Read Ma'anyan MATIUS 14 Bible Online

MATIUS 14 - Ma'anyan bible

MATIUS 14

¹Hang jaman yiru hi Herodes, panguasa daerah Galilea, karengei neu Yesus.

²Hi Herodes kaeau ma kawan pagawaini, “Himat yiti Yohanes Pambaptis haut welum kamulek! Daya yiru hanye uweng kuasa ngulah kawauhen.”

³Daya dahulu teka yiru hi Herodes nunyu nyamba hi Yohanes nelang nuruk hanye palus namasuk hanye mawuang panjara. Hi Herodes ngulah kalayiru daya gana sual Herodias, matueh wawei pulaksanaini, hanyeyiru hi Filipus.

⁴Daya suah hi Yohanes kaeau kala yiti ma hi Herodes, “Hanyu puang iyuh narangan hi Herodias!”

⁵Sabujurni hi Herodes hamen munu hi Yohanes, kude hanye takut anri ulun rama, daya here nganggap hi Yohanes yiru nabi.

⁶Tawuk hi Herodes pesta anrau ulang tahunni, anak Herodias wawei nanrik hang hadapan ulun rama. Tanrikni yiru tuu maeh ngampi sanang atei Herodes,

⁷hampe hi Herodes bajanji ma hanye makai sumpah, inun sa nalakuni, himat napulur.

⁸Gana narujung daya inehni, iya wawei yiru kaeau, “Aku laku ulu Yohanes Pambaptis naami ma aku itati jua naelah hang ambau baki!”

⁹Karengei pilakuan yiru, hi Herodes balalu bangat mahanang atei. Kude daya hanye haut basumpah hang hadapan ulun rama hanye marentah nampan pilakuan iya wawei yiru napulur.

¹⁰Hanye nunyu ulun tulak ma panjara nampan mumpung ulu Yohanes.

¹¹Udi yiru balalu ulu Yohanes yiru nainsing hang ambau baki palus naami ma iya wawei yiru. Balalu iya wawei yiru palus nginsing ma inehni.

¹²Udi yiru kawan ulun sa umba Yohanes hawi ngalap bangkai Yohanes nelang masarni. Balalu here tulak iwara hal yiru ma Yesus.

¹³Dami Yesus karengei kabar yiru, hanye sungkat mawuang jukung palus nanan kawan ulun sa umba hanye hang unengan yiru, hanye tulak ma unengan sa suni. Kude tawuk ulun rama karengei neu hal yiru, here nanan tumpuk here palus tulak ngapung Yesus mitah lalan entu.

¹⁴Tawuk Yesus minau teka jukung hanye kadinung ulun rama yiru, hanye palelo anri here. Balalu hanye nyamare kawan ulun sakit hengka here rama yiru.

¹⁵Kariwe anrauni, kawan ulun sa umba Yesus hawi nelang kaeau ma hanye, “Anrau haut kariwe nelang hang unengan yiti suni lawit teka ulun. Labis maeh hanyu nunyu ulun rama yiru tulak, nampan kaiyuh midi kutaen hang tumpuk.”

¹⁶“Puang usah here tulak,” eau Yesus, “Naunleh ngami here kutaen.”

¹⁷“Kami ekat uweng dime katipak rote anri rueh kaukui kenah!” tuing kawan ulun sa umba Yesus yiru.

¹⁸“Insing yiru ma yati,” eau Yesus.

¹⁹Udi yiru hanye nunyu ulun rama yiru maharung hang ambau rikut. Balalu hanye ngalap dime katipak rote baya anri rueh kaukui kenah yiru, balalu mihangut ma langit palus ngantuh tarima kasih ma Alatalla. Udi yiru hanye miah rote yiru makai tanganni palus ngami ma kawan ulun sa umba hanye nampan here mambagini ma kawan ulun rama yiru.

²⁰Here katuluh ikuta hampe wising. Udi yiru kawan ulun sa umba Yesus ngumpul kalabihan kutaen yiru; wahaini uweng dua walas tampawan penu.

²¹Ulun sa ikuta tawuk yiru ramani leu dime ribu kaulun, huan tamasuk nareken kawan wawei anri kawan iya.

²²Udi yiru Yesus nunyu kawan ulun sa umba hanye sungkat ma jukung tulak dahulu nyabarang danau, tawuk yiru pada hanye nunyu ulun rama yiru mudi.

²³Dami ulun rama yiru tulak, Yesus mambai ma isa bukit raeraini lepuh badoa. Hampe kamalem, Yesus magun muneng hang yiru raeraini.

²⁴Tawuk yiru jukung sa ngising kawan ulun sa umba Yesus, haut lawit hang penah danau. Jukung yiru kai leteng natampuh galumbang, daya here nawan riwut sa hawi hengka tiba haluan.

²⁵Alur helang pukul telu anri pukul enem kaiyat, Yesus hawi nunung here takia hang ambau ranu.

²⁶Tawuk kawan ulun sa umba hanye kadinung hanye takia hang ambau ranu, here bangat embah. “Alah!” uik here takut.

²⁷Kude Yesus palus nuing, “Suni! Aku Yesus. Ada takut!”

²⁸Balalu hi Petrus kaeau, “Amun hanyu tuu Yesus, huyu aku mayari takia hang ambau ranu.”

²⁹“Tunung ma yati” tuing Yesus. Balalu hi Petrus minau teka jukung, takia hang ambau ranu nunung Yesus.

³⁰Kude tawuk hi Petrus kaingkam riwut mehet tuu hang danau yiru, hanye takut palus kai leteng. “Tuhan, karawah!” tantiakni.

³¹Yesus hinang nyurung tanganni palus nyamba hanye, nelang kaeau, “Petrus, Petrus, hanyu yiti kurang parisaya. Wuah inun hanyu ragu-ragu anri aku?”

³²Balalu here rueh sungkat ma jukung yiru, tawuk yiru jua riwut balalu ranai.

³³Balalu kawan ulun sa umba Yesus ileku ulu elep nyambah hanye. Here kaeau, “Tuu kapinuu Tuhan yiru Anak Alatalla!”

³⁴Dami here hampe hang sabarang danau, here tarie hang Genesaret.

³⁵Maka dami kawan ulun hang yiru kadinung sa hawi yiru Yesus, here iwara kabar yiru ma katuluh daerah hang sakitar tumpuk yiru. Balalu katuluh ulun sa sakit nainsing nunung Yesus.

³⁶Here ilaku teka hanye nampan iyuh ngawir jubahni, biar ekat sunah hujung jubahni. Balalu katuluh ulun sa ngawir jubahni yiru palus ware.