Read Ma'anyan MATIUS 8 Bible Online

MATIUS 8 - Ma'anyan bible

MATIUS 8

¹Yesus minau teka bukit, nelang rama ulun naharak hanye.

²Tawuk yiru hawi erang kaulun kadanen. Hanye ileku hang hadapan Yesus, palus kaeau, “Amun hanyu ngaheng, hanyu tau nyamare aku.”

³Yesus manjamah ulun yiru, nelang kaeau, “Aku ngaheng. Hanyu ware!” Tawuk yiru jua panyakitni wawai.

⁴Balalu eau Yesus nengkan hanye, “Ingat! Ada hanyu nyaritani ma hie-hie. Kude hulu hanyu nunung imam, laku hanye mariksa hanyu. Udi yiru sarah parapah sa naparentah Moses, umak mambukti ma ulun rama hanyu tuu-tuu haut ware!”

⁵Tawuk Yesus masuk ma Kapernaum, erang kaulun parwira Roma hawi manalu hanye, nelang laku karawah teka hanye.

⁶“Guru,” eau parwira yiru, “palayanku sakit hang lewu. Hanye lumpuh, mangkading hang paanreanni nelang hanye tuu uyuh ngaret kahanangen.”

⁷Eau Yesus, “Aku sagar tulak nyamare hanye.”

⁸“Puang usah Guru,” tuing parwira yiru, “Aku puang patut narime hanyu hang lewuku. Hanyu ekat marentahleh. Die palayanku yiru ware.

⁹Daya aku pada harus tunduk ma parentah atasanku. Nelang hang imbe aku naan pada kawan parajurit sa harus tunduk ma parentahku. Amun aku nunyu erang kaulun parajurit, ‘Hulu tulak!’ hanye balalu tulak. Aku kaeau anri sa lain, ‘Ma yati!’ hanye balalu hawi; nelang amun aku marentah palayanku, ‘Ulah yiti!’ hanye balalu ngulahni.”

¹⁰Tawuk Yesus karengei inun sa naeau daya parwira yiru, hanye mandam. Balalu hanye kaeau nengkan kawan ulun sa naharak hanye, “Tuu tamam ulun yiti. Hang penah ulun Israel huan suah aku kahaba kaparisayaan sa kalayiti hanteni!

¹¹Kapinuu-nuuni! Rama ulun sagar hawi teka timur nelang barat umba arai — mihewu baya hi Abraham, Ishak, anri hi Yakub hawuang Dunia Wau wat Alatalla.

¹²Kude kawan ulun sa saharusni jari ulun pidian Alatalla sagar naumpe ma piieng hang luar. Hang yiru here sagar nungkau ngaret kahanangen.”

¹³Balalu Yesus kaeau nengkan parwira yiru, “Hulu hanyu mudi, inun sa naparisayanu yiru sagar jari.” Balalu tawuk yiru jua palayanni yiru ware.

¹⁴Yesus tulak ma lewu Petrus. Hang yaru hanye kadinung kasian Petrus ganjah mekum hang paanreanni.

¹⁵Yesus manjamah tanganni, balalu ekumni wawai. Hanye ambuan palus malayanni Yesus.

¹⁶Dami anrau nuku kariwe, ulun nginsing nunung Yesus rama ulun sa naasuk roh jahat. Makai erang kawusi lengan, Yesus ngusir kawan roh jahat yiru nelang nyamare katuluh ulun sa sakit.

¹⁷Yesus nampalus katantuluh yiru, nampan tulus inun sa naeau daya nabi Yesaya, kalayiti, “Hanye nanggung kahanangen takam nelang nyamare panyakit takam.”

¹⁸Rama tatuu ulun ngawariung Yesus. Tawuk Yesus kadinung here katuluh yiru, hanye nunyu kawan ulun sa umba hanye nyabarang danau.

¹⁹Balalu erang kaulun guru agama hawi nunung hanye nelang kaeau, “Guru, aku hamen umba hanyu maaweleh!”

²⁰Yesus nuing, “Sarigala uweng liang, wurung uweng hanai, kude Anak Murunsia puang uweng paunenganni mangkading.”

²¹Balalu erang kaulun sa umba hanye sa lain kaeau, “Guru, ijin aku mudi duluni lepuh masar ambahku.”

²²Kude Yesus nuing, “Umba aku, elahni ulun matei masar ulun matei wat here raerai.”

²³Yesus sungkat mawuang jukung nelang kawan ulun sa umba hanye, pada umba sinrah baya hanye.

²⁴Salenga hawi riwut barat mehet tatuu nampuh danau hampe jukung here pipi galumbang. Tawuk yiru Yesus ganjah manre.

²⁵Balalu kawan ulun sa umba hanye tulak nunung hanye palus ngele hanye. “Guru! Karawah! Takam silaka!” eau here.

²⁶“Wuah inun naun takut?” eau Yesus. “Naun kurang parisaya ma aku!” Udi yiru Yesus minri palus misuh riwut barat anri danau yiru. Balalu danau taduh bagalumbang.

²⁷Kawan ulun sa umba Yesus wauh. Here kaeau, “Ulun inun hanye yiti, hampe riwut barat anri galumbang nuu parentahni!”

²⁸Yesus hampe sabarang danau hang daerah Gadara. Hang yiru rueh kaulun sa naasuk roh jahat hawi nunung hanye. Kararueh ulun yiru maraat tatuu, hampe puang sunah erang kaulun heei mitah hang yiru.

²⁹Here kaluar teka kawan luwang pasaran nelang nantiak, “Anak Alatalla, sagar nainunnu kami? Inun hanyu haut ngunu nyiksa kami biar huan hampe wayahni?”

³⁰Puang lawit teka yiru, naan sawayan iwek rahat ngantilau kutaen.

³¹Kawan roh jahat yiru ilaku hengka Yesus, “Amun hanyu sagar nunyu kami kaluar, huyu kami masuk mawuang kawan iwek yiru.”

³²“Hulu!” eau Yesus. Kawan roh jahat yiru kaluar hengka kararueh ulun yiru, balalu masuk mawuang kawan iwek yiru. Balalu kawan iwek yiru nempat palus mitun teka iring pampang mawuang danau, palus leteng.

³³Kawan ulun sa jaga iwek yiru nempat ma tumpuk, palus nyarita katuluh kajadian yiru, pada neu inun sa haut jari anri rueh kaulun sa naasuk roh jahat yiru.

³⁴Maka katuluh ulun hang tumpuk yiru balalu tulak manalu Yesus. Dami here kadinung Yesus, here ilaku tatuu nampan Yesus tulak nanan daerah here.