Read Ma'anyan MATIUS 10 Bible Online

MATIUS 10 - Ma'anyan bible

MATIUS 10

¹Hang hinra anrau Yesus nerau dua walas kaulun ulun sa umba hanye bakumpul. Balalu hanye ngami ma here kuasa pakai ngusir kawan roh jahat nelang nyamare wahai masam panyakit anri wahai wangun cacat tenga.

²Ngaran kadua walas rasul yiru hanyeyiru: palanungkai, Simon (isa naantuh pada hi Petrus) anri pulaksanaini hi Andreas, balalu hi Yakobus anri pulaksanaini hi Yohanes, hanyeyiru kawan anak Zebedeus.

³Udi hie hi Filipus anri hi Bartolomeus, anri hi Tomas, anri hi Matius, tukang tagis pajak yiru kamulek hi Yakobus anak Alfeus, anri hi Tadeus;

⁴balalu pangalisanni hi Simon, hi Patriot anri Yudas Iskariot sa makhianat Yesus.

⁵Udi yiru kadua walas rasul yiru nahuyu Yesus jari saruhan nelang kaiyuh kawan patitah kalayiti, “Ada tulak ma daerah kawan ulun sa puang Yehudi. Ada pada ma tumpuk ulun Samaria.

⁶Kude hulu tulak nunung kawan ulun Israel, sa mambatang nunung here sa tawang

⁷Wara ma here Alatalla haut mulai marentah kala Raja.

⁸Samare kawan ulun sa sakit; samelum ulun sa matei; samare pada kawan ulun sa kadanen, nelang usir kawan roh jahat. Naun haut narime katuluhni yiru anri naami tuu eleh. Jari, naun pada ngami anri tuu eleh.

⁹Ada nginsing duit amas, duit perak, atawa duit tambaga pada.

¹⁰Ada pada nginsing kambut unengan sadakah, atawa rueh kalamar pakaian neu napakai hang pakiaannu, atawa sapatu, atawa tungkeh. Daya ulun sa bagawi, samula saharusni najamin kawan kaparluanni.

¹¹Amun naun hampe hang tumpuk atawa desa, antara erang kaulun sa hamen narime naun. Uneng baya anri hanye hampe naun tulak lagi.

¹²Tawuk naun masuk ma lewu, eau, ‘Mudahan Tuhan mamberkat naun.’

¹³Amun kawan ulun hang lewu yiru narime naun, elahni lengan salam naun yiru tatap ireket hang here. Kude amun here puang narime naun, ampulek lagi lengan salam naun yiru.

¹⁴Amun naan lewu atawa tumpuk sa puang hamen narime naun atawa puang hamen nyanrengei lengan naun, tanan unengan yiru palus kebas habu teka pee naun.

¹⁵Ingat! Hang Anrau Kiamat, kawan ulun tumpuk Sodom anri Gomora die labis murah naampun daya Alatalla, teka kawan ulun hang tumpuk yiru!”

¹⁶Dinung: Aku ngutus naun kala babiri sa puang badaya, ma penah kawan sarigala. Naun harus hati-hati kala anipe nelang bujur atei kala wurung dara.

¹⁷Ware naun bajaga-jaga, daya naun die najamba palus nainsing nadap Pangadilan Agama. Naun sagar nakahanangen hang kawan lewu sumbayang.

¹⁸Naun sagar nainsing ma hadapan kawan panguasa anri kawan raja daya naun umba aku. Hang yiru naan kasampatan ma naun nampan ngami kasaksian neu aku ma here anri ma kawan ulun sa puang kataru Alatalla.

¹⁹Kude amun naun nainsing neu naadili, ada gaer neu inun sa harus napantane naun, atawa kala awe naun harus bapaner. Daya inun sa harus napantane naun yiru, die sagar nawara ma naun hang tawuk yiru.

²⁰Daya sa pantane hang tawuk yiru puang naun, malengkan Roh Ambah sa hang surga, itetei naun.

