Read MMA SHIYYA Urambuyo lwa Yohane 2 Bible Online

Urambuyo lwa Yohane 2 - MMA SHIYYA bible

Urambuyo lwa Yohane 2

¹Mwisi ulya wa siṛi ikee Efeso ntisiṛie: A fi firero anrera ito awore nyinyiri mfungare ukoń lwamwi usha, ni ulya akee iṛua kari ka taa tilya mfungare ta saabu. Nafo mfo ifi:

²Niishi mitanie yafo na ngatara tafo na isisiria lyafo na sheeli kitaare kumakii iliana na vandu vakasha. Lingi kwameelelia valya vakee ikuvaanga varumi, nawo nta vvarumi ndi, kwavalolia sheeli wa wongo.

³Lingi kundekukaarisa na iva na isisiria na kiimba kyakwa kwakwatara nta yaaraa.

⁴Kake nkee ikwikimba, fulya kunderea ikunda lyafo kundebooka nalyo.

⁵Kyasia kumbua kulya kundewa, kwakurra kwatana lingi mitanie ilya ya mbele. Kake kwalea itana kuro, nshaa kwafo ree nuute taa yafo andu ayo, kwakooya kutakurraa.

⁶Kake kuwore kirero ki sheeli kusule mitanie ya Vanikolai, yyo na akwaa nniń nsule.

⁷Ulya awore marwi aaranye kilya Mumuyo akee iia siṛi ti: Ulya avingaa, ninniingaa nunda ta nri wa muu ukee ifo Paradiso ya Iṛuva.

⁸Na mwisi ulya wa siṛi ikee Simirina ntisiṛie: A fi firero arera ito akee wa ibooka na wa ifurumia, ni ito eekee mfu kawara lingi muu. Nafo mfo ifi:

⁹Niishi mavaviso afo na ukiva lwafo, kake kukee muni usimba. Niishi sheeli kukee irumwarumwa ni iwo vakee ikuvaanga Vayuda, nawo vatakee Vayuda, kake vakee siṛi ya Satana.

¹⁰Manya kuteeṛee matuṛulo alya akaa andekukooya. Lla ndiingi ulya arwaa kiindi kyanu kifingioń, amu mwelelio, neeni muvaa na matuṛulo mikonu ikumi. Va na ikusura kumande kufwaa, nań nkuniingaa uṛeto lwa muu.

¹¹Ulya awore marwi aaranye kilya Mumuyo akee iia siṛi ti: Ulya avingaa akooywaa nngatara ta ufu lwa kavili ndi.

¹²Na mwisi ulya wa siṛi ikee Perigamo ntisiṛie: A fi firero ito arera awore shombo ilya shooi kuvili. Nafo mfo ifi:

¹³Niishi alya kukaa, ni io kifumbi kya Satana kikai. Nawe kukuwore nnu na irina lyakwa ana nta kundekana ikusura lya ishikusura niń ndi na akwaa nkyeeri kilya kya nrambua wakwa nsumani Antipa ulya andewaywa ifo kwanu ifo Satana awore kivasha kyamwi.

¹⁴Kake fiifo findo kiindi kwafo fitashisenye, fulya kuwore vandu vakee kwanu vawore miloshie ya Bileamu ulya andelosha Balaki atevete vana va Isiraeli eevaloshaa ilya nyama shirasie maṛuva a wongo na itana waaisi.

¹⁵Mfo kuro nawe kuwore vandu vawore miloshie ya Vanikolai.

¹⁶Alli aṛuka! Kwalea yaṛuka nshaa ree wakabe na shombo yukie kaniń kakwa.

¹⁷Ulya awore marwi aaranye kilya Mumuyo akee iia siṛi ti: Ulya avingaa mmwaviaa Mana ilya ifisie, ninniinge na iwe yeelwa na ifo iweń ilyo liifo irina litisiṛio-fo iiya litaishiwa ni nndu kitaare ni ulya da alikooyaa.

¹⁸Na mwisi ulya wa siṛi ikee Tiatira ntisiṛie: A fi firero Mwana wa Iṛuva afirera awore miso akee sha kibalabala kya muro na marende amwi avakani na minya ya arera ikee shisokue nnu. Nafo mfo ifi:

¹⁹Niishi mitanie yafo ya ikunda lyafo na ikusura na miṛundie na isisiria lyafo. Lingi niishi sheeli mitanie yafo ya ifurumia yankilia ilya ya mbele.

²⁰Kake lwifo wikimbi lwa ikwikimba, fulya nta kutakee ilea nka to Isebeli ito akusendaa sheeli mmwauya eeloshaa vandu kateveta maketi akwa vatane waaisi, lingi valye nyama shirasie maṛuva a wongo.

²¹Nammuniinga mwaanya wa iilashika, kake afurie iilashika na itia waaisi ndi.

²²Lla nillwesaa na iwo vakee yaaika nae vakooye mavaviso manini, kwakooya vatailashikaa mitanie yawo.

²³Na vana vamwi iwaa wawaa. Na siṛi toose timanyaa sheeli nniń musaṛaana fio na ngoo. Nań naaviaa nndu woose wanu kisumani na mitanie yamwi.

²⁴Kake ini vengi mukee ifo Tiatira mutakuwore na miloshie yo, mutamanya fiṛisi fa Satana, sheeli wo vakee inumbua, nta mmwekeṛiaa mwaanda ungi ndi.

²⁵Kake kilya mukee nakyo wareń nnu kumande nshaa.

²⁶Na ulya avingaa kava mulla mitanie yakwa kumande ifurumia ninniingaa miitoṛio ya iitoṛio vaya vaṛumu.

²⁷Nae avaisaa na mbiiri ya minya avafukyefukye sheeli vakee nungu ta uteri, sheeli nań nndeniingwa finya ii ni Nde yakwa.

²⁸Nań ninniingaa nyinyiri ilya ya ngama.

²⁹Ulya awore marwi aaranye kirero ki Mumuyo akee iia siṛi ti.