Read Ma'anyan MATIUS 27 Bible Online

MATIUS 27 - Ma'anyan bible

MATIUS 27

¹Kaiyat hinang, katuluh imam kapala anri pamimpin Yahudi ngalap kaputusan nampan munu Yesus.

²Here nuruk tanganni, palus nginsing hanye, balalu nyarah hanye ma hi Pilatus, gubernur pamarentahan Roma.

³Tawuk hi Yudas panghianat yiru kadinung Yesus haut naputus hukumanni, hanye manyasal. Balalu hanye ngampudi telumpulu kadiki duit perak yiru ma kawan imam kapala anri kawan pamimpin Yahudi.

⁴Hanye kaeau, “Aku haut badosa mahianat ulun sa puang uweng bakahalaen, hampe hanye nahukum mati!” Kude here nuing, “Kami puang paraduli! Yiru urusannu!”

⁵Hi Yudas numbuk duit yiru hampi wuang Lewu Tuhan, balalu tulak mitu ngagueng tengani.

⁶Kawan imam kapala ngalap duit yiru nelang kaeau, “Duit yiti duit ira. Manyu hukum agama, duit yiti puang iyuh natamasuk mawuang unengan parapah hang Lewu Tuhan.”

⁷Balalu udi here mapakat, makai duit yiru here midi tane sa naantuh tane tukang kabali. Tane yiru napakai umak pasaran kawan ulun ruing.

⁸Daya gana yiru hampe anrau yiti tane yiru naantuh “Tane Ira”.

⁹Anri kalayiru, maka tulus inun sa naeau daya nabi Yeremia, kalayiti, “Here narime telumpulu kadiki duit perak, hanyeyiru haraga sa napakat daya bangsa Israel umak nabayar ma hanye.

¹⁰Balalu duit yiru neu pakai midi tane tukang balanai, kala sa naparentah Tuhan ma aku.”

¹¹Tawuk Yesus nadap hi Pilatus, gubernur daerah yiru, hi Pilatus nunti, “Inun hanyu raja ulun Yahudi?” “Kalayiru eaunu,” tuing Yesus.

¹²Kude tawuk kawan imam kapala anri kawan pamimpin Yahudi nampe wahai dawaan nadap Yesus, hanye budas puang nuing.

¹³Daya yiru hi Pilatus kaeau ma hanye, “Inun hanyu puang karengei katuluh dawaan here ma hanyu yiru?”

¹⁴Kude Yesus puang nuing sunah butit hampe gubernur yiru wauh tatuu.

¹⁵Hang tiap Parayaan Paskah, gubernur biasani napas erang kaulun tahanan manurut pidian ulun rama.

¹⁶Hang tawuk yiru naan erang kaulun hukuman sa tawantar. Ngaranni Yesus Barabas.

¹⁷Jari, tawuk ulun rama haut bakumpul, hi Pilatus nunti ma here, “Hie kahamenen naun nalapasku ma naun? Yesus Barabas atawa Yesus sa naantuh Kristus?”

¹⁸Hi Pilatus kaeau kala yiru daya hanye karasa, kawan panguasa Yahudi manyarah Yesus ma hanye daya here muar.

¹⁹Tawuk hi Pilatus rahat maharung hang balai pangadilan, daranganni ipesen kalayiti ma hanye, “Ada hanyu sampur pakara ulun sa puang bakahalaen yiru, daya gana hanye, aku nganupi sa maka tatakut anrau yiti.”

²⁰Kude kawan imam kapala anri kawan pamimpin Yahudi tarus ngajahujak nantiring ulun rama yiru neu ilaku ma hi Pilatus nampan hi Barabas nabebas kude Yesus nahukum mati.

²¹Balalu gubernur yiru nunti lagi ma here, “Hengka rueh kaulun yiru, hie sa kahamenen naun nabebasku ma naun?” “Hi Barabas,” tuing here.

