Read Ma'anyan MATIUS 5 Bible Online

MATIUS 5 - Ma'anyan bible

MATIUS 5

¹Tawuk Yesus kadinung ulun rama yiru, hanye mambai ma ambau bukit. Udi hanye maharung, kawan ulun sa umba hanye hawi nyanrite hanye,

²balalu hanye mulai ngajar here:

³“Tuu sanang marauh ulun sa kaingkam angaan badaya nelang ekat itegei harap witu Tuhan; here jari ulun pidian Alatalla!

⁴Tuu sanang marauh ulun sa mahanang atei; Alatalla sagar ngarariu here!

⁵Tuu sanang marauh ulun sa randah atei; Alatalla sagar nampalus janjini ma here!

⁶Tuu sanang marauh ulun sa hamen tuu nampalus kabahumen Alatalla; Alatalla sagar ngampi puas here!

⁷Tuu sanang marauh ulun sa miahi ulun lain; Alatalla sagar miahi here pada!

⁸Tuu sanang marauh ulun sa barasis ateini; here sagar kataru Alatalla!

⁹Tuu sanang marauh ulun sa nginsing damai hang penah murunsia; Alatalla sagar ngaku here jari kawan anakni!

¹⁰Tuu sanang marauh ulun sa wuah kahanangen daya nampalus kabahumen Alatalla; here jari ulun pidian Alatalla!

¹¹Tuu sanang marauh naun amun naampihala, nakahanangen, nelang napuntaka daya gana aku.

¹²Kawan nabi sa welum dahulu kapihuan naun haut nakahanangen kala yiru. Ware naun arai mihewu, daya hante upa sa nasadia Tuhan ma naun.”

¹³“Naun yiti rangi dunia. Amun rangi yiru mapahe, inun tau naampierang kamulek? Puang uweng gunani lagi, malengkan sagar naumpe nelang nararah ulun.

¹⁴Naun yiti piraai dunia. Tumpuk sa naan hang ambau bukit puang iyuh nadina.

¹⁵Puang uweng ulun sa nuntun palita, balalu nutup palita yiru makai gantang. Hanye likan ngelah palita yiru hang unengan palita, nampan nyanraai satiap ulun sa hawuang lewu.

¹⁶Kalayiru pada raai naun harus nyahaya hang hadapan murunsia, nampan here kadinung kawan pagawian naun sa maeh, balalu nawat nante Ambah naun hang surga.”

¹⁷“Ada minda aku yiti hawi nampan nyamawai hukum Moses anri ajaran kawan nabi. Aku hawi puang nampan nyamawaini, kude nampan nutui iwara arati sa kapinuuni.

¹⁸Ingat! Salawah langit anri tane magun naan, isa huruf atawa titik sa pangarumisni hawuang hukum yiru, puang sagar nasamawai, amun huan tulus katantuluhni!

¹⁹Daya sabab yiru, hie-hie malangar isa teka kawan hukum yiru, biar sa pangarumisni, palus ngajar ulun lain ngulah kala yiru pada, sagar jari sa pangarumis teka kawan ulun pidian Alatalla. Kabalikanni, hie-hie sa nampalus kawan parentah yiru nelang ngajar ulun lain ngulah kala yiru pada, sagar jari hante hang penah kawan ulun pidian Alatalla.

²⁰Jari, ingat: Naun puang tau pada jari ulun pidian Alatalla, amun naun puang labis teka kawan guru agama nelang kawan ulun Parisi hawuang hal nampalus kabahumen Alatalla!”

²¹“Naun karasa naan hang datu nini takam lengan ajar kalayiti: Ada munu ulun; hie-hie munu ulun, harus naadili.

²²Kude itati aku kaeau ma naun, hie-hie sa sangit anri ulun lain, hanye sagar naadili; kamulek hie-hie sa ngutuk ulun lain, harus naadili hang hadapan Pangadilan Agama. Nelang hie-hie sa kaeau ma ulun lain, ‘Bungul,’ sagar naumpe mawuang apui naraka.

²³Daya sabab yiru, amun isa teka teka naun rahat nyarah pangamianni ma Alatalla, balalu hanye kaitung naan ulun sa mahanang atei dayani,

²⁴ware hanye nanan pangamianni yiru duluni hang hadapan mezbah, balalu tulak lepuh ikaeh badamai anri ulun yiru. Udi yiru, wau hanye mulek palus nyarah pangamianni ma Alatalla.

