Read Ma'anyan MATIUS 19 Bible Online

MATIUS 19 - Ma'anyan bible

MATIUS 19

¹Dami haut luput Yesus iwara katuluhni yiru, hanye nanan Galilea balalu tulak ma daerah Yudea hang sabarang Hungei Yordan.

²Rama ulun naharak hanye, nelang hanye nyamare here hang yaru.

³Balalu kawan ulun Parisi hawi ngunu hanjabak hanye. Here nunti, “Manyu hukum agama takam, inun iyuh ulun sarak anri daranganni daya babaran tujuan?”

⁴Yesus nuing, “Inun naun huan uweng mambasa hawuang Surat Barasis neu Alatalla sa ngulah murunsia, asalni hanye ngulah upu anri wawei?

⁵Balalu udi yiru hanye kaeau, ‘Daya sabab yiru ulun upu nanan ineh-ambahni palus baya anri matueh waweini, balalu here rueh jari isa.’

⁶Jari here puang lagi rueh kaulun, malengkan isa. Daya yiru sababni inun sa haut natamaya daya Alatalla puang iyuh lagi natampisah daya murunsia.”

⁷Balalu kawan ulun Parisi nunti ma hanye, “Amun kala yiru wuah inun hi Moses nunyu ulun ngami surat pisarakan ma daranganni sa naumpeni?”

⁸Yesus nuing, “Hi Moses ngami izin ma naun sarak-tuar anri darangan naun daya naun bangat mahadin naajar. Kude sabujurni puang kala yiru teka mula asalni.

⁹Jari, rengei lengan yiti: Hie sa sarak anri matueh waweini padahal wawei yiru puang ibela balalu kawin lagi anri sa lain, ulun yiru ibela.”

¹⁰Balalu kawan ulun sa umba Yesus kaeau ma hanye, “Amun sual hubungan ilaki-wawei samula kala yiru, labis maeh puang usah kawin.”

¹¹Yesus nuing, “Puang katuluh ulun sa tau narime kawan lengan yiru, ekat kawan ulun sa haut natukas daya Alatalla.

¹²Daya samula naan ulun sa puang tau kawin, basa here samula nakayaan kala yiru. Naan pada sa puang tau kawin daya hanye naulah kala yiru daya ulun lain. Nelang naan kamulek sa hanye raerai nukas neu puang kawin, nampan tau malayanni Alatalla. Ulun sa sanggup narime pangajaran yiti, ware hanye narimeni.”

¹³Naan papire kaulun nginsing kawan iya nunung Yesus nampan hanye hanrapak tanganni hang ambau ulu here palus badoa ma here. Kude kawan ulun sa umba Yesus nyangit kawan ulun yiru.

¹⁴Balalu Yesus kaeau ma kawan ulun sa umba hanye, “Elahni kawan iya yiru hawi nunung aku! Ada nguring here, daya kawan ulun sa kalayiti sa jari ulun wat Alatalla.”

¹⁵Balalu Yesus hanrapak tanganni hang ambau ulu kawan iya yiru palus mamberkat here. Udi yiru hanye tulak teka paunengan yiru.

¹⁶Hang hinra anrau erang kaulun upu hawi nunung Yesus. “Guru,” eauni, “Inun pagawian maeh sa harus natampalusku nampan aku kaiyuh narime pamelum sajati palus ma kalalawah?”

¹⁷Yesus nuing, “Wuah inun hanyu nunti teka aku neu inun sa maeh? Ekat naan isa, sa maeh. Amun hanyu hamen welum, hanyu harus ngalut nuu kawan parentah Alatalla.”

¹⁸“Parentah saawe yiru?” tunti ulun yiru. Yesus nuing, “Ada munu ulun, ada ibela, ada ngalat, ada ipusu,

¹⁹hormat ambah anri inehnu; nelang sinta anri sasamehnu murunsia sameh kala hanyu sinta tenga dirinu raerai.”

²⁰“Katantuluh parentah yiru haut natampalusku,” tuing pamuda yiru. “Inun lagi saperlu natampalusku?”

²¹Yesus kaeau ma hanye, “Amun hanyu hamen jari paruna, hulu ari katuluh milik hartanu. Balalu duitni ami ma ulun paua, maka hanyu sagar kaiyuh harata hang surga. Udi yiru hanyu umba aku!”

²²Karengei lengan yiru, pamuda yiru tulak anri mahanang atei daya hanye tatau tatuu.

²³Balalu Yesus kaeau ma kawan ulun sa umba hanye, “Aku kaeau ma naun, tuu mahadin ma ulun tatau jari ulun wat Alatalla.

²⁴Kamulek ina lagi sa hamen nawaraku ma naun, labis murah erang kaukui unta masuk luang pilus, teka erang kaulun tatau masuk Dunia Wau wat Alatalla.”

²⁵Dami kawan ulun sa umba hanye karengei lengan Yesus yiru, here mandam. “Amun kala yiru,” eau here, “hie sa tau salamat?”

²⁶Yesus maneneng here balalu kaeau, “Ma murunsia yiru mustahil! Kude ma Alatalla, puang uweng sa mustahil.”

²⁷Balalu hi Petrus kaeau, “Dinung, kami haut nanan ala katantuluh gana umba hanyu kude inun sa sagar natarime kami?”

²⁸Yesus kaeau ma here, “Parisayaleh: Hang Dunia sa Wau, Anak Murunsia sagar maharung hang ambau padudusanni sa mulia. Tawuk yiru naun kawan ulun sa umba aku sagar maharung hang ambau dua walas padudusan palus mahakimi kadua walas suku bangsa Israel!

²⁹Kamulek katantuluh ulun sa haut nanan lewu, atawa pulaksanaini upu atawa wawei, atawa ineh-ambahni, atawa kawan anakni, atawa ume taunni daya gana aku, ulun yiru sagar narime kamulek jatuh kali lipat. Nelang hanye sagar narime pada pamelum sajati palus ma kalalawah.

³⁰Kude rama ulun itati sa pangadahuluni sagar jari sa pangahanrianni nelang itati sa pangahanrianni jari sa pangadahulu”