Read Ma'anyan MATIUS 16 Bible Online

MATIUS 16 - Ma'anyan bible

MATIUS 16

¹Naan papire ulun Parisi anri ulun Saduki nunung Yesus ngunu hanjabak hanye. Here ilaku hanye ngulah tanda kawauhen nampan jari bukti sa hanye hawi teka Alatalla.

²Yesus nuing, [“Amun mate anrau leteng, naun kaeau, anrau maeh daya langitni mariang.

³Kamulek hang kaayat anrau, naun kaeau, ‘Anrau yiti die sagar uran, daya langit mariang nelang weweanrau dudup.’ Nah, naun tau maramal kaadaan anrau anri ninung kaadaan langit, padahal kawan tanda jaman puang naun tau maramalni!”]

⁴“Tuu leha jahat nelang durhakani kawan ulun jaman yiti. Naun laku aku ngulah tanda kawauhen. Ma naun puang sagar naami sunah isa tanda kawauhen kasuwali tanda kawauhen nabi Yunus.” Udi kaeau kala yiru Yesus tulak nanan here.

⁵Tawuk kawan ulun sa umba Yesus hampe hang sabarang danau, aruai here kaitung here lalui nginsing rote.

⁶Yesus kaeau ma here, “Hati-hati anri ragi kawan ulun Parisi anri ulun Saduki.”

⁷Karengei lengan Yesus yiru, kawan ulun sa umba hanye balalu bapaner sameh here, “Hanye kaeau kala yiru daya takam puang uweng nginsing rote.”

⁸Yesus karasa inun sa napaner here. Balalu hanye kaeau, “Wuah inun naun rawek daya gana puang uweng rote? Naun kurang parisaya!

⁹Inun naun magun huan kataru? Inun naun puang kaitung neu dime rote sa napiah-piahku ma ulun dime ribu? Pire tampawan kalabihan rote sa nakumpul daya naun?

¹⁰Nelang kamulek kala awe anri pitu rote ma ulun epat ribu yiru? Pire tampawan kalabihan anakuta sa nakumpul naun?

¹¹Wuah inun naun hampe puang kataru sa aku puang bapaner ma naun neu rote? Hati-hati anri ragi kawan ulun Parisi anri Saduki!”

¹²Akhirni kawan ulun sa umba Yesus yiru kataru sa Yesus nunyu here hati-hati puang neu ragi sa neu pakai ngulah rote, kude neu kawan ajaran ulun Parisi anri ulun Saduki.

¹³Yesus tulak ma daerah rite tumpuk Kaisarea Pilipi. Hang yiru hanye nunti ma kawan ulun sa umba hanye, “Manyu eau ulun, Anak Murunsia yiru hie?”

¹⁴Kawan ulun sa umba hanye nuing, “Naan sa kaeau hi Yohanes Pambaptis. Naan pada sa kaeau hi Elia. Sa lain lagi kaeau hi Yeremia, atawa erang kaulun teka kawan nabi.”

¹⁵“Kude manyu naun, aku yiti hie?”

¹⁶Hi Simon Petrus nuing, “Bapak hanyeyiru Raja Panyalamat, Anak Alatalla sa welum.”

¹⁷“Bauntung tuu hanyu, Simon anak Yona!” eau Yesus, “Daya puang jaka murunsia sa iwara hal yiru ma hanyu, malengkan Ambahku hang surga.

¹⁸Daya yiru wuah hanyu karasa, hanyu yiti Petrus, watu sa segah. Hang ambau watu yiti aku sagar ngambuan gerejaku sa puang tau nasantalau; biar daya pampatei sika puang!

¹⁹Aku sagar ngami ma hanyu kunsi teka dunia Wau Wat Alatalla. Inun sa nauringnu hang ambau tane, pada nauring hang surga. Kamulek inun sa naeaunu iyuh hang ambau tane, pada iyuh hang surga.”

²⁰Udi yiru Yesus ngampi itung kawan ulun sa umba hanye nampan here puang iwara ma hie-hie sa hanye Raja Panyalamat.

²¹Nuku teka tawuk yiru, Yesus kaeau tarus tarang ma kawan ulun sa umba hanye, hanye harus tulak ma Yerusalem palus kaingkam wahai kahanangen daya kawan pamimpin, kawan imam kapala nelang kawan guru agama. Hanye sagar nawunu, kude hang anrau katelu hanye sagar naele kaelan welum mulek.

²²Balalu hi Petrus nginsing Yesus ma pinggir palus nagur hanye, eauni, “Ada bahara Alatalla nyanawit hal yiru, Tuhan! Ada budas hal yiru hampe wuah Tuhan!”

²³Yesus ikulik balalu kaeau ma hi Petrus, “Hulu teka yiti, tukang purija! Hanyu nahalang aku. Pikirannu yiru pikiran murunsia, puang pikiran Alatalla!”

²⁴Udi yiru Yesus kaeau ma kawan ulun sa umba hanye, “Ulun sa hamen umba aku, harus puang ngitung kapantinganni raerai, mikul balasangarni, nelang palus umba aku.

²⁵Daya ulun sa hamen malihara pamelumni sagar kawawaian pamelum. Kude ulun sa nyarah pamelumni gana aku sagar kaiyuh pamelum.

²⁶Inun untungni ma ulun yiru, amun katuluh dunia yiti jari milikni, kude hanye kawawaian pamelumni? Inun tau pamelum yiru nahurup makai ala lain?

²⁷Puang lawah lagi Anak Murunsia, baya anri kawan malekatni sagar hawi makai kuasa Ambahni. Tawuk yiru hanye sagar iwaleh ma katantuluh ulun manyu pagawianni.

²⁸Patut naun karasa! Teka naun hang yiti naan sa puang sagar matei, amun huan kadinung Anak Murunsia hawi kala Raja.”