²¹Sagar naan kajadian ulun sagar nyarah pulaksanaini raerai nampan nawunu. Kalayiru pada sagar jari ma ambah anri anakni. Kawan anak sagar nawan ineh ambahni, nelang nyarah here nampan nawunu.

²²Naun katuluh sagar jari kakuaren ulun, daya naun umba aku. Kude ulun sa batahan hampe pijumpuhanni sagar nasalamat.

²³Amun naun nasiksa hang isa tumpuk, lempat ma tumpuk sa lain. Aku iwara ma naun: Kapihuan naun litar ngaliling katuluh tumpuk Israel, Anak Murunsia haut hawi.

²⁴Ulun sa umba puang labis tamam teka guruni, nelang palayan puang labis tamam teka tuanni.

²⁵Haut sukup amun ulun sa umba jari kala guru, nelang palayan kala tuan. Amun kapala kaluarga haut nagalar Beelzebul, duanni kaluarga hang lewuni. Here sagar nagalar labis murun lagi.

²⁶“Ada takut ma murunsia. Puang uweng isa pasadina, sa puang sagar dinung, nelang puang uweng rasia sa puang sagar tabungkar.

²⁷Inun sa naeauku hang maieng harus nasangkulek naun tawuk anrau maraai. Inun sa nakeneh hang silu naun, wara yiru litar lalar ma maaru-maati!

²⁸Ada takut ma here sa munu tenga, kude puang bakuasa munu amirue. Ware takut ma Alatalla sa bakuasa ngabinasa hau tenga atawa amirue hang naraka.

²⁹Rueh kaukui angkarei tau nawidi makai duit sapeser. Kude biar kala yiru puang sunah erang kaukui lawu ma tane amun puang nakabahumen Ambahnu hang surga.

³⁰Jumalah wila wulu hang ulunu sika haut naiap katuluhni.

³¹Daya yiru, ada takut! Naun labis baharaga teka kawan angkarei!”

³²“Hie-hie sa mangaku hanye ulun sa umba aku, hang hadapan umum, aku pada sagar ngaku hanye hang hadapan Ambahku hang surga.

³³Kude hie-hie sa ngidim hanye ulun sa umba aku, hang hadapan umum, aku pada sagar ngidim hanye hang hadapan Ambahku hang surga.”

³⁴“Ada minda aku nginsing pidamai ma dunia yiti. Aku puang nginsing pidamai, kude pibaburan.

³⁵Aku hawi ngulah anak upu nawan ambahni, anak wawei nawan inehni, nelang nantu wawei nawan kasianni wawei.

³⁶Jari musuh sa pangatamamni, hanyeyiru kawan kulawaraga raerai.

³⁷Ulun sa sinta ambahni atawa inehni diwi teka hanye sinta aku, puang patut jari ulun sa umba aku. Kala yiru pada ulun sa sinta anakni upu atawa anakni wawei diwi teka hanye sinta aku.

³⁸Ulun sa puang hakun ngantung balasangarni palus umba aku, puang patut jari ulun sa umba aku.

³⁹Ulun sa malihara pamelumni, die sagar kawawaian pamelumni, kude ulun sa kawawaian pamelumni daya hanye satia ma aku, die sagar kaiyuh pamelumni.”

⁴⁰“Ulun sa narime naun, hanye narime aku. Nelang ulun sa narime aku, narime hanye sa ngutus aku.

⁴¹Ulun sa narime nabi daya hanye nabi, die sagar narime kala upa erang kaulun nabi. Kamulek hie sa narime erang kaulun sa maeh daya hanye maeh, die sagar narime kala upa erang kaulun sa maeh.

⁴²Hie-hie sa ngami uuten, biar ekat ranu marisak ma erang kaulun teka kawan ulun hina yiti, daya hanye jari ulun sa umbaku, parisayaleh hanye himat die sagar narime upani!”