Read MMA SHIYYA Urambuyo lwa Yohane 22 Bible Online

Urambuyo lwa Yohane 22 - MMA SHIYYA bible

Urambuyo lwa Yohane 22

¹Numa kashoorusa iṛiko lya mura unnde muu uvaramaa sha iwe yeelwa. Iṛiko lyo liṛukie kifumbiń kya kimangi kya Iṛuva na kya ngarina ilya.

²Na mbaai ya iṛiko lia kwa kunu na kwa kulya iifo miri innde muu ivikaa nunda ta makamba ikumi na ivili, inndee nunda tayo mwiri woose. Na maru a miri yo ni a ikiṛa vandu va masanga.

³Ana nta kidengo kikikaa-fo lingi. Na kifumbi kya kimangi kya Iṛuva na kya ngarina ilya kikaa kari kayo, na maketi amwi andundiaa.

⁴Nawo valoliaa kisangu kyamwi na irina lyamwi likaa fisanguń fawo.

⁵Ana kikivaa-fo kio ndi, ana vatińwaa ntaa ana langa ya saa ndi, amu Nndumi Iṛuva avamulikiaa, nawo veetoṛoo kumande miṛeṛe na miṛeṛe.

⁶Numa kashiia: Firero fi mfa iirikia na fa dede. Nae Nndumi Iṛuva wa mirima ya vaauya anruma malaika wamwi aoruse maketi amwi filya fitanikaa ree nkonu ukee kufui.

⁷”Lla te nshaa ree. Wwa ngoma ulya awaraa firero fa urambuyo lwa kitabu ki.“

⁸Nań Yohane nniń nndeita ifo na ilolia nafilolia. Nammaa itiita na ifilolia nawa si marendeń a malaika ulya mushoorusa ifo, amu mmwindie.

⁹Nae kashiia: Manya kutatane kuri! Niń nkee uroe wafo na wa vanavamae vafo vaauya na wa valya vawaraa firero fa kitabu ki. India Iṛuva!

¹⁰Kashiia: Manya kutafise firero fa urambuyo lwa kitabu ki na ifirwaa kiringisio! Amu kyeeri kyansha kufui.

¹¹Ulya awore usanduru aengeṛie usanduru lwamwi na ulya wa kiṛinda aengeṛie iva kiṛinda. Na ulya wa usumani aengeṛie itana fa usumani na ulya nsongori aengeṛie iva nsongori.

¹²”Lla te nkee isha ree, na rnaṛe akwa ariani andu emwi nań ntaa nndu woose sheeli kiińańani na mashoṛa amwi.

¹³Niń nkee Alifa na Omega, wa mbele na wa ifurumia, wa mbooko na wa mmando.

¹⁴Vva ngoma valya vawaraa mavavaso amwi, amu vakooye fuva yawo ya nri ulya unnde muu na muumu wa iira mbengeń tilya vafike muṛiń ulya.

¹⁵Ifo wooṛo akaa makite na vasavi na vaaisi na vawaa na iwo vaindia maṛuva a wongo na valya woose vakundie wongo na iirera.“

¹⁶”Niń Yesu nanruma malaika wakwa ashemurambuya ifi fivie siṛi tilya. Niń nniń kyana kya ufwari lwa kwa Davidi, nkee nyinyiri ilya ivaramaa ya ngama.“

¹⁷Na Mumuyo na sambuṛa ilya ya wali vakee inumbua: Oṛesho! Na ulya aitaa iki anumbue: Oṛesho! Na ulya aworwa nnyura ashe. Na alangie awarie mura wa muu kya ruu.

¹⁸Nkee irambuya nndu woose aitaa firero fa urambuyo lwa kitabu ki: Kwakooya nndu aengeṛiaa-wo kindo, Iṛuva amwengeṛiaa makabwa wo akee matisiṛe kitabuń iki.

¹⁹Na kwakooya nndu aangusaa kimwi kya firero fa urambuyo lwa kitabu ki, Iṛuva amwangusiaa fuva yamwi ya nri ulya unnde muu na ya muṛi ulya nsongori ulya mboni tayo tikee shitisiṛe kitabuń ki.

²⁰Ito akee irambua ifi akee inumbua: Ee nkee isha ree. Amen! Oṛesho, Nndumi Yesu!

²¹Uwoo lwa Nndumi Yesu Kristo lukaa na vasongori woose! Amen.