Read Ma'anyan MATIUS 26 Bible Online

MATIUS 26 - Ma'anyan bible

MATIUS 26

¹Dami Yesus luput ngajar ala katuluh yiru, hanye kaeau ma kawan ulun sa umba hanye,

²“Naun karasa rueh anrau lagi Hari Raya Paskah, nelang Anak Murunsia sagar nasarah nampan nabalasangar!”

³Tawuk yiru kawan imam kapala anri kawan pamimpin Yahudi bakumpul hang istana Imam Hante Kayafas.

⁴Here mapakat neu nyamba Yesus anri suni-suni, palus munu hanye.

⁵“Kude,” eau here, “ada hal yiru natampalus hang tawuk parayaan, daya die timbul karusuhan hang penah rakyat.”

⁶Tawuk Yesus hang Betania, hang lewu Simon sa suah kadanen,

⁷erang kaulun wawei hawi nyanrite Yesus. Hanye nginsing isa bakam maeh tatuu, mahuang minyak marauh enguh sa rarang haragani. Hang tawuk Yesus rahat maharung kuman, wawei yiru nalui minyak marauh enguh yiru ma ulu Yesus.

⁸Kawan ulun sa umba Yesus kadinung kajadian yiru balalu sangit. Eau here, “Inun riranni katuluhni yiti natahayang?”

⁹“Minyak marauh enguh yiru tau naari anri haraga sa rarang, nelang duitni naami ma ulun paua!”

¹⁰Yesus karasa pikiran here, balalu hanye kaeau, “Wuah inun naun ngahalaen wawei yiti? Hanye nampalus ala maeh ma aku, nelang patut natawat.

¹¹Ulun paua saratang naan hang padang naun, kude aku puang kalalawahni naan baya naun.

¹²Anri nalui minyak marauh enguhni yiru ma ambau tengaku, hanye nyadia aku neu napasar.

¹³Parisayaleh! Hang litar dunia, hang awe-awe Kabar Maeh teka Alatalla nawara, pagawian wawei yiti sagar nasarita pada neu pangitungen ma hanye.”

¹⁴Balalu erang kaulun hengka dua walas kaulun ulun sa umba Yesus, sa bangaran Yudas Iskariot, tulak nunung kawan imam kapala.

¹⁵Hanye kaeau ma here, “Inun sa sagar naami naun ma aku amun aku nyarah Yesus ma naun?” Maka here hanreken telumpulu duit perak, balalu ngami duit yiru ma hanye.

¹⁶Mulai teka tawuk yiru hi Yudas ngantara kasampatan sa maeh nampan mahianat Yesus.

¹⁷Hang anrau palanungkai hawuang Parayaan Rote Puang Baragi, kawan ulun sa umba Yesus hawi nunung hanye. Here nunti, “Hang awe hanyu hamen kami nyadia kutaen Paskah ma hanyu?”

¹⁸Yesus nuing, “Hulu tunung erang kaulun hang tumpuk nelang wara mahanye, ‘Eau Guru, wayahni ma aku haut hampe; aku hamen maraya Paskah hang lewunu baya anri kawan ulun sa umba aku.’ ”

¹⁹Kawan ulun sa umba Yesus nampalus inun sa nahuyu Yesus ma here. Here tulak nyadia kutaen Paskah yiru.

²⁰Dami haut kamalem, Yesus anri kaduawalas ulun sa umba hanye maharung kuman.

²¹Rahat here kuman, Yesus kaeau, “Rengei: erang kaulun teka naun sagar mahianat aku.”

²²Karengei yiru, kawan ulun sa umba Yesus tuu mahanang atei. Balalu here, tiap tenga baganti nunti ma Yesus, “Batantu puang aku sa namaksud daya Bapak?”

²³Yesus nuing, “Ulun sa nyusup rote mawuang mangkok sinrah anri aku, hanye sa sagar mahianat aku.

²⁴Samula Anak Murunsia sagar matei kala sa nasurat hawuang Surat Barasis. Kude silaka ulun sa mahianat Anak Murunsia! Labis maeh ma ulun yiru atikala hanye sama sakali puang suah nakayaan!”

²⁵Balalu hi Yudas panghianat yiru kaeau, “Batantu puang aku sa namaksud daya Guru?” Yesus nuing, “Kala yiru eaunu!”

²⁶Tawuk here kuman, Yesus ngalap rote, balalu badoa ngantuh tarima kasih. Udi hie hanye miah rote yiru makai tanganni balalu ngamini ma kawan ulun sa umba hanye nelang kaeau, “Alap, kuta; yiti tengaku!”

²⁷Udi yiru hanye ngalap isa sangkir anggur, balalu ngantuh tarima kasih ma Alatalla. Udi hie hanye ngami sangkir yiru ma kawan ulun sa umba hanye nelang kaeau, “Uut, naun katuluh.

