Read Ma'anyan MATIUS 9 Bible Online

MATIUS 9 - Ma'anyan bible

MATIUS 9

¹Yesus sungkat mawuang jukung, balalu nyabarang danau, mudi ma tumpuk natatni.

²Hang yaru ulun nginsing nunung hanye erang kaulun lumpuh sa mangkading hang patah. Dami Yesus kadinung tuu leha hante kaparisayaan kawan ulun yiru, hanye kaeau nengkan ulun lumpuh yiru, “Tabahleh anakku! Hanyu haut naampun teka kawan dosanu.”

³Papire kaulun guru agama sa naan hang yiru kaeau hawuang atei here, “Ulun yiti mahina Alatalla!”

⁴Yesus karasa pikiran here, balalu hanye kaeau, “Wuah inun pikirannu jahat kalayiru?

⁵Saawe sa labis murah: ngantuh, ‘Hanyu haut naampun teka dosanu’, atawa ngantuh, ‘Ambuan hulu takia’?

⁶Kude itati aku sagar mambuktini ma naun sa Anak Murunsia bakuasa hang ambau tane yiti neu ngampun ulun badosa” Balalu Yesus kaeau nengkan ulun lumpuh yiru, “Ambuan, enat patahnu hulu mudi!”

⁷Ulun lumpuh yiru balalu ambuan palus mudi ma lewuni.

⁸Tawuk ulun rama kadinung kajadian yiru, here bangat takut palus nawat nante Alatalla, daya Alatalla haut ngami kuasa kala yiru hanteni ma murunsia.

⁹Udi yiru Yesus tulak nanan unengan yiru. Tawuk takia, hanye kadinung erang kaulun tukang tagis pajak, ngaranni hi Matius, rahat maharung hang kantor pajak. Yesus kaeau nengkan hanye, “Hayu umba aku!” Balalu hi Matius minri palus umba Yesus.

¹⁰Tawuk Yesus ganjah kuman hang lewu Matius, rama kawan tukang tagis pajak anri kawan ulun sa naanggap puang maeh daya masyarakat, umba kuman baya Yesus anri kawan ulun sa umba hanye.

¹¹Naan kawan ulun Parisi sa kadinung hal yiru. Balalu here nunti teka kawan ulun sa umba Yesus, “Daya inun guru naun kuman baya anri tukang tagis pajak nelang baya kawan ulun sa puang maeh?”

¹²Yesus karengei lengan tuntian here balalu nuing, “Ulun sehat puang parlu dokter, ekat ulun sa sakit.

¹³Pantaru inun aratini ayat Surat Barasis sa kaeau kalayiti; ‘Ahi lelo sa nakabahumenku, puang parapah eha’. Daya aku hawi puang lepuh nerau kawan ulun sa nganggap dirini mawitu bujur, malengkan kawan ulun sa badosa.”

¹⁴Udi yiru kawan ulun sa umba Yohanes Pambaptis hawi nunung Yesus. Balalu here nunti, “Wuah inun kami anri kawan ulun Parisi puasa kude ulun sa umba hanyu puang puasa?”

¹⁵Yesus nuing, “Kala awe hang naun? Inun tau kawan tamu hang pesta kawin mahanang atei amun pangantin upu magun naan baya anri here? Batantu puang! Kude naan wayahni pangantin upu yiru naalap teka here. Tawuk yiru wau here puasa.

¹⁶Puang uweng ulun numpang baju uhang makai riris kain wau. Daya kain sa pakai numpang yiru sagar pakarusut balalu nyansitat baju yiru, balalu ngulah sitatni batambah hante.

¹⁷Kala yiru pada puang uweng ulun nuwe anggur sa wau mawuang kantung kulit sa uhang. Daya kantung yiru sagar bingkas palus rusak, balalu anggurni manyahanyang. Anggur wau harus nahuwe ma kantung sa wau pada, nampan kararuehni tatap maeh.”

