Read Ma'anyan MARKUS 1 Bible Online

MARKUS 1 - Ma'anyan bible

MARKUS 1

¹Iti Kabar Maeh neu Yesus Kristus, Anak Alatalla.

²Kabar Maeh yiru nuku kala sa nasurat daya Nabi Yesaya, kala yiti, “ ‘Iti utusanku,’ eau Alatalla; ‘Aku ngutus hanye dahulu teka hanyu, nampan hanye nawah lalan ma hanyu.’

³Naan ulun nanterau hang padang gurun, ‘Sadia lalan ma Tuhan; sanrata kawan lalan sa sagar naitah dayani.’ ”

⁴Kala sa nasurat yiru, kalayiru pada hawi hi Yohanes hang padang gurun. Hanye mambaptis ulun nelang nampe Kabar teka Alatalla. “Naun harus batobat teka kawan dosa naun nelang harus nabaptis, nampan Alatalla ngampun naun,” kalayiru eau Yohanes.

⁵Katuluh ulun teka tane Yudea anri teka tumpuk Yerusalem tulak lepuh nyanrengei hi Yohanes. Here mangaku kawan dosa here, balalu hi Yohanes mambaptis here hang Hungei Yordan.

⁶Hi Yohanes makai pakaian teka wulu unta. Ikat pinggangni teka kulit, nelang kutaenni angkalap baya riu wani jumpun.

⁷Hanye iwara kabar yiti, “Die udi aku sagar hawi ulun sa labis tamam hengka aku. Neu ijuku nguka tadi sapatuni, aku sika puang patut.

⁸Aku mambaptis naun makai ranu, kude hanye sagar mambaptis naun makai Roh Alatalla.”

⁹Hang tawuk yiru Yesus hawi teka Nazaret hang daerah Galilea, balalu hi Yohanes mambaptis hanye hang Hungei Yordan.

¹⁰Dami Yesus hulet teka wuang ranu hang hungei yiru, hanye kadinung langit pauka nelang Roh Alatalla minau yalah wurung dara ma ambau hanye.

¹¹Udi yiru naan rengei lengan Alatalla sa kaeau, “Hanyu Anakku sa nasintaku. Hanyu ngampi sanang ateiku.”

¹²Palus udiyiru Roh Alatalla ngannyak Yesus tulak hampi padang gurun.

¹³Epat pulu anrau hanye muneng hang yaru, napurija daya Iblis. Kawan eha liar naan pada baya anri hanye hang yaru, kamulek kawan malekat malayanni hanye.

¹⁴Dami hi Yohanes napanjara. Yesus tulak hampi Galilea, palus iwara Kabar Maeh teka Alatalla hang yaru.

¹⁵Eauni, “Alatalla puang lawah lagi sagar nuku marentah. Ware batobat teka kawan dosa naun, nelang parisaya ma Kabar Maeh sa teka Alatalla!”

¹⁶Tawuk Yesus takia hang iring pantai Danau Galilea, hanye kadinung rueh kaulun pangenah, hanyeyiru hi Simon anri andini hi Andreas. Here rahat malunta hang danau yiru.

¹⁷Yesus kaeau ma here, “Ware umba aku. Aku sagar ngajar naun malunta murunsia.”

¹⁸Here balalu nanan lunta here palus umba Yesus.

¹⁹Yesus tarus takia, balalu kadinung kamulek rueh kaulun ipulaksanai sa lain, hanyeyiru hi Yakobus anri hi Yohanes, kawan anak Zebedeus. Here muneng hawuang jukung, rahat nangkaeh lunta here.

²⁰Yesus nerau here. Balalu here nanan ambah here hang jukung baya anri kawan ulun upaanni. Balalu here tulak umba Yesus.

²¹Yesus anri kawan ulun sa umba hanye hampe hang tumpuk Kapernaum. Hang hinra anrau Sabat, Yesus masuk mawuang lewu sumbayang balalu nuku ngajar.

²²Kawan ulun sa nyanrengei wauh neu sara hanye ngajar. Daya hanye ngajar anri bapangaruh, puang kala kawan guru agama.