²²“Amun kalayiru, inun sa harus naulahku anri Yesus sa naantuh Kristus?” tunti Pilatus ma here. “Balasangar hanye!” tuing here katuluh.

²³“Kude inun kajahatenni?” tunti Pilatus. Balalu here nantiak magin mehet lagi, “Balasangar hanye!”

²⁴Ahirni hi Pilatus kataru sa hanye puang tau ngulah inun-inun lagi daya kawan ulun yiru tau sagar mambarontak. Palus hanye ngalap ranu, balalu hang hadapan ulun rama yiru hanye mui tanganni nelang kaeau, “Aku puang batanggung jawab hang ambau pampatei ulun yiti! Yiru urusan naun!”

²⁵Katuluh ulun rama yiru nuing, “Hiai, elahni kami anri kawan anak tukui kami mananggung hukuman hang ambau pampateini!”

²⁶Balalu hi Pilatus napas hi Barabas ma here, nelang nunyu ulun malawas Yesus; palus manyarah hanye nampan nabalasangar.

²⁷Udi yiru kawan parajurit Pilatus nginsing Yesus masuk ma istana gubernur, nelang katuluh pasukan bakumpul hang kalilingan Yesus.

²⁸Here nguka pakaian Yesus, palus namu ma hanye jubah kalabu.

²⁹Here ngulah isa mahkota teka kawan lawei, palus namuni hang ulu Yesus. Udi hie here ngami isa tungkeh ma tanganni tuhi kawan, balalu ileku hang hadapanni nelang ngakiek hanye. “Tabe Raja Ulun Yahudi!” eau here.

³⁰Here nura hanye, nelang ngalap tungkeh yiru, balalu meweh hanye hang uluni.

³¹Udi haut ngakiek hanye, here nguka jubah kalabu yiru balalu namu kamulek pakaianni raerai. Udi yiru hanye nainsing ma luar tumpuk umak nabalasangar.

³²Hang penah lalan, here panalu anri erang kaulun teka kirene bangaran hi Simon. Here maksa ulun yiru ngantung balasangar Yesus.

³³Udi yiru here hampe hang isa unengan sa bangaran Golgota, sa aratini “Unengan Kuruwangah”.

³⁴Hang yiru here ngami Yesus nguut anggur sa basampur anri aperu. Kude dami Yesus ngingkam anggur yiru, hanye puang hamen nguutni.

³⁵Udi yiru here nyalib hanye, palus mambagi pakaianni makai undian.

³⁶Udi yiru here maharung nyaga hanye hang yiru.

³⁷Hang umbung uluni here namu tulisan neu dawaan nadap hanye, hanyeyiru: “Iti Yesus, Raja Ulun Yahudi”.

³⁸Sinrah anri hanye here nyalib pada rueh kaulun parampok; erang kaulun hang tiba kawan, erang kaulun lagi hang tiba kawini.

³⁹Kawan ulun sa mitah hang yiru igutik ulu, nelang mahina Yesus.

⁴⁰Here kaeau, “Hanyu sa hamen nyantumbang Lewu Alatalla, palus ngambuanni hawuang telu anrau! Amun hanyu tuu Anak Alatalla, inau teka balasangar yiru, salamat dirinu!”

⁴¹Kala yiru pada kawan imam kapala anri kawan guru agama baya kawan pamimpin Yahudi ngakiek Yesus. Here kaeau,

⁴²“Hanye nyalamat ulun lain, kude dirini raerai hanye puang kaiyuh nyalamat! Amun hanye raja Israel, ware hanye itati minau teka balasangar yiru, wau kami hamen parisaya ma hanye.

⁴³Hanye parisaya ma Alatalla, nelang kaeau hanye Anak Alatalla. Nah, mara takam ninung inun Alatalla hamen nyalamat hanye itati.”

⁴⁴Kawan parampok sa nabalasangar sinrah hanyeyiru likan mahina hanye kalayiru pada.

⁴⁵Hang penah anrau, salawah telu jam, katuluh daerah yiru jari maieng.

