Read Ma'anyan MARKUS 10 Bible Online

MARKUS 10 - Ma'anyan bible

MARKUS 10

¹Udi yiru Yesus nanan unengan yiru, tulak hampi daerah Yudea anri daerah hang sabarang Hungei Yordan. Ulun rama hawi lagi nguruwundung ngaliling Yesus. Balalu kala biasa Yesus ngajar here.

²Papire kaulun ulun Farisi hawi pada neu hanjabak Yesus. Here nunti, “Manyu hukum agama takam, inun iyuh ulun sarak anri daranganni?”

³Yesus nuing, “Inun parentah sa naami Moses ma naun?”

⁴“Hi Moses puang nguring ulun sarak anri daranganni, asal dahulu ngulah surat pisarakan,” tuing here.

⁵“Hi Moses nyurat parentah yiru daya naun tuu mahadin naajar,” eau Yesus ma here.

⁶“Kude teka asalni, hang tawuk Alatalla ngulah murunsia, nawara ‘Alatalla nanyari here upu anri wawei.

⁷Daya yiru ulun upu sagar nanan ineh-ambahni balalu mira baya anri daranganni, balalu kararuehni jari isa.’

⁸Jari, here puang lagi rueh kaulun, malengkan isa.

⁹Daya yiru, inun sa haut natamaya daya Alatalla, puang iyuh natampisah daya murunsia!”

¹⁰Dami haut here masuk malewu, kawan ulun sa umba hanye nunti ma Yesus neu hal yiru.

¹¹Yesus kaeau ma here, “Hie sa ngumpe daranganni balalu narangan wawei lain, ulun yiru ibela anri daranganni sa palanungkai yiru.

¹²Kala yiru pada wawei sa naumpe daya daranganni balalu narangan upu lain, hanye pada ibela.”

¹³Naan papire kaulun nginsing kawan iya nunung Yesus nampan hanye hanrapak tanganni mamberkat here. Kude kawan ulun sa umba Yesus nyangit kawan ulun yiru.

¹⁴Kadinung hal yiru, Yesus sangit balalu hanye kaeau nengkan kawan ulun sa umba hanye, “Elahni kawan iya yiru hawi nunung aku! Ada nguring here, daya kawan ulun kalayiti sa jari ulun wat Alatalla.

¹⁵Itung yiti! Hie sa puang nadap Alatalla kala erang kaulun iya, rumis hanye puang sagar jari ulun wat Alatalla.”

¹⁶Udi kaeau kalayiru, Yesus maluk kawan iya yiru, udi hie hanye hanrapak tanganni hang ambau here katuluh palus mamberkat here.

¹⁷Tawuk Yesus nampalus pakiaanni lagi, naan erang kaulun nempat hawi nunung Yesus. Ulun yiru ileku hang hadapan Yesus palus nunti, “Guru sa maeh, inun sa harus naulahku nampan aku tau kaiyuh pamelum sajati palus kalalawah?”

¹⁸“Wuah inun hanyu kaeau aku maeh?” tunti Yesus. “Puang uweng sa maeh, kasuali Alatalla.

¹⁹Hanyu haut karasa kawan parentah Alatalla, ‘Ada munu ulun, ada ibela, ada ngalat, ada ipusu, ada nipu, hormat ambah anri inehnu.’ ”

²⁰“Guru,” eau ulun yiru, “katuluh kawan parentah yiru haut natampalusku hengka kalemah aku iya.”

²¹Yesus maneneng ulun yiru anri palelu balalu kaeau, “Ekat isa hal lagi sa naparlu dayanu. Hulu ari katuluh miliknu; ami duitni ma ulun paua, balalu hanyu sagar kaiyuh harata hang surga. Udi yiru hawi palus umba aku.”

²²Karengei Yesus kaeau kalayiru, ulun yiru kacewa, balalu tulak nanan unengan yiru anri mahanang atei daya hanye tatau tatuu.

²³Balalu Yesus ninung kawan ulun sa umba hanye palus kaeau ma here, “Mahadin tatuu ma ulun tatau jari ulun wat Alatalla!”

²⁴Kawan ulun sa umba hanye wauh karengei lengan Yesus yiru. Kude Yesus kaeau kamulek, “Anak-anakku, samula mahadin neu jari ulun wat Alatalla!

²⁵Labis murah erang kaukui unta masuk luwang jarum teka erang kaulun tatau masuk Dunia Wau Wat Alatalla.”

²⁶Kawan lengan Yesus yiru ngulah kawan ulun sa umba hanye wauh, hampe here ipanunti sameh here, “Amun kalayiru, hie sa tau salamat?”

²⁷Yesus maneneng here palus nuing, “Ma murunsia yiru mustahil, kude puang mustahil ma Alatalla; katantuluhni uras tau ma Alatalla.”

²⁸Balalu hi Petrus kaeau, “Dinung, kami haut nanan ala katantuluh daya umba hanyu.”

