Read Ma'anyan MATIUS 25 Bible Online

MATIUS 25 - Ma'anyan bible

MATIUS 25

¹“Amun Anak Murunsia hawi yalah Tuhan, kaadaanni sameh kala hawuang rarapisan yiti: Sapuluh bujang wawei ngarairing pangantin, tiap tenga ngalap palita, balalu tulak nahalu pangantin upu.

²Dime kaulun teka here yiru lunga, kude dime sa lainni pintar maharati.

³Kadadime bujang wawei sa lunga yiru nginsing palita, kude puang uweng nginsing minyak ma wasi.

⁴Kadadime bujang wawei sa pintar maharati nginsing palita baya anri wasi minyak.

⁵Pangantin upu yiru unte hawi, jari kawan bujang wawei yiru nuku siruru palus saanre.

⁶Penah malem, wau naan karengei lengan surak layau ulun, ‘Pangantin upu hawi! Hayu tahalu hanye!’

⁷Sapuluh bujang wawei yiru ambuan, palus ngalap palita here.

⁸Kawan bujang wawei sa budu bapikir yiru kaeau nengkan sa pintar maharati, ‘Ami minyaknu butit ma kami, daya palita kami haut kai pare.’

⁹‘Angaan kaiyuh ngami!’ tuing kawan bujang wawei sa pintar maharati yiru, ‘daya die katuluh takam angaan sukup minyak. Kia lepuh midi ma warung.’

¹⁰Balalu kawan bujang wawei sa budu bapikir yiru tulak midi minyak. Kurung here tulak, pangantin upu hawi. Kadadime bujang wawei sa haut sadia yiru masuk sinrah anri pangantin upu ma unengan pesta, palus wawa anawang natutup!

¹¹Puang lawah udi yiru kawan bujang wawei sa lainni yiru hawi. Here nanterau, ‘Tuan, Tuan, uka wawa anawang ma kami.’

¹²Kude pangantin upu yiru nuing, ‘Aku puang kataru anri naun!’ ”

¹³Balalu Yesus nyanyumpuh rarapisanni yiru kala yiti, “Daya sabab yiru wuah bajaga-jaga, daya naun puang karasa anrauni atawa jamni.”

¹⁴“Amun Anak Murunsia hawi yalah Tuhan kaadaanni pada sameh kala hawuang rarapisan yiti. Erang kaulun upu hamen tulak hampi unengan lawit. Hanye nerau kawan palayanni, balalu nyarah haratani ma here.

¹⁵Ma tiap palayan yiru hanye ngami manyu kasanggupen here maisasaan. Ma sa isa hanye ngami dime ribu duit amas. Ma sa lainni hanye ngami rueh ribu duit amas. Kamulek ma erang kaulun sa lain lagi hanye ngami saribu duit amas. Balalu hanye tulak.

¹⁶Palayan sa narime dime ribu duit amas yiru balalu hinang tulak badagang, nelang kaiyuh kauntungan dime ribu duit amas lagi.

¹⁷Kala yiru pada palayan sa narime rueh ribu duit amas yiru kaiyuh kauntungan rueh ribu duit amas lagi.

¹⁸Kude palayan sa narime saribu duit amas yiru tulak ngadi luwang hang tane, balalu nina duit tuanni hang yiru.

¹⁹Lawah udi yiru, tuan kawan palayan yiru mudi, palus nuku ngulah parekenan anri here.

²⁰Palayan sa narime dime ribu duit amas yiru hawi, palus nyarah sapuluh ribu. ‘Tuan,’ eauni, ‘Tuan manyarah dime ribu duit amas ma aku. Dinung, aku bahasil kaiyuh kauntungan dime ribu lagi.’

²¹‘Maeh,’ eau tuan yiru, ‘hanyu samula palayan sa maeh nelang satia. Daya hanyu iyuh naparisaya anri sa butit, maka aku sagar ngami kaparisayaan sa diwi wahai ma hanyu. Masuk nelang hayu umba basanang-sanang baya aku!’

²²Balalu palayan sa narime rueh ribu duit amas yiru hawi, palus kaeau, ‘Tuan, Tuan haut nyarah rueh ribu duit amas ma aku. Dinung, aku bahasil kaiyuh kauntungan rueh ribu lagi.’

²³‘Maeh,’ eau tuan yiru, ‘Hanyu palayan sa maeh nelang satia. Daya hanyu iyuh naparisaya anri sa butit, maka aku ngami kaparisayaan sa wahai lagi ma hanyu. Masuk nelang hayu umba basanang-sanang baya aku!’

