Read MMA SHIYYA Urambuyo lwa Yohane 9 Bible Online

Urambuyo lwa Yohane 9 - MMA SHIYYA bible

Urambuyo lwa Yohane 9

¹Na malaika ulya wa karaanu kakaba wembe. Nalolia nyinyiri yukie iṛuvewu ikee shoolotie isangeń. Nayo ikaniingio ufunguo lwa irua kyolokio kya kundo kwa si.

²Ikarua kyolokio kya kundo kwa si. Ukarwa musu uuka kyolokioń sha musu wa iriko inini. Na saa na ringewu fikava llema kiimba kya imusu lia lya kyolokio.

³Na imusuń lia tikasomuka-fo nrie tikasha isangeń. Nato tikaniingwa finya sha ya nguluva tikee isangeń.

⁴Tikaio̱ manya titakasheese maṛe ana kindo kyoose kikee kishu ana nta nri umwi kita vandu valya vatawore kiringisio kya Iṛuva ifo fisanguń fawo.

⁵Lingi tikavavaswa kaaṛa titavawaa, kake valiswa ukiva miiri iraanu. Na mavaviso wo eevakanii na a nguluva ili yaimara nndu.

⁶Na mikonu ilya vandu vaṛuyaa ufu vatalulolie. Nawo valangaa ifwa, nalo ufu luvarishaa.

⁷Na nrie to tiifwanii farasi tikee shisongosie ta yenda fireń. Na ifo mirweń yayo fiifoo findo fifwani ngyuṛeto ta saabu, na fisangu fayo fikee sha fa vandu.

⁸Nato tiiworee mafuli sha mafuli a vaka. Na mayoo ayo eekee sha mayoo a miiso.

⁹Nato tiiṛee firinga mbafu sha firinga fa minya. Na kiṛuṛumu kya maaro ayo kikee sha kiṛuṛumu kya magari a farasi shiingi tiirishiaa ree fireń.

¹⁰Nato toore mikia na miinga sha nguluva, na finya tayo ta ikasheesa vandu miiri iraanu ikee kari ka mikia yayo.

¹¹Tiwore mangi yayo, nae mmalaika wa kundo kulya kwa si. Irina lyamwi kiebrania ni Abadon na kigiriki ni Apolion.

¹²Ushi lwa mbele lwamma iira. Lla te tiseere-fo ngyushi ivili tishaa numa.

¹³Na malaika ulya wa karindaru kakaba wembe. Naita ununga luukie mbembeń tilya iinyi ta kiraa kya irasia kya saabu kikee mbele ya Iṛuva.

¹⁴Lukaia malaika ulya wa karindaru awore wembe lu: Boṛomua vamalaika valya vaani vakee vafinge ifo mbaai ya mura ulya nnini wa Eufurati.

¹⁵Vamalaika valya vaani vakaboṛomulwa veekee vadeeṛie saa na nkonu na mwiri na mwaka, amu vawaa kyeenga kya kararu kya vandu.

¹⁶Na itaala lya vaseṛo va fira vakaya farasi liikee fiku makumi avili ka fiku ikumi. Llyo itaala lyawo nndeita.

¹⁷Kuro mfo nndelolia farasi to ifo myorusień yakwa, na iwo veetikayee vaṛee firinga mbafu sha fa muro na fingi mfuu na fingi fifuukie. Na mirwe ya farasi to nsha mirwe ya miiso. Na ifo kaniń kayo ukee isomuka-fo muro na musu na saiye ya ifiṛa uṛoo.

¹⁸Feenga firaru fa vandu vakawalwa mmikabie yo iraru ya muro to na musu to na saiye yo fuukie kaniń kayo.

¹⁹Amu finya ta farasi to tikee kaniń kayo na mikień yayo. Amu mikia yayo ivakani na shoka, nayo yoore mirwe, nayo yyo tikee ikasheesa nayo.

²⁰Na vandu valya vandesaa kitaare vandewalwa ni ikabwa lyo nta vandekurra kya mashoṛa alya a maako awo ndi, nta vandetia-wo irasia vaṛumu ndi na fwana ta saabu na fesa na ta minya na ta mawe na firi Atamakii ilolia ana iita ana yenda.

²¹Nta ikulakanisa na iwaa lyawo ana usavi lwawo ana waaisi lwawo ana unini lwawo.