Read Ma'anyan MATIUS 6 Bible Online

MATIUS 6 - Ma'anyan bible

MATIUS 6

¹“Ingat, ada naun nampalus kawajiban agama hang penah rama nampan nadinung ulun. Amun naun ngulah kala yiru, naun puang naami upa daya Ambah naun hang surga.

²Jari, amun naun ngami sadakah ma ulun paua, ada iwawara hal yiru kala sa naulah daya kawan ulun sa bapura-pura. Here sindi nampalus yiru hawuang lewu sumbayang atawa hang lalan rami, nampan natawat ulun. Ingat, here haut narime upani.

³Kude naun, amun naun ngami sadakah, amileh anri suni-suni, hampe puang uweng ulun sa karasa.

⁴Elahni pagawiannu yiru puang sunah erang kaulun sakarasa, kasuali Ambahnu hang surga. Hanye kadinung pagawiannu sa suni-suni yiru balalu hanye sagar ngami upa ma hanyu.”

⁵“Amun naun badoa, ada kala kawan ulun sa bapura-pura. Here sindi badoa nelang minri hang lewu sumbayang atawa hang tumpa lalan nampan nadinung ulun. Ingat, yiru upa sa natarime daya here.

⁶Kude amun naun badoa, asuk ma kamar palus tutup wanawang, balalu badoa ma Ambahnu sa puang dinung yiru. Maka Ambahnu sa kadinung pagawiannu sa suni-suni yiru sagar ngami upa ma hanyu.

⁷Amun naun badoa ada menye-menye kakulek kala wangun kawan ulun sa puang kataru Tuhan. Here minda pilakuan here nasanrengei daya doa here sa ambau yiru.

⁸Ada kala here. Ambahnu haut karasa inun sa nalaku naun, kapihuan naun ilaku.

⁹Jari badoaleh kalayiti, ‘Ambah kami sa hang surga: Hanyu Alatalla sa tungkan. Hanyu sa nasambah nelang nahormat.

¹⁰Hanyu Raja kami. Wuah hanyu marentah hang ambau tane, nelang kabahumennu ngalut nuu kala hang surga.

¹¹Ami ma kami hang anrau yiti kutaen sa na parlu daya kami.

¹²Ampun kami teka kahalaen kami, kala kami haut ngampun ulun sukat bakahalaen anri kami.

¹³Ada maladar kami kawawaian kaparisayaan tawuk kami napurija, kude sanepah kami teka kuasa sa jahat. [Hanyu Raja sa bakuasa nelang mulia hampe kalalawahni. Amin.]’

¹⁴Amun naun ngampun ulun sukat bakahalaen ma naun, Ambahnu sa hang surga pada sagar ngampun naun sa bakahalaen.

¹⁵Kude amun naun puang ngampun ulun lain sukat bakahalaen, Ambahnu sa hang surga pada puang sagar ngampun naun sa bakahalaen.”

¹⁶“Amun naun puasa, ada wangun uruwawa naun raruuk kala kawan ulun sa bapura-pura. Here ngubah wangun sari sahaya uruwawani nampan katuluh ulun kataru here puasa. Ingat, here haut narime upani.

¹⁷Kude amun naun puasa, saawui uruwawa naun nelang hurut wulu naun,

¹⁸nampan puang uweng sa kataru naun puasa, kasuali Ambahnu sa puang dinung yiru. Hanye kadinung pagawian naun sa suni-suni yiru nelang sagar ngami upa ma naun.”

¹⁹“Ada ngumpul harata ma diri naun hang dunia, hang unengan kametei anri tagar tau nanrusakni kamulek maling tau hawi ngalatni.

²⁰Kabalikanni, kumpulleh harata hang surga, hang unengan kametei anri tagar puang tau nanrusakni, kamulek maling puang tau hawi ngalatni.

²¹Daya hang awe unengan harata naun, hang yiru pada atei naun!”

²²“Matei yiru palita ma tenga. Amun mateinu jaranis, katuluh tenganu nyiar-maraai.

²³Kude amun mateinu kabus, katuluh tenganu maieng-maituk. Jari amun palita hawuang tenga dirinu yiru maieng, maka tuu tamam piiengni yiru!”

²⁴“Puang uweng sunah erang kaulun tau bagawi ma rueh majikan. Daya hanye sagar labis sinta sa isa, teka sa lain. Atawa hanye sagar labis satia ma majikan sa isa, teka ma sa lain. Kala yiru pada naun. Naun puang tau bagawi ma Alatalla nelang ma harata banda pada.

²⁵Daya yiru ingat; ada gaer neu pamelum naun, hanyeyiru inun sa sagar nakuta nelang nauut naun, atawa inun sa sagar napakai naun? Angneh pamelum yiru diwi teka kutaen, nelang tenga diwi teka pakaian?

²⁶Dinung naun kawan wurung. Here angaan miamulean, puang masi, nelang puang pada ngumpul hasil amuleanni mawuang wirang. Biar kala yiru Ambahnu sa hang surga malihara here! Angneh naun diwi baharaga teka kawan wurung?

²⁷Hiekah teka naun sa makai kagaeranni tau ngampambau umurni sunah hena butit?

²⁸Wuah inun naun gaer neu pakaiannu? Dinung kawan wunge bakung sa welum hang lasi. Kawan wunge yiru puang bagawi nelang puang nawai;

²⁹kude Raja Salomo sa kala yiru tatauni, puang makai pakaian kala kaeh kawan wunge yiru!

³⁰Rikut hang lasi tumbu anrau yiti kude kaiyat uni galis natutung. Kude Alatalla malihara mahias rikut yiru kalayiru kaehni, duanni naun! Kude naun kurang parisaya!

³¹Ada gaer nelang kaeau, ‘Inun sa sagar nakuta takam,’ atawa ‘inun sa sagar nauut takam,’ atawa ‘inun sa sagar napakai takam’?

³²Kawan yiru saratang naantara nasasah daya kawan ulun sa puang kataru Alatalla. Padahal Ambahnu sa hang surga karasa naun parlu katuluhni yiru.

³³Jari, ngakali dahulu nampan Alatalla marentah pamelum naun nelang naun nampalus kabahumenni. Balalu katantuluh sa lain pada sagar naami Alatalla ma naun.

³⁴Daya gana yiru, ada gaer neu anrau kauni. Anrau yiti haut sukup kasusahenni, puang usah natambah lagi.”