Read Ma'anyan MATIUS 17 Bible Online

MATIUS 17 - Ma'anyan bible

MATIUS 17

¹Enem anrau udi yiru Yesus nginsing hi Petrus anri hi Yakobus baya pulaksanaini hi Yohanes, here raerai tulak ma isa gunung sa ambau.

²Hang hadapan here, wangun Yesus baubah: Uruwawani basahaya nyiar maraai kala mate anrau nelang pakaianni mahilak mamilau.

³Udi yiru katelu kaulun ulun sa umba hanye yiru kadinung hi Moses anri hi Elia bapaner anri Yesus.

⁴Balalu hi Petrus kaeau nengkan Yesus, “Tuhan, marauh tuu takam hang yiti. Amun Tuhan hamen, aku ngunu ngulah telu punduk hang yiti isa ma Tuhan, isa ma hi Moses, nelang isa lagi ma hi Elia.”

⁵Tawuk hi Petrus rahat bapaner, rukun sa maraai tatuu nyalumbu here balalu teka rukun yiru naan rengei lengan sa kaeau, “Hanye yiti Anakku sa nasintaku. Hanye ngampi sanang ateiku. Rengei hanye!”

⁶Tawuk kawan ulun sa umba Yesus karengei lengan yiru, here takut tatuu hampe tumbang tasaleep ma tane.

⁷Kude Yesus hawi palus nigung here. “Ambuan,” eauni, “Ada takut!”

⁸Dami here naniuh, here puang uweng kadinung hie-hie lagi, ekat Yesus raerai.

⁹Tawuk here minau teka gunung yiru, Yesus ngampi itung here, “Ada iwara ma hie-hie inun sa haut dinung naun hunien, kapihuan Anak murunsia naele kaealan teka pampatei.”

¹⁰Kawan ulun sa umba Yesus nunti ma hanye, “Wuah inun kawan guru agama kaeau hi Elia musti hawi labis dahulu?”

¹¹Yesus nuing, “Samula hi Elia hawi nelang hanye sagar ngampi beres ala katantuluh.

¹²Kude aku kaeau ma naun, hi Elia haut hawi, kude kawan ulun rama puang kataru hanye; here nampalus ma hanye manyu kala kabahumen here nelang kalayiru pada here nampalus ma Anak Murunsia.”

¹³Balau kawan ulun sa umba yiru kataru Yesus maner neu hi Yohanes Pambabtis.

¹⁴Tawuk Yesus anri katelu ulun sa umba hanye mulek nunung ulun rama yiru, naan erang kaulun upu hawi, ileku hang hadapan Yesus,

¹⁵nelang kaeau, “Guru, palelo anakku. Hanye iweken. Panyakit yiru maham tuu gaha ngahanangen hanye hampe hanye gaha tatuu tumbang ma apui nelang gaha lawu mawuang ranu.

¹⁶Aku haut nginsing hanye nunung kawan ulun sa umba hanyu kude here puang kaiyuh nyamare hanye.”

¹⁷Yesus nuing, “Tuu leha naun yiti! Naun tuu-tuu kawan ulun sa tawang nelang puang parisaya. Hampe awe aku harus muneng baya naun nelang basabar anri naun? Insing iya yiru ma yati!”

¹⁸Balalu Yesus marentah roh jahat sa hawuang iya yiru kaluar. Balalu roh jahat yiru kaluar, palus iya yiru ware tawuk yiru jua.

¹⁹Udi yiru kawan ulun sa umba Yesus hawi suni-suni nunung hanye palus nunti ma hanye, “Guru, inun ngulah kami puang kaiyuh ngundur roh jahat yiru?”

²⁰Yesus nuing, “Daya naun kurang parisaya. Ingat! Amun naun naan iman sunah hena diki sasawi, naun tau kaeau anri bukit yiti, ‘Miidar ma yaru!’ himat bukit yiti miidar. Puang uweng sa puang tau naulah daya naun!

²¹Kude roh jahat sa kalayiti, ekat iyuh naundur daya Badoa nelang puasa.”

²²Tawuk kawan ulun sa umba Yesus bakumpul hang Galilea, Yesus kaeau ma here, “Puang lawah lagi, Anak Murunsia sagar nasarah ma kuasa murunsia.

²³Hanye sagar nawunu, kude hang anrau katelu hanye sagar naele welum kamulek.” Daya yiru kawan ulun sa umba hanye balalu bangat mahanang atei.

²⁴Tawuk Yesus anri kawan ulun sa umba hanye hampe hang Kapernaum, kawan tukang tagis pajak Lewu Tuhan hawi nunung hi Petrus palus nunti, “Gurunu bayar pajak Lewu Tuhan atawa puang?”

²⁵Hi Petrus nuing, “Bayar!” Tawuk hi Petrus mudi, Yesus badahulu mantane hanye, “Simon, kalaawe pandapatnu? Hie sa harus bayar bea atawa pajak ma kawan raja dunia yiti? Rakyat atawa ulun luar?”

²⁶“Ulun luar,” tuing Petrus. “Amun kala yiru,” eau Yesus, “rakyat puang parlu bayar.

²⁷Kude ada budas takam manyinggung pangingkaman kawan ulun yiru. Ware hulu tulak ma danau lepuh mintan. Alap kenah sa pangadahulu iyuhnu. Hawuang wawa kenah yiru hanyu sagar kahaba duit sa sukup pakai bayar pajak wat tarueh. Alap duit yiru palus bayar ma here pajak takam ma Lewu Tuhan.”