²⁴Udi yiru palayan sa narime saribu duit amas yiru hawi, palus kaeau, ‘Tuan, aku karasa tuan erang kaulun sa karas. Tuan mutik wua hang unengan Tuan puang ngamule, nelang ngalap hasil hang unengan Tuan puang namur wini.

²⁵Aku takut, jari aku tulak nina duit Tuan hawuang tane. Iti duit Tuan.’

²⁶‘Hanyu palayan sa jahat nelang mawule!’ eau tuan yiru. ‘Angneh hanyu haut karasa aku yiti mutik wua hang unengan aku puang ngamule, nelang ngalap hasil hang unengan sa puang aku namur wini?

²⁷Amun kala yiru, saharusni hanyu ngimpeh duitku yiru hang bank, nampan hang tawuk aku mudi, aku tau narime kamulek duitku yiru baya anri bungani.

²⁸Daya yiru, alap duit yiru teka hanye, palus ami ma ulun sa naan sapuluh ribu duit amas yiru.

²⁹Daya ulun sa watni haut naan, sagar naami labis wahai lagi, nelang hanye sagar balabihan. Kude ulun sa watni puang uweng, sa butit naan hang hanye sagar naalap pada.

³⁰Kamulek palayan sa puang bariran yiru, umpe hanye ma piieng hang luar. Hang yiru hanye sagar ngiak-nungkau nelang ngaret kahanangen!’ ”

³¹“Amun Anak Murunsia hawi yalah raja narairing daya katuluh malekatni, hanye sagar maharung hang ambau padudusanni sa mulia.

³²Katuluh bangsa sagar nakumpul hang hadapan hanye. Balalu hanye sagar misah here jari rueh kapaju kala pakatik misah babiri teka kambing.

³³Kawan ulun sa nampalus kabahumen Alatalla sagar nakumpul hang tiba kawanni, nelang sa lain hang tiba kawini.

³⁴Kamulek raja yiru sagar kaeau nengkan kawan ulun hang tiba kawanni, ‘Hayu ma yati naun sa naberkat daya Ambahku. Masuk mawuang Karajaan sa nasadia ma naun teka panukuan dunia.

³⁵Daya hang tawuk aku kajuju, naun nyarungan aku kuman, nelang hang tawuk aku malah, naun ngami aku nguut. Aku erang kaulun ruing, naun narime aku hang lewu naun.

³⁶Aku angaan bapakaian, naun ngami aku pakaian. Aku sakit, naun haut marawat aku. Aku napanjara, naun ngarawah aku.’

³⁷Balalu kawan ulun yiru sagar kaeau, ‘Tuhan, hantamian kami suah kadinung Tuhan kajuju balalu kami nyarungan Tuhan kuman, atawa malah balalu ngami Tuhan nguut?

³⁸Hantamian kami suah kadinung Tuhan kala ulun ruing, balalu kami narime Tuhan hang lewu kami? Hantamian Tuhan suah angaan bapakaian, balalu kami ngami Tuhan pakaian?

³⁹Hantamian kami suah kadinung Tuhan sakit atawa napanjara, balalu kami ngarawah Tuhan?’

⁴⁰Raja yiru sagar nuing, ‘Wuah naun karasa: tawuk naun nampalus hal yiru biar ma erang kaulun teka kawan pulaksanaiku sa panga hina, baarati naun nampalusni ma aku!’

⁴¹Balalu raja yiru sagar kaeau ma kawan ulun hang tiba kawini, ‘Hulu teka yiti, jahanam! Masuk mawuang apui sa puang tau pare, sa haut nasadia ma Iblis anri kawan malekatni!

⁴²Daya tawuk aku kajuju, naun puang ngami aku kuman; tawuk aku malah, naun puang ngami aku nguut.

⁴³Aku erang kaulun ruing, naun puang narime aku hang lewu naun. Aku angaan bapakaian, naun puang ngami aku pakaian. Aku sakit nelang napanjara, naun puang marawat aku.’

⁴⁴Balalu here sagar kaeau nengkan hanye, ‘Tuhan, hantamian kami kadinung Tuhan kajuju, atawa malah, atawa kala erang kaulun ruing, atawa angaan bapakaian, atawa sakit, atawa napanjara, nelang kami puang ngarawah Tuhan?’

⁴⁵Raja yiru sagar nuing, ‘Wuah naun karasa: hang tawuk naun puang hamen ngarawah sunah isa teka ulun sa hina yiti, baarati naun puang hamen ngarawah aku.’

⁴⁶Balalu kawan ulun yiru sagar nahukum kalalawahni, kude kawan ulun sa nampalus kabahumen Alatalla sagar kaingkam pamelum sa sajati nelang palus ma kalalawah.”