Read Ma'anyan MATIUS 2 Bible Online

MATIUS 2 - Ma'anyan bible

MATIUS 2

¹Yesus nakayaan hang tumpuk Betlehem hang tane Yudea; sa jari raja hang jaman yiru hanyeyiru hi Herodes. Hang tawuk yiru papire ahli ilmu bintang teka timur hawi ma Yerusalem.

²Here nunti, “Hang awe iya yiru, sa nakayaan umak jari raja ulun Yahudi? Kami haut kadinung bintangni hulet hang tiba timur, kami hawi neu nyambah hanye.”

³Dami Raja Herodes karengei kabar yiru, hanye embah tatuu, kalayiru pada katuluh ulun hang Yerusalem.

⁴Hanye nunyu katuluh imam kapala anri kawan guru agama bangsa Yahudi hawi bakumpul. Balalu hanye nunti ma here, “Hang awe Raja sa najanji yiru sagar nakayaan?”

⁵Here nuing, “Hang tumpuk Betlehem hang tane Yudea. Daya kalayiti lengan sa nasurat daya nabi,

⁶‘Hanyu Betlehem, hang tane Yudea, hanyu budas puang sa pangarumis tumpuk teka kawan tumpuk hang Yudea. Daya teka hanyu sagar hawi erang kaulun pamimpin sa sagar mamimpin ulun pidianku Israel.’ ”

⁷Dami kaiyuh katarangan kalayiru, hi Herodes nerau kawan ahli bintang teka timur yiru suni-suni. Balalu hanye nunti ma here hantamian here mulai kadinung bintang yiru.

⁸Udi yiru hanye nunyu here hampi Betlehem nelang ipesen kalayiti, “Hulu tulak, antara iya yiru hampe haba. Amun haut haba, wara ma aku, nampan aku pada tulak lepuh nyambah hanye.”

⁹Balalu here tulak. Here kadinung lagi bintang sa suah dinung here hang tiba timur. Bintang yiru badahulu teka here, balalu tarie pas pintangan umbung unengan iya yiru.

¹⁰Tuu leha arai here kadinung bintang yiru!

¹¹Here masuk mawuang lewu yiru palus kadinung iya yiru baya inehni hi Maria. Here ileku nyambah iya yiru, udi yiru here nguka unengan harata here, palus nyarah amas, kamanyan anri mur.

¹²Alatalla ngampi itung here hawuang upi nampan here ada miulek nunung hi Herodes. Jari here balalu mudi mitah lalan lain.

¹³Udi kawan ahli bintang yiru tulak, malekat Tuhan nantarang tenga ma hi Yosef hawuang upi. Malekat yiru kaeau, “Hi Herodes ngunu ngantilau iya yiru nampan munu hanye. Daya yiru ambuan, insing iya yiru baya inehni rari basingkir ma Mesir. Uneng hang yaru hampe aku bapaner lagi anri hanyu.”

¹⁴Hi Yosef ambuan, palus hang malem yiru jua tulak nginsing iya yiru baya inehni rari basingkir ma Mesir.

¹⁵Here muneng hang yaru hampe hi Herodes matei. Kalayiru tulus tuu inun sa nawara Tuhan itetei nabini, kalayiti, “Aku nerau Anakku teka Mesir.”

¹⁶Dami hi Herodes karasa kawan ahli bintang teka timur yiru nipu hanye, hanye sangit tatuu. Balalu hanye marentah nampan munu katuluh kawan iya upu sa baumur rueh taun maimbe hang Betlehem nelang sakitarni. Yiru sasuai anri katarangan sa iyuhni teka kawan ahli bintang yiru neu wayah bintang yiru mulai dinung.

¹⁷Jadi anri kalayiru tulus inun sa suah nawara daya nabi Yeremia, kalayiti,

¹⁸“Hang Rama naan rengei lengan tangis tungkau. Hi Rahel nangis kawan anakni; hanye puang hamen narariu, daya here puang uweng lagi.”

¹⁹Dami hi Herodes haut matei, tawuk hi Yosef magun hang Mesir erang kaulun malekat Tuhan nantarang tengani lagi ma hi Yosef hawuang upi.

²⁰Malekat yiru kaeau, “Kawan ulun sa ngunu munu iya yiru haut matei. Daya yiru ambuan, alap iya yiru baya inehni palus insing here mudi ma Israel.”

²¹Maka hi Yosef ambuan, balalu nginsing iya yiru baya hi Maria mudi ma Israel.

²²Kude dami hi Yosef karengei hi Arkelaus, anak Herodes nganti ambahni jari raja hang tane Yudea. Hi Yosef takut mudi ma yaru. Udi hanye haut kaiyuh patitah teka Tuhan hawuang upi, hanye tulak ma daerah Galilea.

²³Hang yaru hanye muneng hang tumpuk sa bangaran Nazaret. Anri kalayiru balalu tulus inun sa nawara daya kawan nabi neu iya yiru: “Hanye sagar naantuh ulun Nazaret.”