²³Tawuk yiru erang kaulun sa karasukan roh jahat masuk mawuang lewu sumbayang, nelang nantiak kaeau,

²⁴“U Yesus, ulun Nazaret, inun sa kai naulahnu anri kami? Hanyu hawi nampan ngabinasa kami? Aku karasa hie hanyu: Hanyu utusan sa barasis teka Alatalla!”

²⁵“Suni!” pisuh Yesus ma roh yiru, “Kaluar teka ulun yiti!”

²⁶Roh jahat yiru balalu bahimat ngagunsang ulun yiru, udi yiru hanye kaluar teka ulun yiru nelang nantiak.

²⁷Katuluh ulun wauh tatuu, hampe here kaeau anri sameh here, “Heheh, inun yiti? Isa pangajaran sa wau! Anri bapangaruh nelang kuasa hanye marentah kawan roh jahat kaluar, nelang here ngalut nuu parentahni!”

²⁸Maka kabar neu Yesus hinang tasiar ma katuluh daerah Galilea.

²⁹Yesus anri kawan ulun sa umba hanye nanan lewu sumbayang yiru, balalu tulak hampi lewu Simon anri hi Andreas. Hi Yakobus anri hi Yohanes tulak pada sinrah baya here.

³⁰Kasian Simon ganjah mekum hang pangkadinganni. Jari tawuk Yesus anri kawan ulun sa umba hanye masuk ma lewu yiru, ma Yesus nawara neu hal yiru.

³¹Balalu Yesus tulak nyanrite kasian Simon, palus negei tanganni, balalu ngarawah hanye ambuan. Ekumni sitaitu wawai, nelang hanye balalu nuku malayanni here.

³²Kariwe anrauni, udi mate anrau leteng, ulun rama hawi nginsing nunung Yesus kawan ulun sa sakit anri sa narasuk daya roh jahat.

³³Katuluh panduduk tumpuk yiru bakajal hang hadapan lewu yiru.

³⁴Balalu Yesus nyamare rama ulun sa ngaret wahai masam panyakit, nelang pada ngusir wahai roh jahat. Hanye nguring kawan roh jahat yiru bapaner, daya here karasa hie hanye.

³⁵Kaiyat anrauni, lagi maieng-ieng, Yesus ambuan balalu tulak nanan lewu. Hanye tulak hampi unengan suni hang luar tumpuk, balalu badoa hang yaru.

³⁶Kude hi Simon anri kawan hengauni tulak ngantilau hanye.

³⁷Dami here panalu hanye, here kaeau, “Katuluh ulun ganjah ngantilau hanyu.”

³⁸Kude Yesus nuing, “Hayu takam nampalus pakiaan takam hampi kawan tumpuk lain hang kalilingan yiti. Aku harus bakhotbah hang yaru pada, daya neu yiru aku hawi ma yiti.”

³⁹Daya yiru maka Yesus tulak hampi maaru-maati litar Galilea, nelang bakhotbah hang kawan lewu sumbayang nelang ngusir kawan roh jahat.

⁴⁰Erang kaulun kadanen, hawi nunung Yesus. Ulun yiru ileku, palus kaeau, “Amun hanyu hamen, hanyu tau nyamare aku.”

⁴¹Yesus malelu ulun yiru. Jari, hanye balalu nyambe ulun yiru nelang kaeau, “Aku hamen, hanyu ware!”

⁴²Tawuk yiru jua panyakitni wawai palus hanye ware.

⁴³Balalu Yesus nunyu hanye tulak nelang ngakatang kalayiti,

⁴⁴“Awas, ada hanyu nyarita ma hie-hie, kude hulu tunung imam, laku hanye mariksa hanyu mambukti hanyu tuu haut ware. Balalu neu hanyu haut ware yiru, sarah parapah manyu sa naparentah daya Moses, yalah bukti ma ulun rama hanyu tuu-tuu haut ware.”

⁴⁵Kude ulun yiru tulak, nelang puang taduh haut nyarita kajadian yiru hang awe-awe hampe Yesus puang tau masuk ma tumpuk anri tarang-tarangan. Hanye ekat muneng hang luar tumpuk hang unengan suni. Kude ulun santar hawi nunung hanye teka maaru-maati.