⁴⁶Pukul telu kariwe, Yesus nantiak anri lengan mehet, “Eli, Eli, lama sabakhtani?” sa aratini, “U, Alatallaku, U, Alatallaku, wuah inun hanyu nanan aku?”

⁴⁷Papire kaulun hang yiru karengei lengan tantiak yiru, balalu kaeau, “Hanye nerau hi Elia!”

⁴⁸Erang kaulun teka here iwawansit tulak ngalap kambang karang, palus nyusupni mawuang anggur maasem. Udi hie hanye nateanni makai erang kawila kayu, palus nyurungni ma wiwi Yesus.

⁴⁹Kude kawan ulun lain kaeau, “Anrei, mara takam ninung inun hi Elia hawi nyalamat hanye!”

⁵⁰Udi yiru Yesus nantiak lagi anri lengan mehet, balalu nepus hewukni sa pangalisan.

⁵¹Tenda sa basinsi hawuang Lewu Tuhan sitat patuhi rueh hengka ambau hampe ma imbe. Tane gaguyuh nelang kawan gunung watu patuhi.

⁵²Kawan pasaran pawawanga, palus rama ulun wat Alatalla sa haut matei nasamelum kamulek.

⁵³Here kaluar teka kawan pasaran udi Yesus haut welum teka pampatei, nelang here masuk ma Yerusalem. Hang yaru rama ulun kadinung here.

⁵⁴Kapala pasukan baya anri kawan parajurit sa rahat nyaga Yesus takut tatuu tawuk kadinung tane bagarak, anri katuluh kawan kajadian yiru. Here kaeau, “Kapinuuni, hanye yiti Anak Alatalla!”

⁵⁵Hang yiru naan pada rama ulun wawei sa rahat ninung hengka lawit. Here yiti sa haut umba Yesus neu ngarawah hanye nuku teka Galilea.

⁵⁶Teka here yiru hanyeyiru hi Maria Magdalena, Maria ineh Yakobus anri hi Yosef, anri ineh kawan anak Zebedeus.

⁵⁷Malem yiru hawi erang kaulun tatau teka Arimatea, sa bangaran hi Yosef. Hanye pada ulun sa umba Yesus.

⁵⁸Hanye tulak nunung hi Pilatus neu laku bangkai Yesus. Balalu hi Pilatus marentah nampan bangkai Yesus naami ma hanye.

⁵⁹Balalu hi Yosef ngalap bangkai yiru, palus mungkusni makai kain kapan teka lena wau.

⁶⁰Balalu hanye ngelah bangkai Yesus hawuang pasaran watni raerai sa naulah hawuang isa bukit watu. Udi yiru hanye ngulagaling isa watu hante umak nutup wawa pasaran yiru, balalu tulak.

⁶¹Hi Maria Magdalena anri Maria sa lain muneng maharung hang yiru nadap pasaran yiru.

⁶²Kaiyat anrauni, hang anrau Sabat, kawan imam kapala anri kawan ulun Parisi tulak sasinrah mangadap hi Pilatus

⁶³here kaeau, “Tuan, kami kaitung tawuk panipu yiru magun welum, hanye suah kaeau, ‘Udi telu anrau aku sagar welum.’

⁶⁴Daya yiru, huyu ulun nyaga pasaran yiru maeh-maeh hampe anrau sa katelu, nampan kawan ulun sa umba hanye puang kaiyuh ngalat bangkaini balalu kaeau ma ulun rama hanye haut nasamelum teka pampatei. Nelang panipuan sa hanrian yiti sagar labis tamam hengka sa dahulu.”

⁶⁵“Naun naan tantara pangawal,” eau Pilatus ma here, “kia nyaga pasaran yiru anri bahimat.”

⁶⁶Balalu here tulak hampi pasaran, nyegel watu panutupni palus nunyu ulun jaga ngawariungni, nampan ada naan isa nganggu pasaran yiru.