Read Ma'anyan MATIUS 12 Bible Online

MATIUS 12 - Ma'anyan bible

MATIUS 12

¹Hang hinra anrau Sabat, tawuk Yesus mitah ume gandum, kawan ulun sa umba hanye nguteh gandum, balalu ngutani daya here kajuju.

²Dami ulun Parisi kadinung yiru, here kaeau nengkan Yesus, “Dinung! kawan ulun sa umba hanyu malangar hukum agama takam nelang ngulah ala sa nauring ngulahni hang anrau Sabat.”

³Yesus nuing, “Huan suah naun mambasa neu inun sa naulah daya Dawid tawuk hanye anri kawan ulun watni kajuju?

⁴Hanye masuk mawuang Lewu Alatalla; balalu nguta rote sa haut nasarah ma Alatalla. Padahal manyu hukum agama takam, hanye atawa kawan ulun watni puang iyuh nguta rote yiru — ekat kawan imam sa iyuh.

⁵Atawa huan suah naun mambasa hawuang hukum Moses tiap anrau Sabat kawan imam sa batugas hang Lewu Tuhan, malangar aturan anrau Sabat, kude puang naampihala?

⁶Pantaru tatuu inun sa naeauku yiti: hang yiti naan sa diwi hante hengka Lewu Tuhan.

⁷Hawuang Surat Barasis nasurat: Ahi lelo sa nakabahumen, puang parapah eha. Amun naun tuu-tuu kataru lengan yiru, himat naun puang sagar ngampi hala kawan ulun sa puang bakahalaen.

⁸Daya Anak Murunsia bakuasa hang ambau anrau Sabat.”

⁹Yesus nanan paunengan yiru balalu tulak ma isa lewu sumbayang.

¹⁰Hang yiru naan ulun sa lumpuh tuhi tanganni. Papire kaulun sa hamen ngantara-tara kahalaen Yesus, nunti nengkan hanye, “Inun iyuh nyamare ulun hang anrau Sabat?”

¹¹Yesus nuing, “Atikalani naan erang kaulun teka naun sa malihara erang kaukui babiri, maka hang anrau Sabat babiri yiru lawu mawuang luwang sa lalem; inun ulun ampun babiri yiru puang sagar ngakali ngaluar babiri yiru teka luwang yiru?

¹²Nah, murunsia diwi baharaga teka babiri! Jari, amun kala yiru, iyuh ngarawah ulun hang anrau Sabat.”

¹³Udi yiru Yesus kaeau ma ulun sa lumpuh tuhi tanganni yiru, “Jurung tangannu.” Ulun yiru nyurung tanganni, balalu tanganni yiru ware sameh kala tanganni sa tuhi.

¹⁴Kude kawan ulun Parisi nanan lewu sumbayang yiru, balalu mapakat neu munu Yesus.

¹⁵Yesus karasa kawan ulun Parisi yiru naan aheng jahat nuju hanye. Jari hanye tulak teka paunengan yiru nelang rama ulun naharak hanye. Balalu hanye nyamare katuluh ulun sa sakit.

¹⁶Kude hanye nguring here iwara neu hanye ma ulun lain.

¹⁷Anri kala yiru balalu tulus inun sa nawara Alatalla itetei Nabi Yesaya,

¹⁸“Hanye yiti utusanku sa napidiku, ulun sa nasintaku nelang nakatujuen ateiku. Rohku sagar naamiku ma hanye, kaadilanku sagar nawarani ma kawan bangsa.

¹⁹Hanye puang sagar basual atawa wawerei lengan, atawa bapidato hang lalan rami.

²⁰Paring sa paetuk puang sagar napepetni palita sa papinit puang sagar natampareni. Hanye sagar ngakali bahimat hampe kaiyuh kaadilan;

²¹kawan bangsa sagar ngimpeh kaharapen witu hanye.”

²²Puang lawah udi yiru naan nainsing nunung Yesus erang kaulun pehe nelang muna sa nakuasa daya roh jahat. Yesus nyamare ulun yiru hampe hanye tau bapaner nelang kadinung.

²³Katuluh ulun wauh balalu kaeau, “Gere hanye yiti anak Dawid sa najanji yiru?”

²⁴Dami kawan ulun Parisi karengei yiru, here nuing, “Ulun yiti ekat tau ngusir roh jahat, daya Beelzebul, kapala kawan roh jahat, haut ngami kuasa yiru ma hanye.”

²⁵Yesus karasa pikiran kawan ulun Parisi yiru. Jari hanye kaeau nengkan here, “Amun isa negara tapisah hawuang papire kalumpuk sa bamusuhan, negara yiru puang sagar kukuh batahan. Kamulek isa tumpuk atawa kaluarga sa tapisah-pisah nelang bamusuhan isa anri sa lain die sagar hansur.

²⁶Kalayiru pada hawuang karajaan Iblis; amun isa kalumpuk ngusir kalumpuk sa lain, maka karajaan Iblis yiru haut tapisah-pisah nelang sagar runtun.

²⁷Naun kaeau aku ngusir roh jahat makai kuasa Beelzebul. Amun kalayiru makai kuasa hie kawan ulun sa umba naun ngusir roh jahat. Kawan ulun sa umba naun yiru mambuktini sa naun samula hala!