²⁵Amun naan ulun mangadu naun ma pangadilan, ware naun badamai anri hanye katimpulu magun naan waktu kapihuan hampe ma pangadilan. Jaka puang, ulun yiru sagar nyarah naun ma hakim, palus hakim yiru die sagar nyarah naun ma polisi. Balalu polisi sagar namasuk naun mawuang panjara.

²⁶Ingat: Himat naun puang sagar kaiyuh kaluar teka panjara yiru, kapihuan katuluh utang naun huan punah nabayar.”

²⁷“Naun karasa naan lengan ajar kalayiti: Ada idapa.

²⁸Kude itati aku kaeau ma naun: hie-hie sa ninung erang kaulun wawei anri kunuan idapa, ulun yiru haut idapa anri wawei yiru hawuang ateini.

²⁹Amun mateinu tuhi kawan ngulah hanyu badosa, garuit palus umpe matei yiru! Labis maeh hanyu kawawaian isa teka anggota tenganu, teka katuluh tenganu naumpe mawuang apui naraka.

³⁰Amun tangannu tuhi kawan ngulah hanyu badosa, tetek palus umpe tangan yiru! Labis maeh hanyu kawawaian tuhi tangannu, teka katuluh tenganu masuk ma naraka.”

³¹“Naan pada lengan ajar kalayiti: satiap ulun sa nyansarak matueh waweini, harus ngami surat cerai ma hanye.

³²Kude itati aku kaeau anri naun: hie-hie sa nyansarak matueh waweini padahal wawei yiru puang idapa, ngulah matueh waweini yiru idapa, amun matueh waweini yiru narangan lagi. Nelang hie-hie sa narangan wawei sa haut sarak yiru, hanye idapa pada.”

³³“Naun haut karasa hang datu nini takam naan lengan ajar kalayiti: ada ngubah janji. Inun sa haut najanjinu makai sumpah hang hadapan Alatalla, harus hanyu nampalusni.

³⁴Kude itati aku kaeau anri naun: ada budas basumpah, hau demi langit, daya langit yiru padadusan Alatalla,

³⁵atawa demi bumi, daya bumi yiru pirarahan peeni; atawa demi Yerusalem, daya yiru tumpuk Raja hante.

³⁶Ada pada basumpah demi ulunu, daya hanyu puang tau ngulah wulunu jari mahilak atawa maintem, biar sunah erang kawila.

³⁷Eauleh ‘Hiai’ atawa ‘Puang’ — diwi teka yiru hawini teka hi Iblis.”

³⁸“Naun karasa samula naan pada lengan ajar kalayiti: matei ganti matei, dipen ganti dipen.

³⁹Kude itati aku kaeau ma naun: ada iwaleh ma ulun sa ngulah jahat ma naun. Kabalikanni amun ulun nampar pahunu tuhi kawan, aret pada hanye nampar pahunu tuhi kawi.

⁴⁰Amun ulun mangadu naun ma hakim nelang hamen ngalap bajunu, ami pada ma hanye jubahnu.

⁴¹Amun erang kaulun panguasa maksa naun mikul barangni erang kilometer lawitni, pikul hampe rueh kilometer lawitni.

⁴²Amun ulun laku inun-inun hengka hanyu, amileh ma hanye. Nelang ada pada nampik ulun sa hamen ngihau inun-inun teka hanyu.”

⁴³“Naun karasa naan pada lengan ajar kalayiti: sinta ma kawan hengaunu nelang muar ma kawan musuhnu.

⁴⁴Kude itati aku kaeau ma hanyu: wuah hanyu sinta ma kawan musuhnu nelang badoa ma kawan ulun sa manyiksa hanyu,

⁴⁵nampan naun jari kawan anak Ambahnu sa hang surga. Daya Alatalla ngampi hulet mate anrauni ma ulun sa maeh nelang pada ma ulun sa jahat. Hanye nyanawu uran ma ulun sa ngulah maeh nelang pada ma ulun sa ngulah jahat.

⁴⁶Daya amun naun ekat sinta ulun sa sinta naun, ma inun Alatalla harus iwaleh ulah gawi naun yiru? Angneh kawan tukang tagis pajak pada ngulah kala yiru?

⁴⁷Amun naun ekat ngami salam ma hengau naun, inun kalabihan naun? Kawan ulun sa puang kataru Alatalla pada ngulah kala yiru!

⁴⁸Ambahnu sa hang surga sinta ma katantuluh ulun anri tinduh paruna. Naun harus kala yiru pada.”