Read Ma'anyan MATIUS 21 Bible Online

MATIUS 21 - Ma'anyan bible

MATIUS 21

¹Dami haut rite Yerusalem, here hampe Betfage hang Bukit Zaitun. Hang yiru Yesus nunyu rueh kaulun ulun sa umba hanye tulak dahulu.

²“Hulu kia ma desa sa naan hang hadapan yaru,” eau Yesus ma here. “Maka naun sagar kadinung erang kaukui keledai bahuruk baya anri anakni. Uka kararuehni palus insing ma yati.

³Amun naan ulun nunti, wara ma hanye, ‘Tuhan parlu makaini,’ balalu ulun yiru anri hinang nunyu nginsing keledai yiru.”

⁴Kalayiru nampan tulus inun sahaut nawara daya nabi kalayiti,

⁵“Wara ma tumpuk Sion, Rajanu hawi nunung hanyu. Hanye randah atei nelang nunggang erang kaukui keledai, erang kaukui anak keledai sa lagi iya,”

⁶Udiyiru karueh ulun sa umba yiru tulak nelang nampalus kala sa napesen Yesus ma here.

⁷Here nginsing keledai yiru baya anri anakni. Balalu here napik punggung kawan keledai yiru makai jubah here. Udiyiru Yesus sungkat ma punggung keledai.

⁸Rama ulun hang yaru merang kawan jubah here hang lalan, nelang kawan ulun lain netek kawan raan-jangkeng kayu palus nataini hang penah lalan.

⁹Ulun rama sa takia hang hadapan nelang hang wuku Yesus anri lengan mehet kaeau, “Welum Anak Dawid! Naberkat hanye sa hawi hawuang ngaran Tuhan! Tawat ma Alatalla hang unengan sa pangaambau!”

¹⁰Balalu, tawuk Yesus masuk ma Yerusalem katuluh tumpuk yiru ridu rareh. “Hie hanye yiti?” tunti kawan ulun hang tumpuk yiru.

¹¹“Hanye Nabi Yesus, teka Nasaret hang Galilea,” tuing ulun rama sa ngarairing Yesus.

¹²Kamulek Yesus masuk ma Lewu Tuhan, palus ngundur katuluh ulun sa badagang hang yiru. Hanye maleng kawan meja ulun panurup duit, kawan bangku ulun pangari wurung dara.

¹³Balalu hanye kaeau ma kawan ulun yiru, “Hawuang Surat Barasis naan nasurat Alatalla kaeau, ‘Lewuku sagar naantuh lewu unengan badoa.’ Kude naun ngulahni jari hanai parampok!”

¹⁴Kawan ulun pehe anri ulun lumpuh hawi nunung Yesus hang Lewu Tuhan, palus hanye nyamare here.

¹⁵Kude kawan imam kapala anri kawan guru agama sangit kadinung tanda kawauhen sa naulah Yesus. Balalu here pada sangit karengei kawan iya basurak hang Lewu Tuhan, “Welum Anak Dawid!”

¹⁶Here kaeau nengkan Yesus, “Hanyu karengei inun sa naeau daya here?” “Hiai, aku karengei,” tuing Yesus. “Inun naun huan suah mambasa ayat Surat Barasis kalayiti: ‘Kawan iya anri genda haut naajarku nampan ngantuh tawat hormat sa paruna’?”

¹⁷Udi yiru Yesus nanan here balalu kaluar tulak teka tumpuk yiru ma Betania palus amalem hang yaru.

¹⁸Dami anrau kaiyat hang anrau kauni, hawuang pakiaan mulek ma tumpuk, Yesus kajuju.

¹⁹Hanye kadinung erang kakau ara hang iring lalan. Hanye ikule ma kakau ara yiru, kude hanye puang kahaba sunah erang kawua, ekat kawan rawenni. Balalu Yesus kaeau ma kakau ara yiru, “Hanyu puang sagar mua lagi!” Palus sitaitu kakau ara yiru layu.

²⁰Tawuk kawan ulun sa umba Yesus kadinung kajadian yiru, here wauh tatuu. “Kalaawe wangun kakau ara yiru salenga sitaitu patei?” tunti here.

²¹“Kapinuuni,” tuing Yesus, “Amun naun parisaya nelang puang bembang, naun tau ngulah kala sa haut naulahku ma kakau ara yiti. Nelang puang ekat yiru, likan naun tau kaeau anri bukit yiti, ‘Mara paenat nelang lawu mawuang laut’; himat yiru sagar jari.

²²Inun sa nalaku daya naun hawuang doa naun, naun sagar narimeni, asal naun parisaya.”

²³Udi yiru Yesus mulek lagi ma Lewu Tuhan, balalu masuk palus ngajar hang yiru. Tawuk hanye rahat ngajar, kawan imam kapala anri kawan pamimpin Yahudi hawi nunung hanye palus nunti, “Atas dasar inun hanyu nampalus ala katantuluh yiti? Hie sa ngami hak yiru ma hanyu?”

²⁴Yesus nuing, “Aku pada hamen nunti ma naun. Amun naun nuingni, aku sagar iwara ma naun makai hak hie aku nampalus ala katuluh yiti.

