Read Ma'anyan MATIUS 24 Bible Online

MATIUS 24 - Ma'anyan bible

MATIUS 24

¹Dami Yesus kaluar nanan Lewu Tuhan, kawan ulun sa umba hanye hawi nunung hanye palus nutui hampi kawan bangunan Lewu Tuhan yiru.

²Yesus kaeau ma here, “Inun naun kadinung katuluhni yiru? Patut naun karasa, puang uweng sunah erang kawuding watu teka kawan bangunan yiru sagar balee ipasusun hang unenganni. Katuluhni sagar tumbang ramuk-rakai.”

³Udi yiru Yesus tulak hampi Bukit Zaitun; rahat hanye maharung, kawan ulun sa umba hanye hawi neu bapaner anri hanye sara pribadi. “Wara ma kami hantamian katuluhni yiru sagar kajadian,” eau here nengkan hanye. “Inun tanda-tanda sa iwara pihawiannu nelang pijumpuhan alam?”

⁴Yesus nuing, “Hati-hati bajaga, ada hampe naun tatipu.

⁵Daya wahai ulun hawi makai ngaranku nelang kaeau, ‘Aku Raja Panyalamat!’ Here sagar nipu rama ulun.

⁶Naun sagar karengei kawan lengan pertempuran nelang kawan kabar paparangan, kude ada takut. Daya kawan hal yiru harus bakajadian, kude puang baarati haut hampe wayahni kiamat.

⁷Bangsa sa isa sagar baparang nawan bangsa sa lain, nelang nagara sa isa sagar manyarang nagara sa lain. Hang awe-awe sagar naan kajadian bahaya juju lau nelang gempa bumi.

⁸Katuluhni yiru wau panukuan, kala nanam hanang sa naingkam daya erang kaulun wawei hang tawuk kai kayaan.

⁹Udi yiru naun sagar najamba palus nasarah nampan nasiksa nelang nawunu. Katuluh dunia sagar marikang naun daya naun ulun sa umba aku.

¹⁰Hang tawuk yiru wahai ulun sagar murtad, nelang sulas duruhaka palus muar marikang isa anri sa lain.

¹¹Rama kawan nabi palasu sagar hawi, palus nipu ulun rama.

¹²Kajahaten sagar malayap kalayiru tamamni hampe rama ulun puang lagi tau ipasinta.

¹³Kude ulun sa utul batahan hampe pijumpuhanni, sagar nasalamat.

¹⁴Kamulek Kabar Maeh neu kalaawe Alatalla marentah sagar nabarita hampi erang litar alam, nampan katuluh ulun nyanrengeini. Udi yiru wau anrau Kiamat.”

¹⁵“Naun sagar kadinung ‘Kajahaten sa ngampi hansur’, kala sa nawara daya Nabi Daniel, minri hang unengan barasis. (Catatan ma pambasa: Pantaru inun aratini!)

¹⁶Hang tawuk yiru, ulun sa naan hang Yudea harus nempat hampi pagunungan.

¹⁷Ulun sa muneng hang ambau hapau ada minau neu ngalap ala inun-inun hengka wuang lewu.

¹⁸Ulun sa hang ume ada mudi lepuh ngalap jubahni.

¹⁹Tuu leha sanringinenni anrau yiru ma ulun wawei sa mihawuntung, nelang ma ineh sa magun ngampumu gendani!

²⁰Badoaleh nampan naun ada hampe nempat tawuk musim uran atawa hang anrau Sabat!

²¹Hang kawan anrau sa maka sanringinen yiru kasusahen kahanangen tamam tatuu, huan suah kajadian teka panukuan dunia hampe anrau yiti, nelang angaan pada sagar kajadian lagi.

²²Atikala Alatalla puang ngampi imbe wayahni; maka puang sunah erang kaulun sa salamat. Kude daya gana ulun watni, Alatalla ngampi imbe wayah yiru.

²³Hang tawuk yiru amun naan ulun kaeau ma naun, ‘Dinung, Raja Panyalamat yiru naan hang yiti!’ atawa ‘Hanye naan hang yiru!’ ada eleh parisaya ma ulun yiru.

²⁴Daya sagar hawi kawan panyalamat palasu anri kawan nabi palasu. Here sagar ngulah kawan ulahan sa luar biasa, makai kawan kaburiat neu nipu ngakal, amun kaiyuh ulun wat Alatalla pada.

²⁵Jari, ingat! Aku haut iwara yiru ma naun labis dahulu kapihuan hal yiru kajadian.