¹⁸Rahat Yesus bapaner anri kawan ulun sa umba Yohanes Pambaptis, hawi erang kaulun pamimpin lewu sumbayang. Hanye ileku hang hadapan Yesus palus kaeau, “Anakku wawei wau tuu matei. Kude, inun hanyu hamen hawi lepuh hanrapak tangannu hang hanye nampan hanye welum kamulek.”

¹⁹Yesus ambuan balalu tulak anri kawan ulun sa umba hanye sinrah anri ulun yiru.

²⁰Hang penah lalan naan erang kaulun wawei sa haut dua walas taun lawahni wuah panyakit wawei sahubungan anri haidni, hawi naripi Yesus teka wading punggung Yesus. Hanye bapikir, “Asal aku sunah ngawir jubahni, aku sagar ware.” Balalu hanye ngawir hujung jubah Yesus.

²²Hang tawuk yiru Yesus iwaleng palus kadinung wawei yiru balalu kaeau nengkan hanye, “Tabahleh, anakku! Daya hanyu parisaya, hanyu ware!” Hang tawuk yiru jua wawei yiru balalu ware.

²³Dami udi yiru Yesus hampe hang lewu pamimpin lewu sumbayang yiru. Hanye kadinung kawan ulun tukang ipalu, malu papaluan ulun matei nelang ulun rama rawek rukah,

²⁴hanye kaeau ma here, “Kaluar naun katuluh! Anak yiti puang matei; hanye manre.” Here katuluh kakihi karengei Yesus kaeau kalayiru.

²⁵Udi ulun rama yiru kaluar, Yesus masuk mawuang kamar iya yiru palus negei tanganni. Balalu iya wawei yiru ambuan.

²⁶Kabar yiru tasiar litar ma katuluh daerah yiru.

²⁷Yesus tulak teka yiru, hang penah lalan naan rueh kaulun pehe naharak hanye. Anri mehet lengan here nanterau, “Anak Dawid, palelo kami!”

²⁸Dami Yesus masuk mawuang lewu, kararueh ulun pehe yiru hawi nunung hanye. Yesus nunti ma here, “Inun naun parisaya aku tau nyamare naun?” “Parisaya!” tuing here.

²⁹Balalu Yesus muhut matei here nelang kaeau, “Daya naun parisaya, maka jari inun sa naharap daya naun.”

³⁰Balalu here tau kadinung. Yesus bahimat ngampi itung here, nampan ada iwawara ma hie-hie neu hal yiru.

³¹Kude here tulak nelang iwara kabar neu Yesus litar ma katuluh daerah.

³²Tawuk rueh kaulun yiru tulak, erang kaulun muna sa nakuasai daya roh jahat nainsing nunung Yesus.

³³Yesus ngusir roh jahat yiru palus hang tawuk yiru jua ulun yiru tau pantane lagi. Ulun rama yiru wauh nelang kaeau, “Huan suah kami kadinung kajadian kala yiti hang Israel!”

³⁴Kude kawan ulun Parisi kaeau, “Kapala kawan roh jahat sa ngami kuasa ma hanye umak ngusir kawan roh jahat yiru.”

³⁵Yesus tulak bakaliling teka tumpuk isa ma tumpuk sa lain nelang teka desa isa ma desa sa lain. Hanye ngajar hang kawan lewu sumbayang, nelang iwara Kabar Maeh neu kewangun Alatalla haut marentah kala Raja. Hanye nyamare kawan ulun sa ngaret wahai masam panyakit nelang cacat tenga.

³⁶Tawuk Yesus kadinung ulun rama yiru, hanye tuu palelo ma here, daya here bingung nelang puang badaya, kala babiri sa puang uweng pakatik.

³⁷Balalu Yesus kaeau nengkan kawan ulun sa umba hanye, “Wasian wahai, kude ulun tukang wasi puang rama.

³⁸Daya yiru laku teka sa ampun kabun yiru nampan hanye ngirim ulun pakai masi.”