²⁵Hi Yohanes mambaptis makai hak hie? Alatalla atawa murunsia?” Balalu kawan imam kapala anri kawan pamimpin Yehudi yiru mulai barunding sasameh here, “Amun takam kaeau, ‘Makai hak Alatalla’, hanye sagar kaeau, ‘Amun kalayiru wuah inun naun puang parisaya ma hanye?’

²⁶Kude amun takam kaeau, ‘Makai hak murunsia’, takam takut anri ulun rama, daya here katuluh nganggap hi Yohanes erang kaulun nabi.”

²⁷Here nuing, “Kami puang karasa.” Balalu Yesus kaeau ma here, “Amun kalayiru aku pada puang sagar iwara ma naun makai hak hie aku nampalus katuluhni yiti.”

²⁸“Itati kalaawe pandapat naun neu hal yiti?” eau Yesus kamulek. “Naan erang kaulun ambah sa uweng rueh kaulun anak upu. Ulun yiru tulak nunung anakni sa taraulu palus kaeau, ‘Nak, hulu bagawi ma kabun anggur anrau yiti.’

²⁹‘Aku puang hakun,’ tuing anak yiru. Kude udi yiru hanye baubah pikiran balalu tulak ma kabun anggur yiru.

³⁰Udi yiru ambah yiru tulak nunung anakni sa karueh, palus kaeau neu hal sa sameh. ‘Hayuleh, ambah,’ tuing anak sa karueh yiru. Kude hanye puang tulak.

³¹Nah, hengka rueh kaulun anak yiru, saawe sa nampalus kabahumen ambahni?” “Sa taraulu,” tuing kawan imam kapala anri kawan pamimpin Yehudi yiru. Yesus balalu kaeau ma here, “Parisayaleh: Kawan tukang tagis pajak anri kawan wawei sundal die sagar labis dahulu teka naun jari ulun wat Alatalla.

³²Basa hi Yohanes Pambaptis hawi nelang iwara ma naun sara welum sa nakabahumen daya Tuhan, kude naun puang hamen parisaya ma ajaranni; kude kawan tukang tagis pajak anri kawan wawei sundal parisaya ma hanye. Kude naun biar haut kadinung katuluhni yiru, naun sika puang ngubah pikiran naun nelang puang parisaya ma Tuhan.”

³³“Rengei rarapisan saisa yiti lagi,” eau Yesus. “Erang kaulun tuan tane ngamule anggur hang erang kabidang kabun. Hanye ngulah pagar hang kalilingni, nelang ngadi luwang neu pakai unengan ngameh anggur, kamulek ngapinri manara unengan jaga. Udi yiru hanye ngampi sewa kabun anggur yiru ma ulun sa hakun ngarajani balalu hanye tulak ma daerah lain.

³⁴Dami haut hampe wayah mutik wua anggur, tuan tane yiru ngirim kawan palayanni nunung ulun sa ngaraja kabun yiru nampan narime bagianni.

³⁵Kude kawan ulun sa ngaraja kabun yiru nyamba kawan palayan tuan tane yiru: Meheni nahambat, sa lain nawunu, nelang sa lain lagi napedak makai watu.

³⁶Tuan tane yiru ngirim lagi kawan palayan lain, batambah rama hengka sa dahulu. Kude here pada naatu sameh kala kawan palayan sa dahulu yiru.

³⁷Akhirni tuan tane yiru ngirim ma here anakni raerai. ‘Himat anakku sagar na hormat,’ pikirni.

³⁸Kude dami kawan ulun sa ngaraja kabun yiru kadinung anak tuan tane yiru, here kaeau, ‘Nah, ina hanye, ahli warisni. Hayu takam munu hanye, nampan takam kaiyuh warisanni!’

³⁹Balalu anak yiru najamba, nainsing ma luar, balalu nawunu.”

⁴⁰Yesus nunti, “Nah, amun sa ampun kabun anggur yiru hawi kamulek, inun sa sagar naulahni anri kawan ulun sa ngaraja kabun yiru?”

⁴¹Here nuing, “Himat hanye sagar munu kawan ulun jahat yiru, balalu ngampi sewa kabun anggur yiru ma ulun lain sa hang wayahni hakun ngami bagian hasil tane yiru ma hanye.”

⁴²Balalu Yesus kaeau ma here, “Inun huan suah naun mambasa sa nasaurat hawuang Surat Barasis? ‘Watu sa puang napakai daya tukang bangunan haut jari watu sa mambatang tuu. Yiru pagawian Tuhan; tuu leha bungasni!’ ”

⁴³“Jari ingat,” eau Yesus, “Katuluh hak kala ulun wat Alatalla die sagar naalap teka naun palus naami ma bangsa lain sa sagar nampalus kawan parentah Alatalla. [

⁴⁴Ulun sa lawu ma ambau watu yiru, sagar hansur; nelang ulun sa katekan watu yiru, sagar lenuh jari habu.]”

⁴⁵Tawuk kawan imam kapala anri kawan ulun Parisi karengei rarapisan Yesus yiru, here kataru Yesus bapaner neu here.

⁴⁶Balalu here ngakali nyamba hanye. Kude here takut anri ulun rama yiru, daya ulun rama yiru nganggap Yesus erang kaulun nabi.