Read MMA SHIYYA Urambuyo lwa Yohane 5 Bible Online

Urambuyo lwa Yohane 5 - MMA SHIYYA bible

Urambuyo lwa Yohane 5

¹Nań nndelolia ifo ukoń usha lwa ito akee rembo kifumbiń kilya kya unini kitabu kitisiṛie kari, na wooṛo kirwaa firingisio mfungare.

²Nalolia malaika awore finya eekwanisaa na ununga unini: Ni i asumani irua kitabu ki na ifukya firingisio fayo?

³Ana nta eefo nndu iṛuvewu ana isangeń ana kwa si ya isanga andemakii irua kitabu kyo na ikilla ndi.

⁴Nań naiya nnu, fulya atandelolika nndu asumani irua kitabu kyo na ikilla ndi.

⁵Na umwi wa vasuṛi valya kashiia: Manya kutaiye! Lla te eefo avvinga foose, mmiiso ilya ikee ya ufwari lwa Yuda, amilie kwa Davidi, ye antaa kitabu kilya na firingisio filya fayo mfungare.

⁶Nań nndelolia ifo kari ka kifumbi kya unini na makindo alya aani na kari ka vasuṛi valya ngarina ya yaanri iselele iikee sheeli yammaa isikywa, iiworee mbembe mfungare na miso mfungare, yyo mimuyo ilya mfungare ya Iṛuva ikee mirume isangeń koose.

⁷Ikasha ikawaria kitabu kilya iikiutaa ukońusha lwa ulya akee rembokifumbiń kilya kya unini.

⁸Ikammaa iwaria kitabu kilya makindo alya akawa si mbele ya ngarina ii, na vasuṛi valya makumi avili na vaani nawo. Oo umwi wawo eeworee kilimbi na faasho fa saabu fiishule fisaamu, mfo fiterewo fa vasongori.

⁹Nawo veekee iimba kiimbo kiiya veenumbuaa: Kusumani iwe iwaria kitabu ki na ifukya firingisio fayo, fulya kwansikywa kwauṛia Iṛuva vandu va ngyuṛiti toose na usao lwafo ńa ngyufwari na makanika.

¹⁰Kwavaaṛua vavie Iṛuva weru mamangi na vakohani. Nawo vashiliaa isanga li.

¹¹Nań nndella naita ununga lwa vamalaika veengi veelengetiaa kifumbi kilya kya unini na makindo alya na vasuṛi valya. Na itaala lyawo likafika fiku ikumi kwa fiku ikumi na kiku kwa kiku.

¹²Vakarera na ununga unini veenumbuaa: Ngarina ii indesikywa yo isumani iwaria imakii na usimba na uṛango na finya na tikisi na unini na mboṛa.

¹³Na foose fitani fikee iṛuvewu na filya fikee isangeń na kwa si ya isanga na fikee nruveń na findo foose fikee kari kayo nndeita fiinumbuaa: Mboṛa na tikisi na unini na imakii fivie ito akee rembo kifumbiń kya unini na ngarina ii miṛeṛe na miṛeṛe.

¹⁴Na makindo alya akanumbua: Amen. Na vasuṛi valya vakawa si vakamwindia.