Read Ma'anyan MATIUS 18 Bible Online

MATIUS 18 - Ma'anyan bible

MATIUS 18

¹Tawuk yiru kawan ulun sa umba Yesus hawi nunung hanye palus nunti, “Hie sa naanggap panga hante teka kawan ulun Wat Alatalla?”

²Yesus nerau erang kaulun iya rumis, palus ngapinri hanye hang hadapan here.

³Balalu yesus kaeau, “Parisayaleh! Ekat amun naun miubah nelang jari kala iya rumis, naun sagar jari ulun wat Alatalla.

⁴Ulun sa nyanrandah dirini nelang jari kala iya yiti, hanye sa pangahante teka kawan ulun wat Alatalla.

⁵Kamulek ulun sa narime iya kala yiti daya gana aku, baarati hanye narime aku.”

⁶“Hie sa ngulah sabab isa teka kawan ulun sa rumis yiti puang parisaya lagi ma aku, labis maeh amun watu gilingan naawet hang diungni palus hanye nasaneteng hang laut sa lalem.

⁷Tuu silaka dunia yiti daya gana kawan hal sa ngulah sabab ulun badosa. Samula hal sa kalayiru sagar saratang naan, kude silaka ma ulun sa ngulah sabab ulun badosa.

⁸Amun tangannu atawa peenu ngulah hanyu badosa, tetek palus umpe. Daya diwi maeh hanyu welum baya Alatalla puang uweng tangan tuhi atawa pee tuhi, teka hanyu naumpe ma apui naraka baya kararueh tangan atawa kararueh peenu.

⁹Kamulek amun mateinu ngulah sabab hanyu badosa, garuit palus umpe. Labis maeh hanyu welum baya Alatalla anri isa matei teka hanyu naumpe ma apui naraka baya kararueh mateinu.”

¹⁰“Ingat! Ada mahina sunah isa teka kawan ulun sa rumis yiti. Daya itung naun, kawan malekat here saratang naan hang hadapan Ambah hang surga. [

¹¹Daya Anak Murunsia hawi nampan nyalamat ulun sa tawang!]

¹²Kalaawe pandapat naun? Umpamani naan erang kaulun uweng jatuh kaukui babiri, balalu erang kaukui teka kawan babiri yiru tawang, inun sa sagar naulah daya ulun yiru? Himat hanye nanan babiri suei pulu suei kaukui yiru hang padang rikut palus tulak ngantilau sa tawang yiru.

¹³Maka amun babiri yiru habani — parisaya ma aku — hanye sagar labis arai gana babiri erang kaukui yiru hengka gana suei pulu suei kaukui sa puang tawang yiru.

¹⁴Kalayiru pada Ambahnu sa hang surga puang hamen sunah isa teka kawan-ulun sa wau parisaya ma aku yiti tawang.”

¹⁵“Amun pulaksanainu badosa anri hanyu, kia tunung hanye palus wara kahalaenni. Tampalus kala yiru anri suni-suni hang naun rueh raerai. Amun hanye nuu ngalut kawan lengannu, maka hanyu bahasil kaiyuh pulaksanainu yiru mulek.

¹⁶Kude amun puang, insing isa atawa rueh kaulun lagi. Daya hawuang Surat Barasis nasurat, ‘Sakurang-kurangni rueh atawa telu saksi sa naparlu neu iwara erang kaulun sa nadawa yiru hala.’

¹⁷Amun hanye puang narime nasehat kawan ulun yiru, wara hal yiru ma ungkup. Kude amun hanye puang hamen narime nasehat ungkup, anggap hanye sameh kala tukang tagis pajak atawa erang kaulun sa puang kataru Alatalla.”

¹⁸“Patut naun karasa: Inun sa nauring naun hang dunia, yiru pada nauring hang surga. Kamulek inun sa naeau naun iyuh hang dunia, yiru pada iyuh hang surga.

¹⁹Kamulek patut naun karasa pada: Amun hang sasameh naun hang dunia yiti rueh kaulun mira pakat neu inun heneng nelang badoa neu yiru, doa yiru sagar napulur daya Ambahku hang surga.

²⁰Daya hang awe naan rueh atawa telu kaulun bakumpul daya gana aku, aku naan hang penah-penah here.”

²¹Udi yiru hi Petrus hawi nunung Yesus palus nunti, “Tuhan, amun pulaksanaiku badosa ma aku, hampe hampire kali aku harus ngampun hanye? Inun cukup hampe hampitu kali?”

²²Yesus nuing, “Puang, puang ekat hampe hampitukali, kude hampitumpulu kali pitu kali!

²³Daya amun Alatalla marentah, kaadaanni sameh kala hawuang rarapisan yiti: Erang kaulun raja hamen ngampi beres utang kawan walahni.

²⁴Tawuk hanye nuku nampalus pamariksaan, hawi ma hadapan hanye erang kaulun walah sa utangni bajuta-juta,

²⁵walah yiru puang kaiyuh bayar punah utangni. Jari, raja yiru marentah nampan walah yiru naari namput baya kawan daranganni, anri kawan harata milikni pakai bayar utangni.

²⁶Walah yiru ileku ulu alep ijuku hang hadapan raja yiru, nelang ilaku, ‘Tuan, anrei dulu. Aku sika sagar bayar punah katuluh utangku.’

²⁷Raja yiru palelo ma hanye, balalu hanye ngempas katuluh utangni.

²⁸Tawuk walah yiru kaluar, hanye panalu anri hengauni, erang kaulun walah pada, sa naan utang ma hanye papire ribu. Hanye nyamba hengauni yiru, ngeat hanye, nelang kaeau, ‘Bayar katuluh utangnu!’

²⁹Balalu hengauni yiru ileku ulu alep ijuku hang hadapanni nelang ilaku, ‘Anrei duluni sobat, katuluh utangku sagar aku bayar!’

³⁰Kude walah yiru puang hakun. Likan hanye namasuk hengauni yiru ma wuang panjara hampe hanye bayar kawan utangni.

³¹Dami kawan walah lain kadinung inun sa haut jari, here mahanang atei nelang malapor hal yiru ma raja.

³²Balalu raja yiru nerau walah sa jahat yiru palus kaeau ma hanye, ‘Walah sa jahat! Katuluh utangnu haut naempasku daya gana hanyu ilaku teka aku.

³³Angneh hanyu pada harus uweng lelo ahi anri hengaunu sameh kala aku pada haut uweng lelo ahi anri hanyu?’

³⁴Raja yiru tuu sangit. Walah sa jahat yiru natamasukni mawuang panjara hampe hanye bayar punah kawan utangni.”

³⁵Yesus nyanuput saritani makai lengan yiti, “Kalayiru pada Ambahku hang surga sagar nampalus ma naun katuluh, amun naun puang rela ngampun pulaksanainu anri ikhlas.”