Read Ma'anyan MATIUS 28 Bible Online

MATIUS 28 - Ma'anyan bible

MATIUS 28

¹Dami anrau Sabat haut paitah, hang anrau Minggu kaiyat hinang, hi Maria Magdalena anri hi Maria sa lain yiru tulak naua pasaran yiru.

²Salenga gempa bumi tamam tatuu. Erang kaulun malekat Tuhan minau teka surga balalu nyuun watu panutup pasaran yiru, palus maharung hang ambauni.

³Uruwawa malekat yiru nyahaya kala kelat, nelang pakaianni mahilak hengai tatuu.

⁴Tantara pangawal sa jaga hang yiru takut tatuu hampe neter, nelang wangun here sameh kala ulun matei.

⁵Malekat yiru kaeau ma kawan wawei yiru, “Ada takut! Aku karasa naun ngantara Yesus sa haut nabalasangar yiru.

⁶Hanye angaan uweng hang yiti. Hanye haut ambuan welum mulek kala sa haut nawarani dahulu hie. Mara dinung bakas unenganni naangkading.

⁷Itati, hulu hinang, wara ma kawan ulun sa umba hanye, ‘Hanye haut kaelan welum mulek, itati hanye tulak dahulu teka naun ma Galilea. Hang yaru naun sagar kadinung hanye!’ Itung inun sa haut nawarani ma naun.”

⁸Kawan wawei yiru balalu hinang nanan pasaran yiru. Anri takut nelang arai, here nempat lepuh iwara hal yiru ma kawan ulun sa umba Yesus.

⁹Salenga Yesus hawi manalu kawan wawei yiru, palus kaeau, “Tabe!” Balalu here nyanrite hanye, palus maluk peeni nyambah hanye.

¹⁰“Ada takut,” eau Yesus ma here, “kia wara ma kawan pulaksanaiku nampan here tulak ma Galilea; hang yaru here sagar kadinung aku.”

¹¹Dami kawan wawei yiru tulak, papire kaulun teka tantara pangawal sa nyaga pasaran yiru miulek ma tumpuk, palus malapor ma kawan imam kapala katuluh sa haut jari.

¹²Kawan imam kapala yiru mapakat anri kawan pamimpin Yahudi, balalu ngami wahai duit ma tantara pangawal yiru,

¹³nelang kaeau, “Naun harus iwara kawan ulun sa umba Yesus hawi tawuk kamalem, palus ngalat bangkaini tawuk naun rahat manre.

¹⁴Maka amun gubernur karengei hal yiru, kami sagar ngararimuk hanye nampan naun puang wuah kasulitan inun-inun.”

¹⁵Balalu tantara pangawal yiru ngalap duit yiru, nelang nampalus kala sa napesen ma here. Daya sabab yiru sarita yiru magun tasiar hang padang ulun Yahudi hampe anrau yiti.

¹⁶Kasawalas kaulun ulun sa umba Yesus yiru tulak hampi bukit hang Galilea kala manyu sa naparentah Yesus ma here.

¹⁷Dami here kadinung Yesus hang yiru, here ileku nyambah hanye. Kude naan teka here sa ragu-ragu.

¹⁸Yesus nyanrite here, palus kaeau, “Katantuluh kuasa hang surga nelang hang ambau tane haut naami ma aku.

¹⁹Daya yiru kia tunung katantuluh bangsa hang erang litar alam, ulah here jari ulun sa umba aku. Baptis here makai ngaran Ambah, Anak, nelang Roh Alatalla.

²⁰Ajar here ngalut nuu katuluh sa haut naparentahku manaun. Nelang ingat aku saratang nyinrah naun hampe pijumpuhan alam.”