²⁸Kude aku ngusir roh jahat makai kuasa Roh Alatalla. Anri kalayiru baarati Alatalla haut nuku marentah hang penah naun.

²⁹Kalaawe ulun tau masuk mawuang lewu erang kaulun sa tingkas gansang umak hanrampas haratani, amun hanye puang labis dahulu nuruk ulun sa tingkas gansang yiru? Udi yiru, wau hanye kaiyuh hanrampas haratani.

³⁰Ulun sa puang umba aku kapinuuni nawan aku. Nelang ulun sa puang ngarawah aku kapinuuni hanye nanrusak pagawianku!

³¹Daya sabab yiru, wuah naun karasa, amun ulun ngulah dosa nelang ngantuh lengan nangkurun Alatalla; atawa ngantuh lengan ngawawarah ngampahe Alatalla, hanye tau naampun! Kude amun hanye nangkurun Roh Alatalla, hanye puang tau naampun!

³²Amun ulun ngantuh ala inun-inun neu nawan Anak Murunsia, hanye tau naampun, kude amun hanye nangkurun Roh Alatalla, hanye puang tau naampun, hau itati hau hang akhirat!”

³³“Nampan kaiyuh wua sa maeh, kakauni harus nenak. Amun kakauni puang nenak, wuani pada puang maeh. Nenak atawa puang nenak kakau yiru taru teka wangun wuani.

³⁴Naun ulun jahat, puang maka naun tau ngantuh kawan hal sa maeh amun naun jahat? Inun sa naantuh daya mulut yiru limpar teka atei!

³⁵Ulun sa maeh ngantuh kawan hal sa maeh daya hanye penu anri pikaeh. Kabalikanni, ulun sa jahat ngantuh kawan hal sa jahat daya hanye penu anri kajahaten.

³⁶Jari, ingat: hang Anrau Kiamat, satiap ulun harus batanggung jawab neu tiap lengan pantaneni sa puang bariran.

³⁷Daya eau lengan pantanenu raerai die sagar napakai neu mamutus inun hanyu bakahalaen atawa puang.”

³⁸Udi yiru papire guru agama anri kawan ulun Parisi kaeau, “Guru, kami hamen kadinung hanyu ngulah kawauhen.”

³⁹“Tuu leha jahat nelang durhakani kawan ulun jaman yiti!” tuing Yesus. “Naun laku aku ngulah kawauhen? Ma naun puang sagar naami sunah isa masam kawauhen, kasuali kawauhen wat Nabi Yunus.

⁴⁰Hi Yunus muneng telu anrau telu malem hawuang wuntung kenah hante. Kalayiru pada Anak Murunsia sagar muneng telu anrau telu malem hawuang tane.

⁴¹Hang Anrau Kiamat, panduduk Niniwe sagar ambuan sinrah kawan ulun jaman yiti palus ngahalaen here. Daya kawan ulun Niniwe yiru haut batobat teka kawan dosa here, tawuk hi Yunus bakhotbah ma here. Kude hang yiti itati naan sa diwi hante teka hi Yunus!

⁴²Hang Anrau Kiamat, ratu teka daerah selatan sagar ambuan sinrah kawan ulun jaman yiti palus ngahalaen here. Daya umak nyanrengei pangajaran Salomo sa pintar, ratu yiru haut nampalus pakaian lawit tatuu teka hujung dunia. Kude hang yiti itati naan sa diwi hante teka hi Salomo!”

⁴³“Amun roh jahat yiru nanan erang kaulun, roh yiru ngaliling kawan unengan sa karing umak ngantara paunengan tarie, kude hanye puang kahaba.

⁴⁴Daya sabab yiru hanye kaeau, ‘Aku sagar mulek lagi ma lewu sa haut natanan.’ Tawuk hanye hampe hang yaru, lewu yiru lawang, barasis nelang taatur maeh.

⁴⁵Balalu hanye tulak nelang nginsing pitu roh lain sa diwi jahat teka hanye. Udi yiru here masuk mawuang ulun yiru, balalu muneng hang yiru. Balalu panampukni wangun ulun yiru diwi jahat teka asalni. Kalayiru pada sagar jari anri kawan ulun jahat jaman yiti.”

⁴⁶Rahat Yesus magun bapaner anri ulun rama yiru, hawi ineh anri kawan pulaksanaini. Here minri hang luar nelang ngakali nampan kaiyuh bapaner anri hanye.

⁴⁷Erang kaulun teka ulun rama yiru kaeau ma Yesus, “Guru, ineh anri kawan pulaksanainu naan hang luar. Here hamen bapaner anri hanyu.”

⁴⁸Balalu Yesus nuing, “Hie inehku? Hie kawan pulaksanaiku?”

⁴⁹Balalu hanye nutui ma kawan ulun sa umba hanye palus kaeau, “Iti ineh anri kawan pulaksanaiku!

⁵⁰Ulun sa nampalus kabahumen Ambahku hang surga, hanyeyiru pulaksanaiku upu, pulaksanaiku wawei, nelang inehku!”