²⁶Amun ulun kaeau ma naun, ‘Dinung, hanye naan hang yaru hang juwung!’ — ada naun hampi yiru. Atawa amun here kaeau, ‘Dinung, hanye sanina hawuang kamar yiti!’ — ada parisaya.

²⁷Daya pihawian Anak Murunsia kala sahaya kelat wawereu hengka timur, palus nyahaya hampe ma barat.

²⁸Hang awe unengan bangkai, hang yiru naan wurung tukang kuta bangkai.”

²⁹“Puang lawah udi wayah kasusahen yiru, mate anrau balalu kudap, nelang wulan angaan lagi basahaya. Kawan wawahiang sagar lawu teka langit, nelang kawan panguasa hang udara die sagar rawek-rukah.

³⁰Udi yiru tanda Anak Murunsia sagar dinung lalea hang langit. Hang tawuk yiru katuluh bangsa hang ambau tane sagar ngiak nungkau. Here sagar kadinung Anak Murunsia hawi hang rakun anri kuasa nelang pihante muliani.

³¹Tarompet hante sagar naampeau, nelang Anak Murunsia sagar nunyu kawan malekatni ngumpul ulun watni teka kaepat pusing dunia, teka hujung langit sa isa hampe hujung langit sa lain.”

³²“Wuah paajar teka kakau ara. Amun kawan jangkengni kakuring nelang maleme, nelang nuku ngalungkung naruk muda, naun karasa himat musim kamarau haut rupak.

³³Kala yiru pada amun naun kadinung kawan hal yiru bakajadian, naun himat karasa wayahni haut rupak tatuu.

³⁴Wuah naun karasa! Kawan hal yiru sagar kajadian kapihuan kawan ulun sa welum itati galis matei katuluhni.

³⁵Langit anri tane sagar wawai mahinam, kude lenganku tatap hampe kalalawahni.”

³⁶“Angaan uweng sa karasa hantamian anrauni anri jamni, kawan malekat hang surga sika puang, Anak Alatalla pada puang, ekat Ambah sa karasa.

³⁷Amun Anak Murunsia udi ati hawi, kaadaanni sameh kala hang jaman Nuah sadi.

³⁸Hang kawan anrau kapihuan baah hante yiru, ulun katuluh kuman nguut, narangan itamelum kala yiru tarus-tarusan hampe hang anrau Nuah masuk mawuang kapal.

³⁹Hang tawuk baah yiru nebu here katuluh, wau here kaingkam inun sa rahat kajadian. Kala yiru pada kaadaanni die amun Anak Murunsia hawi.

⁴⁰Hang tawuk yiru, rueh kaulun rahat bagawi hang ume: Erang kaulun nainsing, erang kaulun natanan.

⁴¹Rueh kaulun wawei rahat ngulah wadai: Erang kaulun nainsing, erang kaulun natanan.

⁴²Jari, hati-hati bajaga, daya naun puang karasa hantamian Tuhannu sagar hawi.

⁴³Ingat yiti! Umpamani ulun ampun lewu karasa jam pire hang kamalem anrau maling sagar hawi, hanye puang sagar manre, nampan maling puang masuk mawuang lewuni.

⁴⁴Daya sabab yiru, naun pada harus bajaga-jaga. Daya Anak Murunsia sagar hawi hang tawuk sa puang napinda-pinda daya naun.”

⁴⁵Yesus kaeau kamulek, “Amun kala yiru, palayan sa awe sa satia nelang pintar maharati? Hanye sa naangkat daya tuanni neu jari kapala hang ambau kawan palayan lain, nampan hanye ngami here kuman hang tawukni.

⁴⁶Tuu leha sanang marauh palayan yiru amun tuanni hawi, palus sangkum hanye rahat nampalus tugasni.

⁴⁷Parisayaleh, tuan yiru sagar parisaya anri palayan yiru neu nyaga ngaduh kawan haratani.

⁴⁸Kude amun palayan yiru jahat, hanye sagar kaeau hawuang ateini,

⁴⁹‘Tuanku magun lawah maka mudi,’ balalu hanye nuku melep kawan palayan sa lain, palus kuman nguut baya kawan ulun gaha mahamui.

⁵⁰Balalu tuanni sagar hawi hang anrau anri jam sa puang napinda-pinda.

⁵¹Maka palayan yiru nakahanangen bahimat daya tuanni, palus naumpe hampi unengan kawan ulun sa bapura-pura. Hang yiru here sagar ngiak-nungkau ngaret kahanangen.”