²⁹Eau Yesus, “Parisayaleh: ulun sa haut nanan lewu reanni, atawa pulaksanaini upu atawa wawei, atawa inehni, atawa ambahni, atawa kawan anakni, atawa ume taunni gana aku pada gana Kabar Maeh teka Alatalla,

³⁰Hang wayah itati ulun yiru sagar narime labis wahai lagi. Hanye jatuh kali lipet sagar kaiyuh labis wahai lewu, pulaksanai upu, pulaksanai wawei, ineh, kawan anak, ume taun, — nelang pada kahanangen. Nelang yati hang hanrian anrau, ulun yiru sagar narime pamelum sajati palus kalalawah.

³¹Kude rama ulun sa itati panga dahulu sagar jari panga hanrian nelang rama ulun itati panga hanrian sagar jari panga dahulu.”

³²Yesus anri kawan ulun sa umba hanye rahat hawuang pakiaan ma Yerusalem. Yesus takia dahulu hang hadapan, kawan ulun sa umba hanye katuluhni gupuh. Kala yiru pada ulun rama sa naharak here hang wuku here uras kaingkam takut. Kamulek Yesus nerau lagi kawan ulun sa umba hanye, raerai here palus iwara ma here inun sa sagar jari wuah dirini.

³³“Rengei,” eauni, “takam itati rahat nuju Yerusalem. Hang yaru Anak Murunsia sagar nasarah ma kawan imam kapala anri kawan guru agama. Nasarah ma kawan ulun puang Yahudi, udi hie hanye sagar nahukum mati.

³⁴Here sagar ngakiek hanye, nura hanye, ngahanangen hanye, palus nyalib hanye. Kude hang anrau katelu hanye sagar ambuan welum mulek.”

³⁵Balalu hi Yakobus anri hi Yohanes, hanyeyiru kawan anak Zebedeus, hawi nunung Yesus. “Guru,” eau here, “naan isa hal sa kami hamen hanyu ngulahni ma kami.”

³⁶“Inun kahamenen naun naulahku ma naun?” tunti Yesus.

³⁷Here nuing, “Kami hamen maharung hang tuhi kawi nelang hang tuhi kawannu, amun hanyu maharung hang ambau padudusannu anri pihante mulia.”

³⁸“Naun puang karasa inun sa nalaku naun,” eau Yesus ma here, “Inun naun sanggup nguut teka sangkir kahanangen sa sagar nauutku nelang masuk mawuang luwang kahanangen sa sagar naasukku?”

³⁹“Sanggup,” tuing here. Balalu Yesus kaeau kamulek ma here, “Tuu bujur naun sagar nguut teka sangkir kahanangen sa sagar nauutku, nelang masuk mawuang luwang kahanangen sa sagar naasukku.

⁴⁰Kude neu hie sa sagar maharung hang tuhi kawan atawa hang tuhi kawiku, yiru puang aku sa bakuasa nukasni. Alatalla sa nukas hie-hie sa sagar maharung hang kawan unengan yiru.”

⁴¹Tawuk sapuluh kaulun ulun sa umba Yesus sa lainni yiru karengei hal yiru, here sangit anri hi Yakobus here rueh hi Yohanes.

⁴²Balalu Yesus nerau here katuluh, nelang kaeau, “Naun karasa kawan pamimpin bangsa sa puang kataru Alatalla nehek rakyatni. Nelang kawan pambasar here nyere here.

⁴³Kude naun puang iyuh kalayiru! Kabalikanni, ulun sa hamen jari tamam hang penah naun, hanye harus jari palayan naun.

⁴⁴Kamulek ulun sa hamen jari palanungkai hang penah naun, harus jari walah ma katuluhan.

⁴⁵Daya Anak Murunsia pada puang hawi nampan nalayanni. Hanye hawi nampan malayanni nelang neu nyarah hewukni pakai newuh ulun rama.”

⁴⁶Here hampe hang Yerikho. Tawuk Yesus anri kawan ulun sa umba hanye baya ulun rama nanan tumpuk yiru, naan erang kaulun pehe rahat maharung laku sadakah hang iring lalan. Ngaranni hi Bartimeus, anak wat Timeus.

⁴⁷Tawuk hanye karengei ulun sa mitah yiru Yesus ulun Nazaret, hanye nerau anri mehet, “Yesus, Anak Dawid! Palelu aku!”

⁴⁸Hanye nasangit daya ulun rama nelang nahuyu suni. Kude hanye magin mehet lagi nerau, “Anak Dawid, palelu aku!”

⁴⁹Yesus tarie balalu kaeau, “Herau hanye.” Balalu here nerau ulun pehe yiru. Here kaeau ma hanye, “Suni! Hanyu naherau daya Yesus, ambuan!”

⁵⁰Ulun pehe yiru nawut jubahni, balalu badadas minri palus tulak nunung Yesus.

⁵¹“Inun bahumnu naulahku ma hanyu?” tunti Yesus ma hanye. Ulun pehe yiru nuing, “Guru, aku hamen kadinung.”

⁵²“Hulu tulak,” eau Yesus, “daya hanyu parisaya ma aku, hanyu ware.” Hang tawuk yiru pada ulun yiru tau kadinung. Balalu hanye umba naharak Yesus hang lalan.