakarafuna ngyulumi tawo kiimba kya mavavio.

¹¹Vakaruma Iṛuva wa iṛuvewu kiimba kya mavavio awo na kiimba kya maure awo, ana nta ikurra kya mitanie yawo.

¹²Na ito wa karindaru kaleta kyaasho kyamwi ifo mureń ulya nnini wa Eufurati. Mura wayo ukaumia, amu shia ya mamangi alya aukaa taari ya ngama isongosio.

¹³Nań nalolia mimuyo iraru mikasha ivakani na filwa iisomukaa kaniń ka shoka ilya na kaniń ka ifisi lia na kaniń ka mwauya fisuku ulya wa wongo.

¹⁴Iyo yyo mimuyo ya masatana ikee itana myorusie. Nayo ikalatia mamangi a isanga lyoose ivasańiṛie fira ya nkonu ulya nnini wa Iṛuva muni finya tooose.

¹⁵”Lla te nshaa sha inini, Wwa ngoma ulya alalaa rembo na illa masaṛa amwi ataende kya ruu kumande vandu valolia usutu lwamwi.“

¹⁶Nayo ikavasańiṛia andu avaangwaa kiebrania Arimagedon.

¹⁷Na ito wa mfungare kaleta kyaasho kyamwi ifo ringewu. Lukasomuka ununga unini ifo numbeń ya Iṛuva luukie kifumbiń kilya kya unini lwinumbuaa: Kyammaa iva.

¹⁸Kukava na fimuli na fiṛuṛumu na ngova. Likava-fo na irerema inini lya isanga kitaare lindelolio kuuka kyeeri vandu vavva-fo isangeń. Lyawe-fo mikae yo sheeli lindeva-fo irerema inini kuro ndi.

¹⁹Na muṛi ulya nnini ukakwavanisa feenga firaru na miri ya vaya vaṛumu ikaburuka. Na muṛi ulya nnini wa Babeli ukakumbulwa mbele ya Iṛuva, amu aurite mfinyo wishule uumisio na ituṛuka lyamwi.

²⁰Fisanga fa nruveń foose fikareka ana ngyuro nta tikilolika lingi.

²¹Na masaawe ańini sha ńunde ya nndu akauka iṛuvewu akaolokia vandu. Na vandu vakaruma Iṛuva kiimba kya ikabwa mmasaawe alya. Amu ikaba lyayo ni inini nnu deń.