Read Ma'anyan MATIUS 7 Bible Online

MATIUS 7 - Ma'anyan bible

MATIUS 7

¹“Ada mahakimi ulun lain, nampan naun pada ada nahakimi daya Alatalla.

²Daya sameh kala wangun naun mahakimi ulun lain, kalayiru pada Alatalla sagar mahakimi naun. Nelang ukuran sa napakai naun ma ulun lain, pada sagar napakai daya Alatalla ma naun.

³Wuah inun naun kadinung huai hang matei pulaksanainu, kude baluk hang mateinu puang naun kadinung?

⁴Kalaawe naun tau kaeau ma pulaksanainu, ‘Hayu elah aku ngaluar huai yiru teka mateinu,’ kude hang mateinu raerai naan baluk?

⁵U ulun sa bapura-pura! umpe dahulu baluk teka mateinu, wau hanyu tau tarang kadinung balalu tau ngaluar huai teka matei pulaksanainu.

⁶Ada ngami barang sa barasis ma antahu, nampan antahu yiru puang iwaleng nyasah palus nyambar hanyu. Kamulek ada ngami mutiara ma iwek, nampan iwek yiru ada ngakijak narah mutiara yiru.”

⁷“Laku, maka naun sagar narime. Antara, maka naun sagar kahaba. Talitik, maka wanawang sagar nauka ma naun.

⁸Daya ulun sa ilaku, sagar narime; ulun sa ngantara sagar kahaba; nelang ulun sa nalitik, wanawang sagar nauka ma hanye.

⁹Teka naun, inun naan ambah sa ngami watu ma anakni, amun hanye ilaku rute?

¹⁰Atawa ngami kadiawet, amun hanye ilaku kenah?

¹¹Biar kalaawe jahatni naun, naun kataru pada ngami sa maeh ma kawan anak naun. Duanni Ambahnu hang surga! Hanye himat tatuu ngami sa maeh ma ulun sa ilaku teka hanye.

¹²Tampalus ma ulun lain kala sa nakabahumen naun natampalus here ma naun. Yiru inti hukum Moses anri ajaran kawan nabi.”

¹³“Ware masuk mitah wanawang sa hipit, daya wanawang nelang lalan sa nuju naraka laga nelang buka, rama ulun sa malupui lalan yiru.

¹⁴Kude wanawang hipit nelang mahadin naasuk yiru lalan sa nginsing ulun ma pamelum. Nelang duhu ulun sa kahaba lalan yiru.”

¹⁵“Hati-hati nadap kawan nabi palasu. Here hawi nunung naun kala wangun babiri, kude satuuni here kala sarigala sa buas.

¹⁶Naun sagar kataru here hengka hasil pagawianni. Jumpun sa barunrui puang tau pada mua wua anggur, nelang lasi sa penu rikut puang tau mua wua ara.

¹⁷Teka kakau sa subur kaiyuh wua sa maeh, nelang teka kakau sa puang subur mua wua sa bureng.

¹⁸Kakau sa subur puang tau mua wua sa bureng, kakau sa puang subur puang tau mua wua sa maeh.

¹⁹Satiap kakau sa puang mua wua maeh, nateweng palus natutung

²⁰Kalayiru pada anri kawan nabi palasu. Naun sagar kataru here teka hasil pagawianni.”

²¹“Puang katuluh ulun sa nerau aku, ‘Tuhan, Tuhan,’ sagar jari ulun pidian Alatalla, kude ekat kawan ulun sa nampalus kabahumen Ambahku sa hang surga.

²²Hang Anrau Kiamat rama ulun sagar kaeau nengkan aku, ‘Tuhan, Tuhan, angneh anri ngaran Tuhan kami haut nampe pesen Alatalla? Angneh makai ngaran Tuhan pada kami haut ngusir kawan roh jahat nelang ngulah wahai tanda kawauhen?’

²³Kude aku sagar nuing, ‘Aku puang suah kataru naun! Hulu teka yiti, naun sa ngulah kajahaten!’ ”

²⁴“Nah, ulun sa nyanrengei lenganku yiti, nelang makaini sameh kala ulun pintar sa ngambuan lewuni hang ambau watu.

²⁵Tawuk anrau uran mehet, nelang ranu baah hawi nasinrah anri riwut barat mehet nampuh lewu yiru, lewu yiru puang tumbang daya naambuan hang ambau watu.

²⁶Kamulek ulun sa nyanrengei lenganku yiti, kude puang makaini, hanye sameh kala ulun budu sa ngambuan lewu hang ambau karasik.

²⁷Tawuk anrau uran mehet nelang ranu baah hawi nasinrah anri riwut barat mehet nampuh lewu yiru, lewu yiru tumbang. Nelang panrusakni tamam tatuu!”

²⁸Dami Yesus luput ngajar, kawan ulun sa naan hang yiru uras mandam karengei ajaranni.

²⁹Daya hanye ngajar anri bapangaruh puang kala kawan guru agama here.