Read MMA SHIYYA Urambuyo lwa Yohane 19 Bible Online

Urambuyo lwa Yohane 19 - MMA SHIYYA bible

Urambuyo lwa Yohane 19

¹Numa ya ifo naita ununga lukee sha lwa mindoṛo ya isyamu iingi lya vandu va ifo iṛuvewu veenumbuaa: ”Aleluya! Ikiṛwa na unini na finya mfa Iṛuva weru.

²Fulya yumisia lyamwi llya dede na lya usumani. Amu amuumisia nka ulya nnini mwaaisi andekasheesa isanga na waaisi lwamwi, kataa usao lwa maketi amwi lua andelwirita na uko lwamwi.

³Vakanumbua lingi lya kavili: Aleluya! Na musu wa imuṛo lyayo wafumbia na ule miṛeṛe na miṛeṛe“.

⁴Na vasuṛi valya makumi avili na vaani na makindo alya aani vakawa na si veeindiaa Iṛuva akee rembo kifumbiń kya miitoṛio veenumbuaa: Amen! Aleluya!

⁵Na ununga lukauka kifumbiń kya miitoṛio lwinumbuaa: Itikiseń Iṛuva weru ini maketi amwi woose ini mumweṛee mukee vanini ana mukee vannya.

⁶Nań naita ununga sha ununga lwa isyamu iingi na sha iṛuṛuma lya mira miingi na sha kiṛuṛumu kya ukova luwore finya lwinumbuaa: ”Aleluya! Amu Nndumi Iṛuva weru muni finya awwara witoṛo.

⁷Tikyese na ikaba mindoṛo tiinniingaa tikisi yamwi! Fulya wali lwa ngarina ilya lwamfika. Sangya yayo ammaa ikusongosia.

⁸Nae aniingwa muumu aṛaa miseto myeelwa ivaramaa“. Amu miseto yo myeelwa nkimwi na mitanie ya usumani ya vasongori.

⁹Na malaika ulya kashiia: Tisiṛa: Vva ngoma valya vawaangio imutu lya wali lwa ngarina ilya. Kashiia: Firero fi mfirero fa Iṛuva fa dede.

¹⁰Nań nawa marendeń amwi, amu mmwindie. Kashiia: Manya kutatane kuro! Niń nkee mwelekia wafo na wa vanavamae vafo vakee varambua va Yesu. Ulya kyawara kumwindie ni Iṛuva. Amu irambua Yesu ni iirikia Mumuyo wa wauya.

¹¹Numa nalolia iṛuvewu liruukie. Nalolia farasi sheelwa, na ulya aikaaye avaangwaa Nsongori na wa udede, amu aletaa myaandu na ikaba fira na usumani.

¹²Miso amwi akee sha kibalabala kya muro, na ifo nrweń wamwi awore ngyuṛeto shiingi ta kimangi. Nae awore irina likee itisiṛe ateefo nndu aliishi kita ye muni.

¹³Nae ni vvike isaṛa lindeolotwa usaoń na irina lyamwi avaangwaa: Kirero kya Iṛuva.

¹⁴Na isyamu lya ifo iṛuvewu likallatia lyaṛukie farasi sheelwa na ivikwa miseto myeelwa ivaramaa.

¹⁵Na shombo shooi ikauka kaniń kamwi akabe nayo vandu va isanga. Nae avaisaa na mbiiri ya minya. Nae yye akee ivaria-varia ikamioń lya mfinyo wa uvaave lwa ituṛuka lya Iṛuva muni finya.

¹⁶Nae awore irina itisiṛe nsetoń wamwi ifo kisiń kyamwi. Nalyo llyo ifi: Mangi wa mamangi na Nndumi wa mawomi.

¹⁷Numa nalolia malaika umwi aselele kari ka saa ii ivele. Kavaanga na ununga unini ndee toose tikee irambuka kwa si ya iṛuvewu: Oṛeshoń musangie imutuń inini lya Iṛuva.

¹⁸Mushelya nyama ta mivili ya mamangi na nyama ta mivili ya mashaamba na nyama ta mivili ya vafinya na ta mivili ya farasi na ya valya vatikaaye na nyama ta masembo na vatakee masembo na ya vannya na ya vanini.

¹⁹Numa nalolia ifisi lia na mamangi a isanga na matoroto awo vankwania ikaba fira na ito akaaye farasi ilya na matoroto amwi.

²⁰Na ifisi lia likawarwa andu emwi na mwauya ulya wa wongo ulya andetana maṛiikiso alya kisanguń kyayo, amu wwo andekaba nawo vandu nrwe valya vandewaria kiringisio kya ifisi lia na iindia fwana yayo. Iwo vali vavili vakakumbwa veefo na muu iruveń lia lya muro ukee yaka wa kibalabala.

²¹Na valya vandesaa vakawalwa na shombo ya ulya eekayee farasi, nshombo ilya yukie kaniń kamwi. Na ndee toose tikawuura nyama tawo.