Read Ma'anyan MARKUS 11 Bible Online

MARKUS 11 - Ma'anyan bible

MARKUS 11

¹Tawuk haut rite Yerusalem, here hampe hang tumpuk Betfage anri Betania, hang leba Bukit Zaitun. Hang yiru Yesus ngutus rueh kaulun ulun sa umba hanye badahulu.

²“Hulu ma tumpuk sa naan hang hadapan yiru,” eau Yesus ma here. “Dami naun masuk ma tumpuk yiru, naun sagar kadinung erang kaukui anak keledai nahuruk, sa huan suah natunggang daya ulun. Uka hurukan keledai yiru palus insing ma yati.

³Amun naan ulun nunti ma naun wuah inun naun napas keledai yiru, eau, ‘Tuhan parlu makai, nelang hanye sagar hinang ngampudini.’ ”

⁴Karueh kaulun ulun sa umba Yesus yiru tulak, balalu kahaba erang kaukui anak kaledai rahat nahuruk hang hadapan wawanawang lewu hang iring lalan. Balalu here napas kaledai yiru.

⁵Kawan ulun sa minri hang yiru nunti ma here, “Hau, inun ulah naun? Wuah inun naun napas anak kaledai yiru?”

⁶Here nuing kala sa haut naeau daya Yesus ma here. Balalu kawan ulun yiru ekat ninung here nginsing kaledai yiru.

⁷Tawuk hampe ma Yesus, here napik punggung kaledai yiru makai jubah here, balalu Yesus sungkat ma ambau kaledai yiru.

⁸Rama ulun ngampar jubah here hang lalan, naan pada sa natai kawan wila hang penah lalan sa naalap here teka ume.

⁹Kawan ulun sa takia hang hadapan anri kawan ulun sa naharak teka wuku, katuluhni kaeau anri lengan mehet,

¹⁰“Tawat ma Alatalla! Naberkat hanye sa hawi hawuang ngaran Tuhan! Naberkat pamarentahanni sa sagar hawi — pamarentahan Dawid datu-nini takam! Tawat Alatalla Isa Pangaambau!”

¹¹Akhirni Yesus hampe hang Yerusalem, balalu masuk ma Lewu Tuhan. Hang yiru hanye ninung hang kalilingan hanye. Kude daya haut kai maieng, hanye balalu tulak ma Betania baya anri kadua walas kaulun, ulun sa umba hanye.

¹²Hang kaiyat uni, tawuk here ganjah takia kaluar teka Betania, Yesus kajuju.

¹³Teka lawit hanye kadinung erang kakakau ara sa rawenni janrah. Balalu hanye tulak ma putut ara yiru neu ninung inun naan wuani. Kude tawuk hanye hampe hang putut ara yiru, hanye puang kahaba inun-inun, ekat kawan rawenni, daya tawuk yiru huan musim wua ara.

¹⁴Balalu Yesus kaeau ma kakau ara yiru, “Nuku teka itati puang uweng sunah erang kaulun sa sagar nguta wua teka hanyu lagi!” Kawan ulun sa umba Yesus karengei lengan yiru.

¹⁵Udi yiru here hampe hang Yerusalem, balalu Yesus tulak lagi ma Lewu Tuhan. Hang yiru hanye mulai ngusir katuluh ulun sa miarian iwidian hang unengan yiru. Hanye maleng kawan meja kawan ulun panurup duit, baya kawan bangku ulun pangari wurung dara.

¹⁶Nelang puang sunah erang kaulun naijinni nginsing inun heneng mitah natat Lewu Tuhan yiru.

¹⁷Udi yiru Yesus ngajar kawan ulun hang yiru. Hanye kaeau, “Hawuang Surat Barasis naan nasurat kalayiti: Alatalla kaeau, ‘Lewuku sagar naantuh lewu unengan badoa ma katantuluh bangsa.’ Kude naun ngulahni jari unengan hanai parampok!”

¹⁸Kawan imam kapala anri kawan guru agama karengei lengan yiru. Maka here balalu mulai ngantilau lalan neu munu Yesus. Here takut anri hanye, daya katuluh ulun mandam karengei lengan ajaranni.

¹⁹Dami kai kamalem, Yesus anri kawan ulun sa umba hanye nanan tumpuk yiru.

²⁰Subuh hang anrau kaiyat uni, tawuk here mitah kakau ara yiru, here kadinung kakau ara yiru haut patei hampe kawan wakatni.

²¹Balalu hi Petrus kaitung neu kajadian erang anrau dahulu (hangkariwe). Balalu hi Petrus kaeau ma Yesus, “Guru, suba dinung! Kakau ara sa nakutuknu yiru haut patei!”

²²Yesus nuing, “Parisayaleh ma Alatalla.

²³Kapinuuni naun tau kaeau ma bukit yiti, ‘Paenat nelang patawut mawuang laut!’ Balalu hal yiru sagar natampalus ma naun; asal naun puang bembang, nelang naun parisaya sa naeau naun yiru sagar tuu-tuu jari.

²⁴Daya yiru itung yiti: Amun naun badoa nelang laku inun heneng, parisayaleh himat Alatalla haut ngami ma naun inun sa nalaku naun, balalu naun sagar narimeni.

²⁵Kamulek amun naun badoa, kude atei naun puang sanang anri hie-hie, ampun ulun yiru dahulu, nampan Ambah naun hang surga pada ngampun naun sa badosa. [

²⁶Amun naun puang ngampun ulun lain, Ambah naun sa hang surga pada puang sagar ngampun naun sa badosa.]”

²⁷Here mulek lagi ma Yerusalem. Tawuk Yesus takia bakaliling hawuang Lewu Tuhan, kawan imam kapala, kawan guru agama anri kawan pamimpin Yahudi hawi nunung hanye.

²⁸Here nunti, “Anri dasar inun hanyu ngulah katuluhni yiti? Hie sa ngami hak yiru ma hanyu?”

²⁹Yesus nuing, “Aku pada hamen nunti ma naun. Tuing, die aku sagar iwara ma naun makai hak hie aku ngulah kawan hal yiti.

³⁰Hi Yohanes mambaptis makai hak hie, Alatalla atawa murunsia?”

³¹Balalu kawan imam kapala anri kawan pamimpin Yahudi mulai bagurayang sameh here. Here kaeau, “Amun takam kaeau, ‘Makai hak Alatalla,’ hanye sagar kaeau, ‘Wuah inun naun puang parisaya ma hi Yohanes?’

³²Kude mahadin pada neu kaeau, ‘Makai hak murunsia.’ ” Daya here takut anri ulun rama, daya katuluh ulun nganggap hi Yohanes erang kaulun nabi.

³³Jari, here nuing, “Kami puang karasa.” Balalu Yesus kaeau ma here, “Amun kalayiru, aku pada puang hamen iwara ma naun makai hak hie aku ngulah katuluhni yiti.”