Read Ma'anyan MATIUS 4 Bible Online

MATIUS 4 - Ma'anyan bible

MATIUS 4

¹Udi yiru Yesus nainsing daya Roh Alatalla ma padang gurun nampan napurija daya Iblis.

²Epat pulu anrau epat pulu malem Yesus puang uweng ikuta. Balalu hanye kaingkam kajuju.

³Iblis hawi palus kaeau, “Angneh hanyu Anak Alatalla? Huyu kawan watu yiti jari rute.”

⁴Yesus nuing, “Hawuang Surat Barasis naan nasurat; Murunsia puang tau welum ekat daya rute, kude pada daya satiap lengan sa naantuh daya Alatalla.”

⁵Udi yiru Iblis nginsing Yesus ma Yerusalem, tumpuk sa barasis palus ngelah hanye hang ambau punsak Lewu Tuhan.

⁶Balalu Iblis kaeau nengkan hanye, “Angneh hanyu Anak Alatalla? Itun ma imbe; daya hawuang Surat Barasis naan nasurat kalayiti, ‘Alatalla sagar nunyu kawan malekatni nyaga nyalindung hanyu, here sagar nyambut hanyu makai tangan here, nampan peenu puang pahantuk ma watu.’ ”

⁷Yesus nuing, “Kude hawuang Surat Barasis nasurat pada, ada hanyu murija Tuhan Alatallanu.”

⁸Udi yiru Iblis nginsing Yesus lagi ma gunung sa ambau tatuu palus nutui ma hanye katantuluh karajaan hang dunia anri kawan katatauenni.

⁹Balalu Iblis kaeau nengkan Yesus, “Katantuluh yiti sagar amiku ma hanyu, amun hanyu ijuku nyambah aku.”

¹⁰Yesus nuing, “Hulu hanyu, Iblis! Hawuang Surat Barasis nasurat; Sambah Tuhan, Alatallanu, nelang ekat layanni hanye!”

¹¹Akhirni iblis nanan Yesus, balalu kawan malekat hawi malayanni hanye.

¹²Tawuk karengei hi Yohanes haut natamasuk mawuang panjara, Yesus balalu basingkir teka Galilea.

¹³Hanye nanan Nazaret, balalu muneng hang Kapernaum hang pinggir Danau Galilea hang daerah Zebulon anri Naftali.

¹⁴Daya gana Yesus nampalus hal yiru, balalu tulus inun sa nawara daya Nabi Yesaya. Kalayiti eauni,

¹⁵“Tane Zebulon anri tane Naftali, hang lalan ma danau hang sabarang Hungei Yordan, Galilea tane ulun sa puang Yahudi!

¹⁶Bangsa sa welum hawuang piieng haut kadinung piraai sa matalak! Ma ulun sa muneng hang tane piieng pampatei haut hulet sahaya piraai!”

¹⁷Nuku hengka tawuk yiru Yesus kaeau, “Ware batobat teka kawan dosa naun, daya puang lawah lagi Alatalla marentah kala Raja!”

¹⁸Tawuk Yesus ganjah takia hang iring Danau Galilea, hanye kadinung rueh kaulun pangenah, hanyeyiru hi Simon (sa naantuh pada hi Petrus) anri andini, hi Andreas. Here rahat malunta ngaiyuh kenah hang danau yiru.

¹⁹Yesus kaeau nengkan here, “Hayu umba aku. Aku sagar ngajar naun malunta murunsia.”

²⁰Balalu sitaitu here nanan lunta here palus umba Yesus.

²¹Yesus magun takia, balalu kadinung kamulek rueh kaulun ipulaksanai sa lain, hanyeyiru hi Yakobus anri hi Yohanes, kawan anak Zebedeus. Here baya anri ambah here rahat naragu lunta hawuang jukung. Yesus nerau here pada,

²²Balalu here tulak nanan jukung anri ambah here palus umba Yesus.

²³Hang Galilea Yesus bakaliling hang katuluh daerah. Hanye ngajar hang kawan lewu sumbayang nelang iwara Kabar Maeh neu Alatalla sagar marentah. Nelang hanye pada nyamare kawan ulun sa sakit nelang cacat.

²⁴Kabar neu Yesus yiru tasiar hang litar tane Siria, rama ulun hawi nunung hanye. Here nginsing kawan ulun sa ngaret wahai masam panyakit, anri wahai masam kasusahen; kawan ulun sa naasuk roh jahat, sa iweken, nelang sa lumpuh katuluhni nasamare daya Yesus.

²⁵Tawuk yiru rama ulun umba Yesus — naan sa hawi teka Galilea, naan sa teka sapuluh tumpuk, naan sa teka Yerusalem, teka Yudea, nelang naan pada sa teka daerah hang sabarang Yordan.