²⁸Daya yiti iraku sa nyantuhun janji Alatalla — ira sa nahalui ma ulun rama neu pangampunan dosa here.

²⁹Parisayaleh: Aku puang sagar nguut anggur yiti lagi hampe hang wayahni aku nguut anggur sa wau sinrah anri naun hang Dunia Wau Wat Ambahku.”

³⁰Udi hie here manyanyi isa nyanyian nawat mahormat. Balalu udi yiru here tulak hampi Bukit Zaitun.

³¹Balalu Yesus kaeau ma kawan ulun sa umba hanye, “Hang malem yiti jua naun katuluh sagar nempat nanan aku; daya hawuang Surat Barasis nasurat: Alatalla kaeau, ‘Aku sagar munu pakatik yiru, balalu sawayan babirini sagar pasai-pau.’

³²Kude udi aku naele welum kamulek, aku sagar tulak nahuluan naun ma Galilea.”

³³Hi Petrus kaeau ma Yesus, “Biar katuluh here lain nanan hanyu, aku puang budas sagar nanan!”

³⁴“Ingat,” eau Yesus mahanye, “Malem yiti jua, kapihuan manu nanru, hanyu hantelu puang mangaku aku.”

³⁵Hi Petrus nuing, “Biar aku harus matei sinrah hanyu, aku puang sagar kaeau sa aku puang kataru hanyu!” Nelang katuluh kawan ulun sa umba Yesus sa lain kaeau kalayiru pada.

³⁶Udi yiru Yesus tulak anri kawan ulun sa umba hanye hampi isa unengan sa bangaran Getsemani. Hang yaru hanye kaeau ma here, “Maharung hang yiti padingian aku tulak badoa.”

³⁷Balalu hanye makat hi Petrus anri kararueh anak Zebedeus tulak baya anri hanye. Hanye mulai kaingkam mahanang atei nelang balisah.

³⁸Hanye kaeau ma kawan ulun sa umba hanye, “Ateiku mahanang tuu nanamni kala sagar kai matei. Muneng naun hang yiti, nelang umba bajaga-jaga anri aku.”

³⁹Udi hie Yesus tulak magin lawit lagi, balalu hanye ijuku ma tane palus badoa. “Ambah,” eauni, “Amun iyuh, sanawitleh teka aku kahanangen sa harus wuah aku yiti. Kude ada manyu kabahumenku, malengkan manyu kabahumen Ambah sa jari.”

⁴⁰Udi yiru Yesus miulek nunung katelu kaulun ulun sa umba hanye nelang kadinung here rahat manre. Hanye kaeau ma hi Petrus, “Ekat erang jam naun telu puang kaule bajaga baya aku?

⁴¹Bajaga-jagaleh, nelang badoa nampan naun ada wuah purija. Samula rohnu hamen nampalus sa benar kude naun puang sanggup, daya tabiat murunsia yiru maleme.”

⁴²Hinra lagi Yesus tulak badoa eauni, “Ambah, amun kahanangen yiti harus wuah aku, nelang puang iyuh nasanawit lagi, elahni kabahumen Ambah sa jari.”

⁴³Udi yiru Yesus miulek lagi, nelang kadinung kawan ulun sa umba hanye magun manre jua, daya here siruru tuu.

⁴⁴Hinra lagi Yesus nanan here nelang ma katelu kalini badoa anri ngantuh kawan lengan sa sameh.

⁴⁵Udi yiru hanye miulek lagi nunung kawan ulun sa umba hanye palus kaeau, “Magun naun manre nelang istirahat? Dinung, haut hampe wayahni Anak Murunsia nasarah ma kuasa kawan ulun badosa.

⁴⁶Ambuan, hayu takam tulak. Dinung! Ulun sa mahianat aku haut hawi!”

⁴⁷Tawuk Yesus magun rahat bapaner, hi Yudas, erang kaulun teka dua walas ulun sa umba hanye yiru hawi. Sinrah anri hanye, hawi pada ulun rama sa nginsing padang anri gagada. Here nahuyu daya kawan imam kapala anri kawan pamimpin Yahudi.

⁴⁸Hi panghianat haut iwara ma here tanda kalayiti, “Ulun sa nasiukku, hanyeyiru ulunni. Jamba hanye!”

⁴⁹Dami hampe hang uneng yiru, hi Yudas palus tulak nyanrite Yesus kaeau, “Tabe, Guru!” Balalu hanye nyiuk Yesus.

⁵⁰Yesus nuing, “Pulaksanai, lepuh inun hanyu hawi ma yiti?” Udi yiru ulun rama yiru naripi, palus nyamba Yesus.

⁵¹Erang kaulun teka kawan ulun sa umba hanye sa naan hang yiru baya Yesus, nyintak padangni palus nampek walah imam hante hampe witus siluni.

