Read MMA SHIYYA Urambuyo lwa Yohane 17 Bible Online

Urambuyo lwa Yohane 17 - MMA SHIYYA bible

Urambuyo lwa Yohane 17

¹Kasha umwi wa vamalaika valya mfungare valya veeriee faasho filya mfungare karera nań eenumbuaa: Oṛesho kunu, nkworuse uumisio lwa nka mwaaisi ulya nnini akee rembo mbaai ya mira miingi.

²Ni ulya mamangi a isanga andeaaika nae, na valya vakee isangeń vakanangiswa ni mfinyo wa waaisi lwamwi.

³Kashikurika nkee wware mMumuyo kashirwaa bateń. Nań nalolia-fo nndu nka akaaye rembo ifisi litondoṛie deń, nalyo liikee ikabie marina a iruma Iṛuva wiliń wayo woose, liiworee mirwe mfungare na mbembe ikumi.

⁴Na nka to eekee vvike masaṛa a kimangi. Lingi eekwambikiee na saabu na mawe a uuru na samana shinuru. Nae eeworee umbata lwa saabu ukoń lwamwi lwishule makasha a ikasheesa mirima na ukwe lwa waaisi lwamwi.

⁵Na kisanguń kyamwi liifoo irina litisiṛie lya kiṛisi: Babeli nini, mae wa vaaisi na wa makasha a ikasheesa mirima akee isangeń.

⁶Nalolia nka ulya anangio ni usao lwa vasongori na usao lwa varambua va Yesu. Nań ili nndellolia naawukwa ni yawukwa inini.

⁷Na malaika ulya kashiia: ”Naamu ki kwaṛiika? Nkuiaa kiṛisi kilya kya nka uu na kya ifisi li linrie liwore mirwe ilya mfungare na mbembe tilya ikumi.

⁸Ifisi li kwalilolia liifoo ilyo mbooko, kake alli likiifo ndi, nalyo lyankusongosia irwa lingi lyuka kyolokioń kilya kya kundo kwa si lyende uretiń. Na valya vakee isangeń vatakee vatisiṛe marina awo kitabuń kya muu kuuka isanga litandevevio wo vaṛiikaa ili valoliaa ifisi li liifoo mbele liteefo alli, nalyo likaa-fo lingi.

⁹Io wwo atinyie makusaṛo a uṛango. Mirwe ilya mfungare nngyuro mfungare wwo nka to akaaye.

¹⁰Nato nna mamangi mfungare. Varaanu vawo vammaa iwa, na ulya umwi eefo, na ulya ungi ansha ndi. Nae ili ashaa akee ndeeṛie akaa-wo kyeeri kyaangu.

¹¹Na ifisi lyo liifoo mbele litakiifo alli nalyo llyo lya nyaanyi, nalyo llimwi lya valya mfungare, nalyo likaenda uretiń.

¹²Na mbembe tilya ikumi kundetilolia mmamangi ikumi, nawo kitaare vanrambikio umangi, kake vawariaa miitoṛio sha mamangi andu a saa imwi andu emwi na ifisi lia.

¹³Iwo kikwena kyawo nkimwi kya iniingia ifisi lia finya tawo na miitoṛio yawo.

¹⁴Wo wwo vawaraa fira ya ikabana na ngarina ilya, kake ngarina ivavingaa, amu yo ni Nndumi wa mawomi na mangi ya mamangi. Na iwo vakee andu emwi nayo wwo vakee vavaange na vasaue na valya vakusurie.

¹⁵Llyo ashiia: Mira ilya kwailolia, io mwaaisi to wa kika akee rembo, yyo ngyufwari ta vandu na makusandio na va ngyuruka na va mirerie yoose.

¹⁶Na mbembe tilya ikumi kundetilolia na ifiisi lia iwo vasuaa mwaaisi ulya wa kika, nawo vansokaa masaa amwi na intia kya ruu. Na nyama ta wili wamwi valyaa na inrongorisa kutu muroń.

¹⁷Amu Iṛuva anderwaa ngooń tawo vatane kilya akusaṛie na ikuwara na kikwena kimwi na iniingia ifisi lia umangi lwawo, kumande firero fa Iṛuva faawutioo.

¹⁸Lingi nka ulya kwallolia mmuṛi ulya nnini woore umangi lwa iitoṛio mamangi a isanga.“