Read Ma'anyan MATIUS 20 Bible Online

MATIUS 20 - Ma'anyan bible

MATIUS 20

¹“Amun Alatalla marentah, kaadaanni sameh kala rarapisan yiti: Erang kaulun uweng kabun anggur hanye tulak kaiyat lepuh ngantara ulun pakai bagawi hang kabun anggurni.

²Udi hanye haut satuju bayar ma here erang kadiki duit perak upa erang anrau, hanye nunyu here bagawi hang kabun anggurni.

³Pukul suei kaiyat, ampun kabun yiru tulak kamulek, palus kadinung papire kaulun rahat nganggur hang pasar,

⁴balalu hanye kaeau ma here, ‘Hulu naun bagawi hang kabun anggurku. Aku sagar bayar ma naun anri upa sa patut.’

⁵Here balalu tulak. Pukul dua walas penah anrau nelang pada pukul telu kariwe, ampun kabun yiru kaluar lagi nelang nampalus hal sameh kala sa dahulu.

⁶Dami leu pukul dime kariwe, hanye kaluar lagi nelang kadinung magun naan ulun sa nganggur. Balalu hanye nunti ma here, ‘Wuah inun naun hampe erang anrau tatap minri hang yiti nelang puang uweng ulahan?’

⁷Kawan ulun yiru nuing, ‘Puang uweng ulun sa nunyu kami bagawi.’ ‘Amun kala yiru,’ eau ampun kabun yiru, ‘hulu naun bagawi hang kabun anggurku.’

⁸Dami anrau haut kariwe ampun kabun anggur yiru kaeau ma mandurni, ‘Herau kawan ulun bagawi yiru bayar upa here maisasaan, nuku teka ulun sa pangahanrianni hampe sa pangadahuluni masuk bagawi.’

⁹Balalu hawi kawan ulun bagawi sa nuku bagawi hengka pukul dime kariwe. Here tiap tenga narime upa ereng kadiki duit perak.

¹⁰Udi yiru hawi pada kawan ulun upaan sa bagawi nuku teka kaiyat. Here bapikir here sagar narime upa diwi teka kawan hengau here. Kude here pada ekat naami erang kadiki duit perak.

¹¹Tawuk narime duit yiru, here mangomel anri ampun kabun,

¹²‘Kawan ulun bagawi sa hawi pangahanrianni yiru ekat bagawi erang jam. Sadang kami bagawi tungkas erang anrau ngumbung laing mate anrau, Tuan bayar ma here sameh kala ma kami!’

¹³Ampun kabun yiru nuing ma erang kaulun teka here yiru, ‘Sobat, aku puang uweng kahalaen anri hanyu. Angneh hanyu haut satuju narime upa erang kadiki duit perak upa bagawi erang anrau?

¹⁴Nah, alap upanu, nelang hulu tulak. Aku samula hamen ngami ma ulun sa pangahanrianni masuk bagawi yiru upa sa sameh anri sa naamiku ma hanyu.

¹⁵Inun aku puang iyuh ngulah inun sa nakabahumenku anri ala sa watku? Atawa hanyu muar, daya aku matau maeh atei?’ ”

¹⁶Balalu Yesus kaeau kamulek, “kala yiru pada kawan ulun sa pangahanrianni sagar jari pangadahuluni, nelang kawan ulun sa pangadahuluni sagar jari sa pangahanrianni.”

¹⁷Tawuk Yesus nuju ma Yerusalem, hang penah lalan hanye nerau kadua walas kaulun ulun sa umba hanye bakumpul ngaraerai. Balalu hanye kaeau nengkan here.

¹⁸“Rengei mamaeh! takam itati nuju Yerusalem Hang yaru Anak Murunsia sagar nasarah ma kawan imam kapala anri kawan guru agama. Balalu hanye sagar nahukum mati,

¹⁹udi yiru nasarah ma kawan ulun luar sa puang Yahudi. Here sagar ngasese hanye, nyiksa hanye palus nyalib hanye. Kude hang anrau katelu hanye sagar naele welum kamulek.”

²⁰Udi yiru matueh wawei Zebedeus hawi anri kawan anakni nunung Yesus. Hang hadapan Yesus hanye ileku ulu alep ijuku ilaku inun-inun.

²¹“Hanyu hamen inun?” tunti Yesus. Ineh Yakobus yiru nuing, “Aku hamen kararueh anakku yiti maharung hang tiba kawi nelang tiba kawannu amun hanyu jari Raja hanrian anrau.”

²²“Naun puang kataru inun sa nalaku naun,” eau Yesus ma here. “Inun naun sanggup nguut teka sangkir kahanangen sa harus nauutku?” “Sanggup,” tuing here.

²³Yesus kaeau, “Samula tuu naun sagar nguut pada teka sangkirku. Kude neu hie sa sagar maharung hang tiba kawi nelang tiba kawanku, yiru puang aku sa nukasni. Kawan paunengan yiru samula ma kawan ulun sa haut natukas daya Ambahku.”

²⁴Tawuk sapuluh kaulun ulun sa umba hanye sa lain karengei neu hal yiru, here sangit anri rueh kaulun ipulaksanai yiru.

²⁵Daya yiru Yesus nerau here katuluh balalu kaeau, “Naun karasa samula kawan pamimpin bangsa sa puang kataru Alatalla nehek nyere rakyatni. Nelang kawan pambesar ngirep here.

²⁶Kude naun puang iyuh kalayiru. Kabalikanni, ulun sa hamen jari hante hang penah naun, harus jari palayan naun.

²⁷Kamulek ulun sa hamen jari sa pertama hang penah naun, harus jari walah naun.

²⁸Sameh kala Anak Murunsia yiru pada; hanye hawi puang neu nalayanni, kude neu malayanni, nelang nyarah hewukni nampan mambebas ulun rama.”

²⁹Tawuk here tulak nanan Yerikho, rama ulun naharak Yesus.

³⁰Naan rueh kaulun pehe rahat maharung hang pinggir lalan. Tawuk here karengei Yesus mitah, here nanterau, “Anak Dawid, palelo kami!”

³¹Ulun rama sanaan hang yiru nyangit here nelang nunyu hanye suni. Kude here nanterau magin mehet lagi, “Tuan, Anak Dawid, palelo kami!”

³²Balalu Yesus tarie palus nerau here. “Inun sa naaheng naun naulahku manaun?” tunti Yesus.

³³Here nuing, “Tuan, kami hamen kadinung!”

³⁴Yesus palelo anri here, balalu muhut matei here makai kingkingni. Tawuk yiru jua here tau kadinung. Balalu here umba Yesus.