⁵²Yesus kaeau ma ulun sa umba hanye yiru, “Tamasuk padangnu mawuang lundanni, daya katuluh ulun sa mangguna padangni sagar matei daya padang.

⁵³Hanyu minda aku puang tau laku karawah ma Ambahku, palus hanye anri hinang sagar ngirim labis hengka dua walas pasukan tantara malekat?

⁵⁴Kude amun kalayiru, puang maka tau tulus kala sa haut natujum hawuang Surat Barasis samula harus jari kala sa jari kalayiti itati?”

⁵⁵Balalu Yesus kaeau ma ulun rama yiru, “Inun aku yiti panjahat, hampe naun hawi nginsing padang anri gagada neu nyamba aku? Tiap anrau aku ngajar hang Lewu Alatalla, kude naun puang nyamba aku!

⁵⁶Kude samula haut saharusni kala yiru nampan tulus inun sa nasurat daya kawan nabi hawuang Surat Barasis.” Udi yiru, katuluh ulun sa umba hanye nempat nanan Yesus.

⁵⁷Kawan ulun sa nyamba Yesus nginsing hanye ma lewu Imam Hante Kayafas. Hang yaru kawan guru agama anri kawan pamimpin Yahudi haut bakumpul.

⁵⁸Hi Petrus ngapung Yesus hengka lawit ma natat lewu imam hante. Balalu hi Petrus masuk ma natat yiru, palus maharung baya kawan pangawal. Hanye hamen karasa kalaawe wangun panyarianni ala katuluh yiru die jumpuh.

⁵⁹Kawan imam kapala anri katuluh Pangadilan Agama ngakali ngaiyuh kasaksian palasu nampan tau nyanawu hukuman mati ma ambau Yesus.

⁶⁰Kude here puang kahaba sunah isa bukti, biar wahai sa maju jari saksi sa ipusu. Akhirni naan rueh kaulun sa maju ma hadapan.

⁶¹Here kaeau, “Ulun yiti kaeau, ‘Aku sanggup nyantumbang Lewu Alatalla, palus hawuang telu anrau sanggup ngambuanni kamulek.’ ”

⁶²Balalu imam hante minri, palus kaeau ma Yesus, “Inun hanyu puang nuing lengan dawaan sa natuju ma hanyu yiru?”

⁶³Kude Yesus suni. Hinra lagi imam hante kaeau ma hanye, “Hawuang ngaran Alatalla sa welum, wara ma kami inun hanyu Raja Panyalamat, Anak Alatalla?”

⁶⁴Yesus nuing, “Kalayiru eaunu. Kude parisayaleh: mulai saat yiti, naun sagar kadinung Anak Murunsia maharung hang tiba kawan Alatalla sa angaan uweng tikas kuasa, nelang hawi hang ambau rakun hang langit!”

⁶⁵Balalu imam hante yiru ngirah pakaianni, palus kaeau, “Hanye nangkurun Alatalla! Puang parlu lagi saksi. Naun katuluh haut karengei raerai kawan lengan sa nangkurun Alatalla.

⁶⁶Itati kalaawe pandapat naun?” Here nuing, “Hanye bakahalaen, nelang harus matei.”

⁶⁷Balalu here nura uruwawa Yesus, nelang melep hanye. Naan pada ulun nampar hanye

⁶⁸nelang kaeau, “Suba tangguh palus wara ma kami, u Raja Panyalamat! Hie sa nampar hanyu?”

⁶⁹Hi Petrus rahat maharung hang luar, hang natat. Erang kaulun palayan wawei hawi, palus kaeau ma hi Petrus, “Angneh hanyu pada baya Yesus ulun Galilea yiru?”

⁷⁰Kude hi Petrus ngidim hang hadapan here katuluh. “Aku puang karasa inun maksudnu,” tuing Petrus,

⁷¹balalu hanye tulak hampi wawa anawang pagar natat. Erang kaulun palayan wawei sa lain kadinung hi Petrus, palus kaeau ma kawan ulun hang yiru, “Ulun yiti huni pada baya anri Yesus teka Nazaret yiru.”

⁷²Balalu hi Petrus ngidim lagi, nelang isapa tenga. “Kapinuu-nuuni aku puang kataru ulun yiru!” eau Petrus.

⁷³Puang lawah udi yiru, kawan ulun sa minri hang yiru hawi nyanrite hi Petrus, palus kaeau, “Himat hanyu erang kaulun teka here. Yiru lentah tuu hengka suaranu.”

⁷⁴Balalu hi Petrus mulai basumpah-sumpah nelang kaeau, “Aku puang kataru ulun yiru!” Tawuk yiru pada manu nanru.

⁷⁵Balalu hi Petrus kaitung sa Yesus haut kaeau ma hanye, “Kapihuan manu nanru, hanyu hantelu puang mangaku aku.” Balalu hi Petrus kaluar, palus nungkau anri hanang ateini.